Esir 5 - Ebaibul

Togeunae nabo akiduk Akai ka Akuj

¹ Apotu ŋikadwarak Agai ka Sakarya lokoku a Ido todwara alokiro ka Akuj a ŋina a Isirael neni a Ŋiburaniyae a ŋulu ayakasi Yudaya ka Yerusalem.

² Tosodo nai Serubabel lokoku a Sealtiel ka Yesua lokoku a Yosadak kisyakis akiduk nabo Akai ka Akuj alo Yerusalem, eŋarakinito ŋikadwarak a Akuj ikes alotic a ŋol.

³ Apaki ŋinapei potu Tatenai ekapolokiniton akwap ŋina Alokekwaye Aŋolol kaapei ka Sesar-Bosenai ta ŋirukitos kec neni a Ŋiburaniyae kiŋita ikes temasi, “Ŋae ikiinakini iyes apedor ŋinadukokinet Akai na ka akirikakin aduketait na?”

⁴ Kiŋita daŋ ikes ŋakiro nu temasi, “Ataŋae ŋirorwa a ŋikilyok a ŋulu edukete aduketait na?”

⁵ Nai eyoki Akuj ŋikasikou a Ŋiburaniyae, aŋun, apotu ŋikapolok a Perisia ŋulu aya nakwapin ŋun nyiretakis Ŋiburaniyae akitiya etic ŋolo alosikinito ikes mati kigirakin Darius abaruwa ka keryamun aboŋokinet a abaruwa a ŋin.

⁶ Ŋakiro ŋuna apotu Tatenai ekapolokiniton a akwap a ŋina Alokekwaye Aŋolol Eupurate ka Sesar-Bosenai ka ŋirukitos kec ta ŋikiyakia kigira neni a erwosit Darius ikes nu;

⁷ “Neni a Darius a erwosit, toyai ekisil neni kon.

⁸ Ikilipi toyenu erwosit atemar aponi isua tolotoi nakwap a Yudaya, Kai ŋina ka Akuj a ŋina etiron. Edukio Akai ŋin a ŋamoru a ŋuna icietae ka epetanakinio ŋabaoi narwatatain, itiyaete ŋituŋa etic ejok ka elosi etic kiŋaren emam akiryaŋiryaŋa.

⁹ Aponi isua kiŋitae ŋikasikou ŋulu etiyaete etic ŋolo ka akiduk ebe, ‘Ŋae ikiinakini iyes apedor akiduk Akai na ka akirikakin akiduk aduketait na?’

¹⁰ Aponi daŋ isua kiŋitae ikes ŋirorwa kec, aŋuna ka akiteyenikin iyoŋ ikotere kigirae isua ŋirorwa a ŋikarikok kec.

¹¹ Apotu ikes toboŋokis temasi, ‘Ikirae isua ŋiketiyak ŋulu ka Akuj a ŋina anakuj ka anakwap, ido edukio nabo isua Akai ŋina koloŋ adukio ŋikaru ŋulu alalak ŋulu alunyar, Akai ŋina abu erwosit a Isirael ŋolo arwon toduk kirikak.

¹² Nai aŋuna aponiata atapapaa kosi kitoŋoeta Akuj ŋina anakuj, abu iŋes inak ikes napedor a erwosit Nebukadinesar a ŋolo a Babilon, a ŋolo arae Ekalideait, ŋolo abu kinyas Akai na, ido toriko ŋituŋa Babilon.

¹³ Kikote neni daŋ, alokaru a ŋolo esyaunan ipukat erwosit Kirus ŋolo a Babilon, abu iŋes totub atemar emaikina Akai ka Akuj na todukokinae nabo.

¹⁴ Nabo daŋ, abu erwosit Kirus tolema alokai ka Akuj a ŋina alo Babilon ŋiboro ŋulu etiyaunitae a egolid ka esilipa ŋulu kebu Nebukadinesar tolema alo Kai ka Akuj a ŋina ayai Yerusalem ka abu yau kai ka akuj ŋina alo Babilon. Abu erwosit Kirus inak ŋiboro ŋul neni a ecekile a ŋolo anyaritae Sesabasar a ŋolo abu iŋes kiwuak toruwor ekapolokiton akwap a Yudaya.’

¹⁵ Abu erwosit Kirus tolimok Sesabasar tema, ‘Ya ŋiboro lu, kiwuak Kai ka Akuj alo Yerusalem, ido kimyek todukokinae nabo Akai ŋin nenipei koloŋ ayai.

¹⁶ Abu nai Sesabasar todukok akisyakinet a Akai ka Akuj alo Yerusalem, tosodi ameun akoloŋit ŋin tari tokona edukio Akai ŋin ka eriŋa nyirikakina.’

¹⁷ Ani tokona kejok aneni kon erwosit, kimyek toripiripae lokitaaboi ŋulu ka apukan ŋulu iŋadatae inaa Babilon, toanyunae keya ŋakiro ŋuna abu erwosit Kirus totub aŋuna ka Akai ka Akuj alo Yerusalem. Okoe erwosit, kiyakikinae isua ŋuna ikitalakarito iyoŋ anakiro a ŋun.”