Esir 7 - Ebaibul

Abunore ka Esira ka etic keŋ

¹ Ekaku a ŋun, alorwa a ŋulu epukator Aritaseses ŋolo a Perisia, ayai ekile ŋolo anyaritae Esira lokoku a Seraia a ŋolo arae lokoku a Asaria a ŋolo arae lokoku ka Ilikia

² a ŋolo arae lokoku a Salum, a ŋolo arae lokoku a Sadok a ŋolo arae lokoku ka Aitub.

³ a ŋolo arae lokoku ka Amaria, a ŋolo arae lokoku ka Asaria a ŋolo arae lokoku a Meraios

⁴ a ŋolo arae lokoku a Seraia a ŋolo arae lokoku a Usi a ŋolo arae lokoku a Buki

⁵ a ŋolo arae lokoku ka Abisya a ŋolo arae lokoku a Pineas a ŋolo arae lokoku ka Eleasar a ŋolo arae lokoku ka Aron a esacaradoti a ŋolo Apolon nooi.

⁶ Abu Esira kitipeiyo alo Babilon Yerusalem. Arae iŋes ekegiran ŋolo ayeni ejok ŋikisila a Moses ŋulu abu Ekapolon Akuj a Ŋisirael inak Moses. Abu erwosit inak Esira ibore daadaŋ ŋini eŋita iŋes, anerae eŋarakinit Ekapolon Akuj keŋ iŋes.

⁷ Apotu daŋ Ŋisirael ŋice ka ŋisacaradotin ŋice ka ŋilepi ŋice ka ŋikaeok, ŋiketeok ŋipukei ka ŋiketiyak a Akai ka Akuj kitipeiyosi Yerusalem alokaru a ŋolo a ŋikanikaarei ipukat erwosit Aritaseses.

⁸ Adolunete ikes Yerusalem elap ŋolo a ŋikan, alokaru a ŋolo a ŋikanikaarei ipukat Aritaseses.

⁹ Ŋirwa ke elap epei, elap ŋolo ke epei, togeut Esira akitipeiyor alo Babilon ani edoli ŋirwa ke elap epei elap ŋolo a ŋikan todolu iŋes Yerusalem, anerae eŋarakinit Akuj keŋ iŋes.

¹⁰ Arae Esira ituŋanan ŋini kebu kiwuak etau akiswon ŋikisila ŋulu ke Ekapolon ka akiwuap ikes ta ŋakiro ŋuna etubunitoe ka ŋikisila alo Isirael.

Abaruwa ŋina ka Aritaseses neni ka Esira

¹¹ Erae nu ŋakiro ŋuna egiritae nabaruwa ŋina ainakini erwosit Aritaseses neni ka esacaradoti Esira a ekegiran a ŋolo ayeni nooi ŋakiciketa ke Ekapolon ka ŋakiro ŋuna atubunit Ekapolon aŋuna a Ŋisirael,

¹² “Ayoŋ Aritaseses ŋolo arae erwosit a ŋirwosi, egirit abaruwa na neni a esacaradoti Esira, ekegiran ŋolo a ŋikisila a ŋulu ka Akuj a ŋina anakuj, toyai ekisil neni kon! Tokona,

¹³ atub ayoŋ atemar, ituŋanan daadaŋ ŋini a Isirael ŋini eyai nakwap ŋina epukat ayoŋ, kori ŋisacaradotin kec, kori ŋilepi ŋulu ecamito alotai kec alosit Yerusalem, epedori alosit kaapei ka iyoŋ,

¹⁴ anerae ikiyaki iyoŋ erwosit kaapei ka ŋikilyok ŋulukanikaarei ŋulu iŋarakinito iŋes anakipuka akwap, akiŋitiŋitiun ŋakiro ŋuna etapito Yudaya ka Yerusalem, ŋakiro ŋuna elimunitoe alokisila ka Akuj kon, alokisila a ŋulu itiŋit iyoŋ anakan kon.

¹⁵ Ikiyakitae daŋ iyoŋ ayaar esilipa ka egolid, ŋiboro ŋulu elemunito erwosit kaapei ŋikilyok ŋulu iŋarakinito iŋes anakipuka akwap, elemunito ikes ŋul anacamit kec a ŋikulepek ainakin neni ka Akuj a ŋina a Isirael, a Akuj a ŋina eyai akibois keŋ Yerusalem,

¹⁶ yaa esilipa daadaŋ ka egolid ŋolo iryamuni iyoŋ anakwap a Babilon a daadaŋ ta ŋainakineta ŋuna elemunete ŋituŋa ka ŋisacaradotin anacamit kec a ŋikulepek aŋuna ka Akai ka Akuj alo Yerusalem.

