Esir 10 - Ebaibul

Aboŋokinet a ŋituŋa

¹ Ani eriŋa Esira ilipi elimonori ŋasecisya ŋun kigworo ecakanakin kwap alokiŋaren Akai ka Akuj, tocunun neni ayai Esira Ŋisirael ŋulu alalak nooi: Ŋikilyok, ŋaberu ka ŋidwe, apotu ŋituŋa ŋul daŋ kigworo nooi.

² Kirwor Sekania lokoku a Yeiel epei a ŋiletok ka Elam neni a Esira tema, “Ikisec iwon neni ka Akuj yok ka eitunun ŋaberu ŋunagelae aneni a ŋituŋa a ŋulu ka akwap a na, nai kikote neni daŋ eriŋa akigeno eyai Isirael.

³ Aŋun tokona, ocamunos iwon alokiŋaren Akuj yok, eritasi ŋaberu ŋun daadaŋ ka ŋidwe kec lopite ŋolo adauniata ekapolon yok ka ŋulu itopoloorito ŋakiciketa ŋuna ka Akuj yok alimokin iwon, emaikina kitiyae ŋun ikwaŋina elimunitor ekisil.

⁴ Kitiyata ŋun, anerae erae etic kus, ikiriit isua ka iyes, togogoŋioto, kitiyata ŋun.”

⁵ Abu nai Esira tonyou kisikoŋ ŋikarikok a ŋisacaradotin ka ŋilepi ta Ŋisirael daadaŋ akitiya ŋun lopite ŋolo alimunere. Apotu ikes kikoŋo.

Toŋeroi ŋaberu ŋunagelae ka ŋidwe kec

⁶ Tonyou nai Esira alokiŋaren Akai ka Akuj tolot nagule ŋina a Yeoanan a lokoku ka Eliasib neni abu iŋes toper akuwar ŋin. Nyenyama iŋes kori nyemata iŋes idiobore, anerae eyaloloŋi iŋes aŋuna ka amamukau anupit aneni a ŋituŋa a ŋulu aboŋunete anakwap a ŋina arikoritae ikes.

⁷ Aponi kiyakiyarae ŋituŋa akiserakin ŋituŋa alo Yudaya daadaŋ ka alo Yerusalem atemar emaikina ŋituŋa daadaŋ ŋulu aboŋunete anakwap a ŋina arikoritae ikes tocununos Yerusalem

⁸ ka atemar ituŋanan ŋini nyebuni Yerusalem alotooma ŋirwa ŋiuni, lopite ŋolo atubunitotor ŋikapolok ka ŋikasikou emaikina todemarae iŋes ŋiboro keŋ daadaŋ, ido nyimarakinio nabo iŋes lotuŋa ŋulu aboŋunete aneni arikoritae.

⁹ Apotu nai ŋituŋa a Yudaya daadaŋ ka ŋulu a Benjamin tocunakinos Yerusalem alotooma ŋirwa ŋiuni, arae elap ŋolo a ŋikanikaomwon, ŋirwa ke elap a ŋol ŋatomoniarei acununotor ikes Yerusalem. Kiboikinos ŋituŋa daadaŋ neni alapat alokiŋaren Akai ka Akuj, amaranete ikes aŋuna a ŋakiro a ŋuna anyaraunitere ikes ka aŋuna ka akiru a ŋina alal nooi.

¹⁰ Abu nai Esira esacaradoti tonyou tolimok ŋituŋa tema, “Iseca iyes aŋuna iituniata ŋaberu ŋunagelae, aŋun, iyatakis iyes ekaile neni a Ŋisirael.

¹¹ Tolimosi tokona asecit kus neni ke Ekapolon Akuj atapapaa kus, ido kitiyata ŋuna ecamit iŋes; totyakaros alotuŋa a ŋulu ka akwap a na ka anaberu a ŋunagelae.”

¹² Abu nai atukot daadaŋ toboŋok ka etoil a ŋolo apolon tema, “Ikote neni, emaikina isua kitiyae lopite ŋolo ilimunio iyoŋ.

¹³ Nai elalak ŋituŋa ka elal akiru nooi, nyikipedori isua akiwo anakiru, nabo daŋ nyerae etic lo ŋolo ka akoloŋit ka apei, kori a ŋirwa a ŋiarei, anerae esecitae isua ŋulu alalak anakiro a nu.

¹⁴ Kimyek ŋikapolok kosi kitiyata ŋun aŋuna ka atukot a daadaŋ, ido ŋulu daadaŋ alotaunio kosi ŋulu apotu kiitununut ŋaberu ŋunagelae, emaikina potu apaki ŋina etubunio, potu kaapei ka ŋikasikou ka ŋikatubok ŋulu a ŋolotaun, akitodol ŋina edaunor anyunyura ka Akuj aneni yok aŋuna a ŋakiro a ŋun.”

