Esir 3 - Ebaibul

Toboŋokinoe akilipenen alo Yerusalem

¹ Ani edoli elap ŋolo a ŋikanikaarei iboiyete Ŋisirael alotaunio kec, apotu ŋituŋa tocunakinos Yerusalem,

² togeut nai Yesua lokoku a Yeosadak kaapei ka ŋisacaradotin ŋuluce ka Serubabel lokoku a Sealtiel ta ŋiyeneta keŋ adukokin Namuroet ŋina ka Akuj a Isirael ikotere einanakinete ŋainakineta ŋuna epeyo alokidiama Namuroet ŋin, lopite ŋolo elimunitere alokisila a Moses a ŋolo arae ituŋanan ŋini ka Akuj.

³ Apotu ikes todukokis Namuroet nakisyakinet keŋ, tari ŋina akeritotor ikes ŋituŋa ŋulu eboiyete anakwap a ŋin. Tosodi inanakis ŋainakineta ŋuna epeyo alokidiama Namuroet ŋin, taparacu ka eboŋ.

⁴ Ericakinito ikes akitiya ŋasuban ŋuna a ŋisakaitei lopite ŋolo alimunitere, inanakis ŋainakineta ŋuna epeyo a ŋinakoloŋit alotooma ekimar ŋolo atubunitoe, lopite ŋolo amaikina kitiyare a ŋinakoloŋit.

⁵ Ekaku, inakis ŋainakineta nu ŋuna sek einanakinio: Ŋainakineta ŋuna epeyo, ŋainakineta ŋuna ke elap a ŋolokitete, ŋainakineta ŋuna sek einanakinio alorwa a ŋulu a ŋasuban a ŋuna ke Ekapolon ka ŋainakineta a ŋinituŋanan a ŋini einakini ainakinet keŋ anacamit keŋ neni ke Ekapolon.

⁶ Ameun anakoloŋit a ŋina esyaunan a elap a ŋolo a ŋikanikaarei togeut ikes ainanakin ŋainakineta ŋuna epeyo neni ke Ekapolon. Nai ariŋa nyedukokina akisyakinet a Akai ka Akuj.

⁷ Aŋun, apotu ikes inakis ŋisiliŋa neni a ŋikadukok ka neni a ŋikecak ŋabaoi, inanakis ŋamuja, ŋimaten ka ŋamyeta neni a ŋisidonianika Ŋitironi, ikotere eyaunete ŋakito ŋuna a Cedar alo Lebanon nanam tari Yopa, lopite ŋolo alimokinitor ikes erwosit Kirus ŋolo a Perisia.

Todukokinae akisyakinet a Akai ka Akuj

⁸ Alokaru a ŋolo a ŋiarei elap ŋolo a ŋiarei ameun anakoloŋit a ŋina adolunioto Ŋisirael Kai ka Akuj Yerusalem, togeikis Serubabel lokoku a Sealitiel ka Yesua lokoku a Yosadak akisyakinet a Akai ka Akuj. Etiyaete ikes kaapei ka ŋituŋa kec ŋuluce: Ŋisacaradotin, ŋilepi ka daadaŋ ŋulu aboŋunete Yerusalem anakwap a ŋina arikoritae ikes. Apotu ikes toseut ŋilepi ŋulu arae ŋikaru kec ŋatomoniarei ka adepar apolokin etic ŋolo ka akiduk Akai a Ekapolon.

⁹ Arae Yesua kaapei ka ŋidwe keŋ ŋulusapa ka ŋiyeneta keŋ ka Kadimiel ka ŋidwe keŋ ŋulusapa ka Binui ka Odapia kaapei ka ŋidwe a Enadad ŋulusapa ka ŋilepi kaapei ka ŋidwe kec ŋulusapa ta ŋiyeneta kec apolokinito ŋiketiyak ŋulu adukete Akai ka Akuj.

¹⁰ Ani edukokinete ŋikadukok akisyakinet a Akai ka Akuj, awuasi ŋisacaradotin enapito ŋilowi kec aŋuna ka akipuro Ekapolon ekusete ŋarupepe, toramete ŋilepi ŋipapae ka Asap ŋitworoi lopite ŋolo alimokinitor erwosit Daudi ŋolo a Isirael.

¹¹ Aeosi ikes eboŋonokin ipurosi ka elakara neni a Ekapolon ebasi, “Ejok Ekapolon, erae amina keŋ ŋina nyiryaŋiryaŋa ŋina a ŋikaru ka ŋikaru aneni a Ŋisirael.” Aboŋonokinete ŋituŋa ŋuluce a ecelet a ŋolo apolon, apaki ŋina epurotor ikes Ekapolon, anerae aponi todukokinae akisyakinet ŋina ka Akai ke Ekapolon.

¹² Nai ŋisacaradotin ŋulu alalak, ŋilepi, ŋikarikok a ŋatekerin ka ŋituŋa ŋulu amojoŋito ŋulu sek eŋolikinito Akai ka Akuj ŋina a ekiŋaren ewoi anakisyakinet keŋ, apotu kigworo eworoete nooi iŋolikinete Akai ŋina ariŋa edukio, tari daŋ ŋina alalakyata ŋituŋa ŋulu eworoete aŋuna ka alakara.

¹³ Aŋun, pa apedorit ituŋanan akityak ecelet ŋolo ka alakara alocelet a ŋituŋa a ŋulu egworosi, anerae acelasi ŋituŋa nooi, apedoritae akiirar tari aneni alwanan.