Esir 6 - Ebaibul

Ŋakiro ŋuna abu Darius totub

¹ Abu nai erwosit Darius totub akirot tolimu atemar toripiripae lokitaaaboi ŋulu igiritae ŋakiro ŋuna ka apukan, ŋulu eŋadatae Babilon.

² Nai arae Ekibatana lotaun ŋolo apolon anakwap a Media iŋes aponere toryamunere ekitaabo ŋolo egiritae ŋakiro nu,

³ “Alokaru a ŋolo esyaunan ipukat erwosit Kirus, abu iŋes totub ŋakiro nu ebe, ‘Emaikina Akai ka Akuj ŋina alo Yerusalem, todukokinae nabo, emaikina todukokinae akibois ŋina einanakinere ŋamuronisya ŋina eyaununuyo ŋainakineta ŋuna epeyo. Emaikina aoyau keŋ erae ŋimitae ŋatomoniarei ka ŋikanikaarei ameun alokwap tari kidiama ka torae alokiŋaren ka neni iteotor ŋimitae ŋatomiarei ka ŋikanikaarei,

⁴ emaikina arwatata keŋ edukunitoe a ŋilaino a ŋiuni ŋulu a ŋamoru a ŋuna icetae ejok ka elain epei ŋolo a ŋabaoi. Ŋisiliŋa daadaŋ ŋulu iitana aŋuna ke etic a ŋol emaikina tolemunae alokai a ŋina iŋadatae ŋisiliŋa ŋulu ka apukan.

⁵ Nabo daŋ, emaikina kinyakarae ŋiboro ŋulu ka Akai ka Akuj ŋulu itiyaunitae ke egolid ka esilipa, ŋulu koloŋ alemari Nebukadinesar alo Kai ka Akuj alo Yerusalem, yau Babilon, emaikina ŋiboro ŋul kinyakarae yaarae Kai ka Akuj Yerusalem, emaikina kiwuakinae ŋinibore nakibois keŋ, emaikina iyes kiwuakis ŋiboro ŋul Kai ka Akuj.’

⁶ “Iyoŋ Tatenai ekapolokiniton akwap a ŋina alokekwaye aŋolol Eupurate, iyoŋ Sesar-Bosenai ka iyes ŋirukitos kec, iyes ŋikiyakia ŋulu iya nakwap ŋina alokekwaye aŋolol Eupurate nyiretakis ŋituŋa akiduk Akai ka Akuj.

⁷ Kimyekisi etic ŋolo ka akiduk Akai ka Akuj tolot kiŋaren, kimyekisi ekapolokiniton a Ŋiburaniyae kaapei ka ŋikasikou a Ŋiburaniyae todukokis nabo Akai ka Akuj nenipei koloŋ sek ayai.

⁸ Nabo daŋ, atub ayoŋ ŋuna emaikina iyes kitiyata aŋuna a ŋikasikou a ŋulu a Ŋiburaniyae ka aŋuna ka akiduk nabo Akai ka Akuj, emaikina inakinae ŋituŋa ŋul ŋisiliŋa ŋulu iitana aŋuna ke etic a ŋol, emaikina inakinae ikes ŋisiliŋa daadaŋ emam adidi ainakin ikes, tolemunae ŋisiliŋa ŋul alosiliŋa a ŋulu ecununuyo aŋuna ka apukan ka alosiliŋa a ŋulu etacete ŋituŋa ŋulu ka akwap a ŋina alokekwaye aŋolol Eupurate.

⁹ Emaikina inakinae ikes ibore daadaŋ ŋini iitanito ikes emam awoun, kerae ŋimoŋin ŋulu atumak, ŋimesekin, kori ŋamesekin ikwapei ŋainakineta ŋuna epeyo neni ka Akuj a ŋina anakuj, kerae ŋikinyom ŋulu esibito erau, acumbi, epiini, kori akimyet lopite ŋolo iitanitotor ŋisacaradotin alo Yerusalem. Emaikina inakinae ikes ŋiboro ŋul daadaŋ a ŋinakoloŋit,

¹⁰ ikotere einakinete ikes ŋamuronisya ŋuna elakara Akuj ŋina anakuj einakinio kilipa aŋuna ka akiyar a erwosit ka ŋidwe keŋ.