¹⁷ Emaikina iyoŋ kisitiya ŋisiliŋa ŋul agyelya ŋimoŋin, ŋimeesekin, ŋikaalei ŋulumesekin ka ŋainakineta ŋuna a ŋikinyom ta ŋainakineta ŋuna a ŋimaten, emaikina iyoŋ inak ikes neni ke Ekapolon a Namuroet a ŋina ka Akai ka Akuj kon alo Yerusalem.

¹⁸ Ani esilipa ka egolid ŋolo ideun, kisitiya lopite ŋolo ikijoikinit iyoŋ ka ŋirukitos kon, ikwaŋina ecamitor Akuj kus.

¹⁹ Emaikina iyoŋ iya neni ka Akuj a ŋina alo Yerusalem ŋiboro ŋulu ikiinakin iyoŋ ŋulu isitiyao alo Kai ka Akuj kon.

²⁰ Tosodi ibore daadaŋ ŋini iitana nabo aŋuna ka Akai ka Akuj kon, ibore ŋini emaikina iyoŋ tolemu, ipedori iyoŋ alemun alokai a ŋina iŋadatae ŋisiliŋa ŋulu ka apukan.

²¹ “Ayoŋ erwosit Aritaseses, adau atubun ŋakiro nu neni a daadaŋ a ŋikeŋadak ŋisiliŋa anakwap a ŋina alokekwaye aŋolol Eupurate atemar, ŋinibore daadaŋ iitanit aneni kus esacaradoti Esira ekigiran ka eketataman ŋikisila ka Akuj a ŋina anakuj, emaikina inakinae daadaŋ,

²² nyedepasi ŋiboro ŋulu iinakinete iyes iŋes ŋakiloi ŋalipyo ŋauni ka ŋamiae ŋaomwon ŋuna ke esilipa, ŋakiloi ŋalipyo ŋatomon ŋuna akinyom a ŋulu esibito erau, ŋilitae ŋalipyo ŋaarei ŋulu ke epiini, ŋilitae ŋalipyo ŋaarei ŋulu ka akimyet a ŋina ka olipa ka acumbi daadaŋ ŋina iitana.

²³ Ibore daadaŋ ŋini elimunit Akuj ŋina anakuj, emaikina kitiyae alotooma ainakina aŋuna ka Akai ka Akuj a ŋina anakuj, ani pa kitiyata iyes ŋun, ebuni iŋes aŋoikin apukan a erwosit ka ŋulu ilunyokin lokicoloŋ keŋ akipuka.

²⁴ Ikilimokinitae daŋ iyes atemar nyemaikina iyes toriekis akitac ocur, kori akijaun ediotacit aneni a ŋisacaradotin, a ŋilepi a ŋikaeok, a ŋiketeok ŋipukei, a ŋiketiyak ka ŋaketiyak ŋulu ka Akai ka Akuj, kori ŋiketiyak ca daadaŋ ŋulu ka Akai a ŋina ka Akuj.

²⁵ “Tosodi iyoŋ Esira, anaosou kon a ŋina ikiinit Akuj iyoŋ, toseu ŋikarikok a ŋituŋa ka ŋikatubok ŋakiro ŋulu etubete ŋakiro a ŋituŋa daadaŋ anakwap a ŋina alokekwaye aŋolol Eupurate, emaikina ŋikilyok ŋul toyenete ŋikisila ŋulu ka Akuj kon, tosodi emaikina iyoŋ kitatam ŋulu nyeyenete ŋikisila ŋulu ka Akuj.

²⁶ Ŋituŋa daadaŋ ŋulu nyiwuapete ŋikisila ŋulu ka Akuj kon ka ŋikisila ŋulu ke erwosit, emaikina totubokinae ikes alokisila kerae atwanare, kori alemar alotuŋa, kori ademar ŋiboro kec, kori togolokinoe kai.”

²⁷ Kipuroe Ekapolon, Akuj atapapaa yok, ŋina ewuakini ŋakiro ŋuna ikote ŋun lotau a erwosit, ikotere itopolooryo Akai ka Akuj alo Yerusalem,

²⁸ Akuj ŋina akainaki ayoŋ daŋ amina keŋ ŋina nyiryaŋiryaŋa alokiŋaren erwosit ka ŋulu iŋarakinito iŋes anakipuka ta alokiŋaren ŋikapolok daadaŋ ŋulu agogoŋok ŋulu ipukato kaapei ka erwosit. Abu ayoŋ nyakuryaniar, anerae ekeŋarakinit Ekapolon Akuj kaŋ, ido abu ayoŋ ocunak ŋikarikok alo Isirael aŋuna ka akitipeiyor kaapei ka ayoŋ.