Esek. 48 - Ebaibul

Ŋakwapin ŋuna aponi tokorakinae ŋikabilae a Isirael

¹ Akisyakin alokukoru a ŋolo alo Kuju, tomyaa lorot ŋolo a Esibon ka akisyakin alo Leboamas tomyaa tari Asarenon (akwap ŋina eyai kidiŋ akwap ŋina a Damasko ka akwap ŋina ka Amas alowae a ŋolo alo Kuju), tomyaa alowae a ŋolo alo Kide lowae ŋolo alo To, eruwor nen akwap ŋina a ekabila a Dan.

² Akisyakin anakwap a ekabila a Dan, alowae a ŋolo alo Kide tomyaa lowae ŋolo alo To, eruwor nen akwap a ekabila ka Aser.

³ Akisyakin anakwap a ekabila ka Aser, alowae a ŋolo alo Kide, tomyaa lowae ŋolo alo To, eruwor nen akwap a ekabila a Naputali.

⁴ Akisyakin anakwap a ekabila a Naputali, alowae a ŋolo alo Kide, tomyaa lowae ŋolo alo To, eruwor nen akwap a ekabila a Manase.

⁵ Akisyakin anakwap a ekabila a Manase, alowae a ŋolo alo Kide, tomyaa lowae ŋolo alo To, eruwor nen akwap a ekabila a Epuraim.

⁶ Akisyakin anakwap a ekabila a Epuraim, alowae a ŋolo alo Kide, tomyaa lowae ŋolo alo To, eruwor nen akwap a ekabila a Ruben.

⁷ Akisyakin anakwap a ekabila a Ruben. alowae a ŋolo alo Kide, tomyaa lowae ŋolo alo To, eruwor nen akwap a ekabila a Yuda.

⁸ Akisyakin anakwap a ekabila a Yuda, alowae a ŋolo alo Kide, tomyaa lowae ŋolo alo To, eruwor nen akwap ŋina emaikina totyakasi, nyiinakis ekabila edio, emaikina aoyau keŋ anakou ka neni iteotor erae ŋakilomitae ŋatomon ka ŋaarei ka atutubet, toriyan aoyau keŋ alosepyon ka ŋina a ŋakwapin a ŋikabilae a ŋuluce, akisyakin alo Kide, tomyaa lowae ŋolo alo To. Emaikina Akai ka Akuj eyai kidiŋ akwap ŋin.

⁹ Emaikina akibois ŋina ityakakinete iyes Ekapolon erae aoyau alosepyon ŋakilomitae ŋatomon ka ŋaarei ka atutubet, torae aoyau anakou ka neni iteotor ŋakilomitae ŋatomon.

¹⁰ Epite lo iŋes emaikina totyakatyakaere akwap ŋin ŋina einakinitae neni a Ekapolon: Emaikina ŋisacaradotin toryamut akibois a nen ŋina erae aoyau alowae a ŋolo alo Kuju ŋakilomitae ŋatomon ka ŋaarei ka atutubet, torae auruwuanut alowae a ŋolo alo To ŋakilomitae ŋakan ka torae auruwuanut alowae a ŋolo alo Kide daŋ ŋakilomitae ŋakan, ido torae aoyau alosyep a ŋolo alo Kwap ŋakilomitae ŋatomon ka ŋaarei ka atutubet. Emaikina akibois ŋina asegan eyai kidiŋ nen.

¹¹ Emaikina akibois ŋin erae ŋina a ŋisacaradotin a ŋulu italeunitoe, a ŋulu erae ŋiletok a Sadok a ŋulu apotu eketiyanakis ayoŋ anakikinyoma ka apotu nyimorikin ka Ŋisirael ŋuluce akitiya ŋuna nyiyookino, lopite ŋolo aponiata ŋituŋa a ekabila a Lepi ŋuluce kitiyaata.

¹² Eruwor akibois ŋin ŋina kec, ŋina einakinitae ikes anakibois a ŋina asegan, a ŋina ibakasi ka ŋina a ŋilepi.

