Esek. 9 - Ebaibul

Aaryo a ŋulu elipete neni a ŋakujo

¹ Abu Akuj okonyar ayoŋ a etoil a ŋolo acela nooi tema, “Toapuutu laalo iyes ŋikilyok ŋulu elosete akisican etaun, emaikina ŋolokile eyakar ibore ŋini inyasunia etaun.”

² Apotu nai ŋikilyok ŋikanikapei potu alowae a ŋolo a epuke a ŋolo ayai neni amukur alowae a ŋolo alo Kuju Akai ka Akuj. Ayakar ŋolokile ibore ŋiniaaret, arukito ŋikilyok ŋul ka ekile ŋolo anapit ŋilowi ŋulu amilimilak, toyakar nawae keŋ ibore ŋini aya ŋiboro ŋulukigiret. Apotu ikes tolomasi tooma towua alodiyete namuroet ŋina etiyaunitae ke eburonis.

³ Apaki ŋin, aris akica ŋina ka ayakau a Akuj a Ŋisirael kelot kidiama ŋisubuna ŋulu a ŋabebenuk neni sek ayai, aris kelot lopuke ŋolo ka Akai ka Akuj. Abu nai Ekapolon tonyara ekile ŋolo anapit ŋilowi ŋulu amilimilak toyakar nawae keŋ ibore ŋini aya ŋiboro ŋulukigiret;

⁴ tema neni keŋ, “Ape kirimok Yerusalem daadaŋ, kiwuanak emacar loreetin a ŋituŋa a ŋulu iyaloloŋete ka ŋulu igworosi aŋuna ka asiilyo a daadaŋ a ŋina itiyao alo Yerusalem.”

⁵ Abu iŋes tolimok ŋirukitos a ekile a ŋol apupi ayoŋ tema, “Totupakisi iŋes kirimokis etaun daadaŋ toara ŋituŋa, nyimyekis ituŋanan daadaŋ ŋini iŋolikinete iyes, kori nyikisyon ituŋanan idio.

⁶ Toara ŋikasikou, ŋisorok, ŋasorok ka ŋidwe ta ŋakimak, nai nyiar ituŋanan daadaŋ ŋini eyakar emacar loreet keŋ. Kisyakisi akiar anakibois kaŋ a ŋina asegan.” Aŋun, apotu ŋikilyok ŋul kisyakis akiar, alokasikou a ŋulu eboiyete alokiŋaren Akai ka Akuj.

⁷ Tema Akuj neni kec, “Kinyasutu Akai ka Akuj, kilelebikisi ŋawat a ŋituŋa a ŋulu iar iyes nalapatui ŋuna ka Akai ka Akuj. Kionyakisi akitiya ŋun!” Aŋun, apotu ŋikilyok ŋul tolomasi lotaun daadaŋ kisyakis akiar ŋituŋa.

⁸ Apaki ŋina aaryata ŋikilyok ŋul ŋituŋa, ayai ayoŋ neni kaŋ bon, abu ayoŋ oper alokwap obuburiyar, ekalou otema, “Okoe Ekapolon Akuj! Imunyari kire iyoŋ ŋipiya a Ŋisirael daadaŋ ananyunyura kon a ŋina iyau iyoŋ lotuŋa a Yerusalem a?”

⁹ Abu Akuj okoboŋok ayoŋ tema, “Epol nooi asecit ŋina itiyato ŋituŋa a Isirael ka ŋulu a Yudaya, elal nooi akiar ŋituŋa anakwapin kec ka elal nooi akitiya ŋuna nyiyookino alo Yerusalem, anerae ebasi ikes, ‘Nyeriŋa Ekapolon emitakinit akwap yok, nyeriŋa Ekapolon ite ŋuna ikitiyae iwon.’

¹⁰ Aŋun, nyeŋolikini ayoŋ ikes oesik, kori nyesyoni ayoŋ ikes, nai etiyae ayoŋ neni kec ŋuna adaut ikes akitiya neni a ŋuluce.”

¹¹ Abu nai ekile ŋolo anapit ŋilowi ŋulu amilimilak toyakar nawae keŋ ibore ŋini aya ŋiboro ŋulukigiret ya ŋakiro neni ka Akuj tema, “Adau ayoŋ akitiya lopite ŋolo ikicikitor iyoŋ ayoŋ.”