Esta 1 - Ebaibul

Kiritarae Basiti

¹ Apotu ŋakiro nu kitiyakinos alorwa a ŋulu araakar Ausero. erwosit ŋolo epukat ŋakwapin amiat ka ŋatomoniarei ka ŋakanikaarei; akisyakin alo India tari Esiopia (Iŋes Kus).

² Alorwa a ŋul abu erwosit Ausero min napukan kipuka akwap keŋ alokai ka apukan a ŋina ayai Susa.

³ Ani edoli ekaru ŋolo a ŋiuni ipukat, kitemok iŋes ŋasuban aŋuna a daadaŋ a ŋulu epukato ka iŋes ka ŋiketiyak keŋ. Ayakasi nen ŋikyain ŋulu a Perisia, Media ka ŋapolon ta ŋirwosi a ŋakiboisyo ka akwap keŋ.

⁴ Kitoodik iŋes ŋituŋa anasuban a ŋun ebari ŋolo apolon nooi ŋolo ka akwap keŋ, akibuses ka apolou ŋina ailiilon ŋina etopolooritere iŋes. Abu Ausero ya ŋirwa amiat ka ŋatomonikanikauni itoodi ŋun.

⁵ Ani edaun ŋirwa ŋul, kitemok erwosit ŋasuban aŋuna a ŋituŋa daadaŋ a ŋulu aya Susa kai ka apukan. Aya nasuban ŋun ŋituŋa ŋulu arwok ka ŋulu caryo; todol ŋirwa ŋikanikaarei inuminumyo ŋasuban ŋun anenilapat alokiŋa akai ka apukan.

⁶ Enenetoe nen ŋanaŋgae ŋuna akwaŋak ka ŋunapusiyek, arucitoe ŋanaŋgae ŋun a ŋausii a ŋuna amilimilak ka ŋunakipura areŋak ŋuna akodanakinitae lokabobooe ŋulu itiyaunitae a esilipa, ido toenen lopirin ŋulu eositae eraŋgi ŋolo akwaŋan. Ewuakinitae nalapatu ŋina ka akai a apukan ŋin ŋikitaadae ŋulu etiyaunitae a egolid ka esilipa, towuas aneni enaminamitae ŋamoru ŋuna areŋak, akwaŋak ka ŋuna amilimilak ta ŋuna iceo ŋiboro.

⁷ Tokorae ŋimaten lotuŋa a ŋiboro a ŋulu agelegelya a ŋulu etiyaunitae a egolid. Alal nooi epiini ŋolo aponi inakinae ŋituŋa, ikwapei araakar erwosit ŋolo abarit nooi.

⁸ Amasyo epiini emam akibwaibwa ŋituŋa; anerae abu erwosit tolimok ŋiketiyak keŋ daadaŋ ainakin ŋinituŋanan lopite ŋolo ecamitor.

⁹ Abu arwosit Basiti daŋ kitemok ŋasuban aŋuna a ŋaberu a ŋuna aya kai ka apukan ŋina ka Ausero.

¹⁰ Ani edolete ŋirwa ŋikanikaarei, apaki ŋina ayakar erwosit nalakara aŋuna amasya epiini, tolimok iŋes Mekuman, Bisita, Karibona, Bigita, Abagita ka Setar ta Karikas ŋulukanikaarei ŋulu arae ŋikolupae ŋulu eteete iŋes atemar,

¹¹ yautu arwosit Basiti kiŋaren a erwosit enapit ebokot ŋolo ka apolou, ikotere itoodikini erwosit akibuses a Basiti neni a ŋikapolok ka ŋituŋa daadaŋ, anerae ebus Basiti nooi.

¹² Ani elimokinete ŋikolupae ŋul Basiti ŋakiro ŋuna a erwosit, towou abunore. Aŋakiro a ŋun, abu erwosit toŋo nooi, toresiyar iŋes nooi.

¹³ Tosodi nai erwosit kiŋitiŋit ŋikaosok ŋulu ayenete ŋikisila (anerae arae ŋun ŋuna amaikina erwosit kitiya neni a daadaŋ a ŋulu eyenete ŋikisila ka ŋitalyo.

¹⁴ Ŋikaosok nai lu aapiyete aneni keŋ: Karisena, Setar, Adimata, Tarisis, Meres, Marisena ka Memukan. Arae ŋikapolok ŋulukanikaarei ŋul, ŋulu a Perisia ka Media, ikes ayakatar apedor akirworo ke erwosit, ido ikes ayakatar apolou ŋina aapikinit ŋina ke erwosit anapukan a ŋin).

¹⁵ Tema erwosit iŋisiŋisi ikes, “Alotooma ŋikisila, nyaanu ŋuna emaikina kitiyae neni a Basiti a arwosit, anerae nyiwuapa iŋes ŋuna a ŋikolupae a ŋulu eyakit erwosit Ausero?”

¹⁶ Tema nai Memukan alokiŋaren erwosit ka ŋikapolok, “Meere neni a erwosit bon etiya Basiti ŋuna aronok, nai tari neni a ŋikapolok a daadaŋ ka ŋituŋa daadaŋ ŋulu eya nakwapin daadaŋ ŋuna ipukat Ausero,

¹⁷ anerae eyenuneete ŋaberu daadaŋ ŋakiro nu ŋuna etiya Basiti, einakinete ŋun ŋaberu ajamuwarit ŋikilyok kec, anerae etemarete ikes, ‘Abu erwosit Ausero tonyara arwosit Basiti yaunae neni keŋ, ido abu towou alosit.’

¹⁸ Kelunyar akoloŋit na nyitiya ŋadi, eŋerete ŋaberu a ŋikapolok a Perisia ka Media ŋakiro a ŋikapolok a ŋulu ipukato ikes ka ŋuna a erwosit aŋuna eiraryata aronis ŋina etiya Basiti, ido eyakaun ajamuwarit ka anyunyura ne ŋina nyesaluni.

¹⁹ Ani kejokak nu aneni a erwosit, itemokino iŋes tolimu akirot, ido kimyek iŋes akirot ŋin kigirae lokisila a Ŋiperisan ka Ŋimidian, ŋikisila ŋulu nyepedoryo akilocokin. Akirot ŋin iŋes na, nyemaikina jik Basiti bu kiŋaren erwosit Ausero, ido emaikina erwosit inak apolou a Basiti neni ka aberu a ice a ŋina ejok akilo Basiti.

²⁰ Ani nai ŋina elimorere akirot a erwosit nakwapin daadaŋ ŋuna ipukat iŋes, itopoloorete ŋaberu daadaŋ ŋikilyok kec ŋuluarwok ka ŋulucaryo kaapei.”

²¹ Kitalaka akirot ŋin erwosit ka ŋulu epukatotor iŋes, kitiya erwosit ikwaŋinapei alimunio Memukan.

²² Kiyakiya iŋes ŋabaruwae nakwapin ŋuna epukat iŋes, kigirak ŋinakwap ŋakiro lopite ŋolo igiryata ikes ka ŋulutuŋa kigirak a aŋajep kec; ŋakiro ŋuna alimunitoe atemar emaikina ŋolokile erae ekapolon alokal keŋ.