¹³ Emaikina ŋilepi daŋ toryamut akibois alodiyete akibois a ŋisacaradotin, alowae a ŋolo alo Kwap. Emaikina akibois kec daŋ erae aoyau alosepyon ŋakilomitae ŋatomon ka ŋaarei ka atutubet, torae aoyau anakou ka neni iteotor ŋakilomitae ŋakan.

¹⁴ Nyemaikina ikes togyelasi, kori kilocosi iwadio anakibois a ŋin; nyemaikina kipotosi akibois ŋina eseunitae anakwap ŋin, anerae erae ŋina asegan ka erae ŋina a Ekapolon.

¹⁵ Nenice neni idoŋi erae ŋakilomitae ŋaarei ka atutubet anakou ka neni iteotor, torae alosepyon ŋakilomitae ŋatomon ka ŋaarei ka atutubet, emaikina eruwor neni isitiyaete ŋituŋa a etaun a ŋuna a ŋaduketa ka ŋalapatui ŋuna iboiyoto ikes. Emaikina etaun min kidiŋ akibois ŋin,

¹⁶ ido eruwor epite ŋolo ipimitere etaun iŋes lo: Emaikina ewae ŋolo alo Kuju erae ŋimitae ŋalipyo ŋaarei ka ŋamiae ŋaarei ka ŋatomonikan, ewae ŋolo alo Kwap erae ŋimitae ŋalipyo ŋaarei ka ŋamiae ŋaarei ka ŋatomonikan ewae ŋolo alo Kide erae ŋimitae ŋalipyo ŋaarei ka ŋamiae ŋaarei ka ŋatomonikan ka ewae ŋolo alo To erae ŋimitae ŋalipyo ŋaarei ka ŋamiae ŋaarei ka ŋatomonikan.

¹⁷ Emaikina eyai neni emam ŋaduketa anawae etaun, alowae a ŋolo alo Kuju, emaikina nen erae ŋimitae amiat ka ŋatomoniarei ka ŋikan alowae ke epei tari ŋoloce ka alowae a ŋolo alo To, emaikina nen erae ŋimitae amiat ka ŋatomoniarei ka ŋikan alowae ke epei tari ŋoloce.

¹⁸ Nenice neni ideuna anaoyau a akibois a ŋina asegan, emaikina erae ŋakilomitae ŋakan emyaarit Kide ka ŋakilomitae ŋakan emyaarit To. Emaikina nen ibakiyarito ka akibois ŋina asegan. Akimuj ŋina elomuni a nen, emaikina erae ŋina a ŋituŋa a ŋulu itiyaete lotaun.

¹⁹ Emaikina ŋiketiyak a etaun daadaŋ ŋulu a ŋikabilae a Isirael kitata akibois ŋin.

²⁰ Emaikina akibois ŋina ityakarete iyes ŋin erae ŋina eriyan ŋiwaetin ŋuluomwon daadaŋ torae ŋakilomitae ŋatomon ka ŋaarei ka atutubet imarakinitae tari akibois ŋina asegan kaapei ka ŋina a etaun.

²¹ Neni daadaŋ idoŋi anakibois a ŋina asegan ka anakibois a ŋina erae ŋina a etaun, emaikina eruwor neni a ekepukan. Isyakini nen aneni eraakar akibois ŋina asegan ŋakilomitae ŋatomon ka ŋaarei ka atutubet tari lokukoru ŋolo alo Kide ka emaikina erae ŋakilomitae ŋatomon ka ŋaarei ka atutubet alowae a ŋolo alo To tari lokukoru ŋolo alo To. Emaikina nen ibakarito anaoyau ka ŋakiboisyo ŋuna ekoranakinitae ŋikabilae a Isirael ka emaikina nen erae neni a ekepukan. Emaikina akibois ŋina asegan ka Akai ka Akuj eyakasi kidiŋ akibois ŋin.

²² Emaikina akibois a ŋilepi ka ŋina a etaun eyakasi kidiŋ ŋina a ekepukan. Emaikina akibois a ekepukan eyai kidiŋ ŋina a ekabila a Yuda ka ŋina a ekabila a Benjamin.