¹¹ Ŋakiro ŋace nu, adau ayoŋ atubun atemar ani kiloc ituŋanan idio ŋakiro nu ŋuna adau ayoŋ atubun, editunio epir ŋolo ka akai keŋ tolemunae kiŋa alokai keŋ ekaku kinenekinoe iŋes lopir ŋol. Inyasuno akai ŋin toruwor neni etukor ekuron.

¹² Elipi Akuj ŋina adau aseun Yerusalem aruwor akibois ŋina ilipere iŋes, tolema anapukan erwosit daadaŋ ka ŋituŋa daadaŋ ŋulu ikatakinete akilocokin ŋakiro nu, kori ŋini inyasuni Akai ka Akuj na alo Yerusalem. Ayoŋ, Darius atub ŋakiro ŋun, emaikina kiwuapae emam apegakinet.”

Akirikakin ka akitaleun Akai ka Akuj

¹³ Ikwapei nai alimunitor erwosit Darius, apotu Tatenai ŋolo arae ekapolokiniton a akwap a ŋina alokekwaye aŋolol Eupurate kaapei ka Sesar-Bosenai ta ŋirukitos kec ŋuluce kitiyata isiyookinito ŋakiro daadaŋ ŋuna abu erwosit Darius tolimu.

¹⁴ Aŋun, apotu ŋikasikou a Ŋiburaniyae toloto kiŋaren anakiduk Akai ka Akuj emam ŋace ka akidwar a ŋikadwarak a lu: Agai ka Sakariya lokoku a Ido. Apotu ikes kirikakis aduketait kec alotooma akiciket ŋina ka Akuj a Isirael ka atubunet a Kirus, Darius ka erwosit Aritaseses ŋirwosi ŋulu a Perisia;

¹⁵ ido aponi kirikakinae akiduk Akai ŋin ŋirwa ke elap ŋiuni elap ŋolo enyaritae Adar alokaru a ŋolo a ŋikanikapei ipukat erwosit Darius.

¹⁶ Apotu Ŋisirael, ŋisacaradotin ka ŋilepi ta ŋituŋa ŋuluce ŋulu aboŋunete anakwap a ŋina arikoritae ikes, kinumunuma ka alakara ŋasuban ŋuna etaleunere Akai ka Akuj.

¹⁷ Apotu ikes inakis aŋuna ka akitaleunio Akai ka Akuj ŋimoŋin amiat, ŋimesekin ŋamiae ŋaarei, ŋikaalei ŋulumesekin ŋamiae ŋaomwon, ido ikwapei ainakinet aŋuna ka asecit a Ŋisirael a daadaŋ apotu ikes inakis ŋikorwa ŋitomon ka ŋiarei, lokimar ŋolo a ŋikabilae a Ŋisirael.

¹⁸ Tosodi kiwuakis ŋisacaradotin a ŋatyaketa kec ka ŋilepi a ŋatuketa kec aŋuna ke etic ka Akuj alo Yerusalem, lopite ŋolo igiritere nakigireta a Moses.

Kinumunumae ŋasuban ŋuna a Paska

¹⁹ Ŋirwa ke elap ŋitomon ka ŋiomwon elap ŋolo esyaunan apotu ŋituŋa ŋulu aboŋunete anakwap aŋina arikoritae ikes, kinumunuma ŋasuban ŋuna a Paska,

²⁰ anerae aris ŋisacaradotin kaapei ka ŋilepi kitaleunosi, eteleuno ikes daadaŋ. Aŋun, apotu ŋilepi toara ikale ŋini a Paska aŋuna a Ŋisirael a daadaŋ a ŋulu apotu toboŋut ka aŋuna a ŋisacaradotin ta aŋuna kec a ŋikulepek.

²¹ Arae Ŋisirael ŋulu aboŋunete anakwap a ŋina arikoritae ikes apotu kimuja ikale ŋin ka daadaŋ ŋulu apotu kimorikinos ka ikes ŋulu apotu toŋero akiwuap ŋakiro a ŋituŋa a ŋulugelae a ŋulu eboiyete ka ikes aŋuna ka akilip neni ka Akuj a Isirael.

²² Apotu ikes kinumunuma ka alelyanu ŋasuban ŋuna a ŋamugati a ŋuna emam ŋakinyalet, kinumunuma ikes ŋasuban ŋun ŋirwa ŋikanikaarei, anerae abu Ekapolon inak ikes alelyanu ka abu kilocok etau a erwosit ka Asiriya tominak ikes ka abu erwosit ŋol kiŋarak Ŋisirael alotic a ŋolo ka akiduk Akai ka Akuj a Isirael.