Esir 1 - Ebaibul

Todaun apaki ŋina ka aeno alo Babilon

¹ Alokaru a ŋolo ke epei ipukat erwosit Kirus Perisia, abu Ekapolon kisiyook ŋakiro ŋuna sek alimunit iŋes aneni a ekadwaran Yeremia. Abu Ekapolon kiwuak lotau a erwosit Kirus a ŋolo a Perisia, alimun ŋakiro ŋuna aponi kigirae ka kiyakiyarae tosyomae ikeunitae ŋakiro keŋ neni a ŋituŋa a apukan keŋ a daadaŋ. Abasi ŋakiro ebe,

² “Ebala erwosit Kirus ŋolo a Perisia ebe: ‘Adau Ekapolon Akuj ŋina anakuj ainakin ayoŋ akipuka ŋakwapin daadaŋ anakwap, ido akaseu ayoŋ adukokin aŋuna keŋ Akai Yerusalem nakwap a Yudaya.

³ Tokona nai, iyes daadaŋ ŋulu irae ŋituŋa ka Akuj, elipi toyai Akuj neni kec, acamakin ŋituŋa ŋul akitipeiyor Yerusalem nakwap a Yudaya, adukokin nabo Akai ŋina ke Ekapolon a ŋolo erae Akuj a Ŋisirael, erae iŋes Akuj ŋina eyai Yerusalem.

⁴ Emaikina ŋipiya a ŋituŋa daadaŋ, anakiboisyo a daadaŋ a ŋuna iboiyoto ikes, toryamut aneni a ŋituŋa a ŋulu a akibois a ŋina iboiyoto ikes esilipa, egolid, ŋiboro ka ŋibaren pa imaritae ŋainakineta ŋuna elemunete ŋituŋa anacamit kec a ŋilopeyek aŋuna ka Akai ka Akuj alo Yerusalem.’ ”

⁵ Apotu nai ŋikarikok a ŋikalya a ŋikabilae a Yudaya ka Benjamin ka ŋisacaradotin ta ŋilepi kaapei ka ŋituŋa daadaŋ ŋulu abu etau ŋolo ka Akuj min nen kec, tonyout kitipeiyosi Yerusalem adukokin nabo Akai ke Ekapolon Yerusalem.

⁶ Apotu ŋikidunyet kec daadaŋ inanakis ikes ŋiboro ŋulu isitiyao alo Kai ka Akuj, ŋulu etiyaunitae a esilipa, inanakis ikes egolid, ŋiboro ŋulu egelegelya, ŋibaren ka ŋainakineta ŋuna epol egyelit pa imaritae ŋainakineta ŋuna ainakini ituŋanan anacamit keŋ a ilope.

⁷ Abu erwosit Kirus elope tolemu anakais a ŋakujo a papa keŋ ŋiboro ŋulukimujet ŋulu ka Akai ke Ekapolon ŋulu kebu papa keŋ Nebukadinesar yau alo Yerusalem kiwuak kai a ŋakujo keŋ.

⁸ Inak erwosit Kirus ŋolo a Perisia ŋiboro ŋul daadaŋ kinyakarae Yerusalem. Abu iŋes inak ŋiboro daadaŋ neni a Mesiredas a ŋolo arae ekeŋadan ŋisiliŋa a erwosit, a ŋolo abu kimar ŋiboro ŋul, ido inak neni a Sesibasar a ŋolo arae ekapolokiniton a ŋituŋa a ekabila a Yuda.

⁹ Arae lo ekimar a ŋiboro a ŋulu abu Kirus erwosit kipotu: Ŋabapwa ŋuna etiyaunitae a egolid ŋatomoniuni, ŋabapwa ŋuna etiyaunitae a esilipa aliput, ŋileŋia ŋatomoniarei ka ŋikanikaomwon,

¹⁰ ŋabakulei ŋuna etiyaunitae a egolid ŋatomoniuni ŋabakulei ŋace ŋuna etiyaunitae a esilipa ŋamiae ŋaomwon ka ŋitomon ŋiboro ŋice ŋulukimujet aliput.

¹¹ Ani ecunakinio ŋiboro ŋul daadaŋ, arae ekimar a ŋiboro a ŋulu etiyaunitae a egolid ke esilipa ŋalipyo ŋakan ka ŋamiae ŋaomwon. Abu Sesibasar ya ŋiboro ŋul daadaŋ Yerusalem apaki ŋina etoboŋunere Yerusalem Ŋisirael ŋulu sek arikoritae Babilon.