²³ Epite lo iŋes emaikina ŋikabilae ŋuluce toryamuniata ŋakwapin ŋuna eruwor ŋuna kec: Akisyakin alo Kide ŋakiboisyo ŋuna sek atyakar ŋun, tomyaa lowae ŋolo alo To eruwor nen akwap a Benjamin.

²⁴ Akisyakin anakwap a ekabila a Benjamin, alowae a ŋolo alo Kide, tomyaa lowae ŋolo alo To, eruwor nen akwap a ekabila a Simeon.

²⁵ Akisyakin anakwap a ekabila a Simeon, alowae a ŋolo alo Kide, tomyaa lowae ŋolo alo To, eruwor nen akwap a ekabila a Isakar.

²⁶ Akisyakin anakwap a ekabila a Isakar, alowae a ŋolo alo Kide, tomyaa lowae ŋolo alo To, eruwor nen akwap a ekabila a Sebulon.

²⁷ Akisyakin anakwap a ekabila a Sebulon, alowae a ŋolo alo Kide, tomyaa lowae ŋolo alo To, eruwor nen akwap a ekabila a Gad,

²⁸ ka akisyakin anakwap a ekabila a Gad, alowae a ŋolo alo Kwap, isyakini ekukoru alo Tamar, toremokin nakipi ŋuna a Meribas-Kades, kinapakin a nen ayonae ŋina a Ijipit, kisalak Nanam Mediteranian.

²⁹ Akwap ŋin iŋes emaikina iyes tokora toruwor ŋina aŋikabilae a Isirael ka epite ŋol emaikina iyes tokoryata iŋes. Ayoŋ Ekapolon Akuj alimu ŋun.

³⁰ Emaikina lu eruwor ŋipukei ŋulu a etaun Yerusalem: Ewae ŋolo alo Kuju, ŋolo emaikina erae aoyau ka arwatata ameun alowae ke epei tari ŋoloce ŋimitae ŋalipyo ŋaarei ka ŋamiae ŋaarei ka ŋatomonikan,

³¹ emaikina eya nen ŋipukei ŋiuni, ŋulu elimonokinitae ŋirorwa a ŋikabilae a Isirael. Ŋolo esyaunan epuke a Ruben, ŋolo a ŋiarei epuke a Yuda ka ŋolo a ŋiuni epuke a Lepi.

³² Ewae ŋolo alo Kide, ŋolo emaikina erae aoyau ka arwatata ameun alowae ke epei tari ŋoloce ŋimitae ŋalipyo ŋaarei ka ŋamiae ŋaarei ka ŋatomonikan, emaikina eya nen ŋipukei ŋiuni ŋulu elimonokinitae ŋirorwa a ŋikabilae a Isirael. Ŋolo esyaunan epuke a Yosepu, ŋolo a ŋiarei epuke a Benjamin ka ŋolo a ŋiuni epuke a Dan.

³³ Ewae ŋolo alo Kwap, ŋolo emaikina erae aoyau ka arwatata ameun alowae ke epei tari ŋoloce ŋimitae ŋalipyo ŋaarei ka ŋamiae ŋaarei ka ŋatomonikan, emaikina eya nen ŋipukei ŋiuni ŋulu elimonokinitae ŋirorwa a ŋikabilae a Isirael. Ŋolo esyaunan epuke ŋolo a Simeon, ŋolo a ŋiarei epuke ŋolo a Isakar ka ŋolo a ŋiuni epuke a Sebulon.

³⁴ Ewae ŋolo alo To, ŋolo emaikina erae aoyau ka arwatata ameun alowae ke epei tari ŋoloce ŋimitae ŋalipyo ŋaarei ka ŋamiae ŋaarei ka ŋatomonikan, emaikina eya nen ŋipukei ŋiuni ŋulu elimonokinitae ŋirorwa a ŋikabilae a Isirael. ŋolo esyaunan epuke a Gad, ŋolo a ŋiarei epuke ka Aser ka ŋolo a ŋiuni epuke a Naputali.

³⁵ Emaikina alolomu a etaun irimokini cib erae ŋimitae ŋalipyo ŋakanikaomwon. Akisyakin apaki ŋin, enyarao ekiro a etaun ebe, “Eyai Ekapolon nen.”