Esek. 5 - Ebaibul

Arem ŋina eyakaun Yerusalem

¹ Tema Ekapolon neni kaŋ, “Iyoŋ lokoku a ituŋanan, tolemu ekileŋ ŋolo akwanan kisitiya ikwa eombe, tobanyunia akou kon ka epenek kon. Ani irikakini, tolemu ŋakipimet, kipim ŋitim kon eriyan.

² Ani edaun ŋirwa ŋulu irikaunitere Yerusalem, emaikina kicuny alotooma etaun ŋitim ŋul atutubet apei alotooma ŋauni. Tolemu nabo atutubet ŋina a ŋaarei totubutubu a ekileŋ irimi alokiŋa etaun. Tosodi atutubet ŋina a ŋauni, emaikina kiela lokuwuam etutupak ayoŋ ikes ekileŋ kaŋ.

³ Nai tolemu ŋitim ŋul ŋidi kimiidyanak nawaetin a ekaaso kon.

⁴ Alotim a ŋulukudyo a ŋul, tolemu ŋidi kimasak nakim tonyamuwa, itoodiuni akim kec atemar isyakini amunyaro a nen, ido kiniepa Losirael daadaŋ.”

⁵ Ŋakiro ŋuna irworo Ekapolon Akuj ikes nu, “Kiŋolikisi mono iyes Yerusalem. Adau ayoŋ asekin iŋes kidiŋ ŋakwapin, eya ŋakwapin ŋunace nawaetin keŋ daadaŋ.

⁶ Nai aŋero ŋituŋa keŋ akiwuap ŋuna atubunit ayoŋ ka aŋero akiwuap Ŋikisila kaŋ, aruwor ikes ŋulu eroko nooi akilo ŋulu a ŋakwapin a ŋunace, aŋero ikes akiwuap ayoŋ, aroketa ikes akilo tari ŋulu a ŋakwapin a ŋuna eya nawaetin kec, aŋero ikes ŋuna atubunit ayoŋ, awout akiwuap Ŋikisila kaŋ.

⁷ Aŋuna aruworotor ŋituŋa a Yerusalem ŋulu ipegeiyoro akilo ŋulu a ŋakwapin a daadaŋ a ŋuna eya nawaetin kec, ido nyiwuapa ikes Ŋikisila kaŋ ka nyitiya ŋuna atubunit ayoŋ, nai etiyata ŋuna etubunito ŋituŋa a ŋakwapin a daadaŋ aŋuna eya nawaetin kec,

⁸ ayoŋ Ekapolon Akuj erworo neni kec tokona atemar ekemani ayoŋ iyes. Ekesicani ayoŋ iyes iteete ŋituŋa a ŋakwapin a ŋunace.

⁹ Aŋuna ka asiilyo a daadaŋ a ŋina itiyaete iyes, etiyae ayoŋ neni kus ŋuna nyetiyakina ŋinapei, ido nyetiyakini nabo ayoŋ ŋuna ikote ŋun.

¹⁰ Kire jik, enyamete ŋikauruunak ŋidwe kec alokidiŋ kus ka enyamete ŋidwe ŋikauruunak kec; ekesicani ayoŋ iyes ka eelari ŋipiya kus iwace.

¹¹ Aŋun, ikwapei araakar ayoŋ Akuj ŋina ayari, aŋuna itisiliyaniata iyes Akai kaŋ a aronis a daadaŋ ka asiilyo kus daadaŋ, ajoŋoe ayoŋ amina iyes, nyekeŋolikini ayoŋ iyes, ido ekesyon, kori okoesik akisican.

¹² Atutubet kus apei alotooma ŋauni, emunyari edeke, kori emunyari eron alokidiŋ kus; atutubet ŋina a ŋaarei alotooma ŋauni, earakinio kiŋa ŋarwatatain a etaun kus ka atutubet ŋina a ŋauni alotooma ŋauni, eelari ayoŋ nariet, ido etutupak ikes ekileŋ kaŋ.

¹³ “Apaki nai ŋin edaunor aŋoikinit kaŋ ikes ka iŋes editeunia anyunyura kaŋ aneni kec, iŋes ayenunia ayoŋ atemar etiyakin ŋuna acamit ayoŋ akitiyakin. Ekaku ketoodik ayoŋ ikes alilit kaŋ, eyenunete ikes atemar ayoŋ Ekapolon abu erworor ŋakiro ŋun alelakinit.

¹⁴ Nabo daŋ eturuwori ayoŋ etaun kus ereŋorot, ibore koŋin ŋini ejamuwarito ŋakwapin daadaŋ ŋuna eya nawaetin keŋ ka daadaŋ ŋulu itorunete diyete keŋ.

¹⁵ Apaki ŋina akaŋoikinia ka akaryenyanikinia ayoŋ iyes, eketuruwo akitocoikinet a ŋuluce, ebuli ŋakwapin daadaŋ ŋuna idunyatar iyes. Ikiŋolikinete ikes iyes ikimenito ka ikijamuwarito.

¹⁶ Etoŋopiyari ayoŋ akimuj alo Yerusalem emyek ŋituŋa keŋ tonyam akoro. Ikipipilikinete iyes ŋakiro ŋuna ka aŋoit kaŋ lopite ŋolo epipilyata ŋikaleŋeleŋe ŋulu egumunitae amunyar ŋituŋa kus.

¹⁷ Eyakuuni ayoŋ neni kus eron ka ŋityaŋ ŋulu ka ariet ŋulu anyamak, ikimyekis iyes emam ŋidwe, eyakuuni ayoŋ neni kus edeke, aryenyeo ka ejie itomunyasi. Ayoŋ Ekapolon alimu ŋakiro ŋun.”