¹⁵ Yonasan lokoku ka Asael ka Yaseia lokoku a Tikipa make ikes apotu topegakis ŋakiro ŋun ka apotu Mesulam ka Sabesai ŋulu arae ŋilepi toriwo ka ikes.

¹⁶ Apotu nai Ŋisirael ŋulu aboŋunete anakwap a ŋina arikoritae kitiyata ŋun. Abu Esira esacaradoti toseu ŋikilyok ŋulu arae ŋikapolokinitok a ŋatekerin, ido aponi kigirae ŋirorwa kec. Ani edoli ŋirwa ke elap epei, elap ŋolo a ŋitomon apotu ikes kiboikinos aanyun ŋakiro; nun.

¹⁷ Ŋirwa ke elap epei, elap ŋolo ke epei kirikakis ikes aripirip ŋakiro a ŋikilyok a daadaŋ a ŋulu kepotu kiitut ŋaberu ŋunagelae.

¹⁸ Aponi toryamunae aloletok a ŋisacaradotin ŋikilyok ŋulu kepotu kiitut ŋaberu ŋunagelae. Aloletok a Yesua alokoku a Yosadak ka alokaitotoi keŋ, ŋulu ke potu kiitut ŋaberu ŋunagelae ikes lu: Maaseia, Elieser, Yarib ka Gedalia.

¹⁹ Apotu ikes kiikis akiritar ŋaberu kec, tosodi aŋuna ka ekaile kec, amaikina ikes tolemut emesek.

²⁰ Aloletok ka Imer, ŋulu kepotu kiitut ŋaberu ŋunagelae ikes lu: Anani ka Sebadia.

²¹ Aloletok ka Arim ŋulu kepotu kiitut ŋaberu ŋunagelae ikes lu: Maaseia, Elia Semaia, Yeiel ka Usia.

²² Aloletok a Pasur ŋulu kepotu kiitut ŋaberu ŋunagelae ikes lu: Elioenai, Maaseia, Isimael, Nasaniel, Yosabad ka Elasa.

²³ Aloletok a ŋilepi, ŋikilyok ŋulu kepotu kiitut ŋaberu ŋunagelae ikes lu: Yosabad, Simei, Kalaia (Iŋes Kelita) Pesaia, Yuda, ka Elieser.

²⁴ Aloletok a ŋikaeok ŋolo kebu kiitu aberu ŋinagela iŋes Eliasib. Aloletok a ŋiketeok ŋipukei ŋulu kepotu kiitut ŋaberu ŋunagelae ikes lu: Salum, Telem ka Uri.

²⁵ Aneni a Ŋisirael a ŋuluce ŋulu kepotu kiitut ŋaberu ŋunagelae ikes lu: Aloletok a Paros: Ramia, Isia, Maliciya, Miyamin, Eleasar, Asabia ka Benaia.

²⁶ Aloletok ke Elam: Matania, Sakariya, Yeiel, Abidi, Yeremos ka Elia.

²⁷ Aloletok ka Satu: Elioenae, Eliasib, Matania, Yeremos, Sabad ka Asisa.

²⁸ Aloletok a Bebai: Yeoanan, Anania, Sabai ka Asilai.

²⁹ Aloletok a Bani: Mesulam, Maluk, Adaia Yasub, Seal ka Yeremos.

³⁰ Aloletok ka Paasa-Moab: Adina, Kelai, Benaia, Maaseia, Matania, Basalel, Binui ka Manase.

³¹ Aloletok ka Arim: Elieser, Isiya, Maliciya, Semaia, Simeon,

³² Benjamin, Maluk ka Semaria.

³³ Aloletok ka Asum: Matenai, Matata, Sabad, Elipelet. Yeremai, Manase ka Simei,

³⁴ Aloletok a Bani: Maadai, Amiram, Uel,

³⁵ Benaia, Bedeia, Kelui,

³⁶ Pania, Meremos, Eliasib,

³⁷ Matania, Matenai ka Yaasu.

³⁸ Aloletok a Benui: Simei,

³⁹ Selemia, Nasan, Adaia,

⁴⁰ Makinadebai, Sasai, Sarai,

⁴¹ Asarel, Selemia, Semaria,

⁴² Salum, Amaria ka Yosepu.

⁴³ Aloletok a Nebo: Yeiel, Matisia, Sabad, Sebina, Yadai, Yoel ka Benaia.

⁴⁴ Kepotu ŋituŋa ŋul daadaŋ kiitut ŋaberu ŋunagelae, ido apotu ikes kiritasi ŋaberu ŋun ka ŋidwe daŋ.