Esek. 45 - Ebaibul

Akwap ŋina abu toruwor ŋina asegan

¹ “Ani ikorakini iyoŋ Ŋisirael akwap ŋina eruwor ŋina a ŋolokabila, emaikina iyoŋ totyaka nawae aŋuna a Ekapolon akwap ŋina erae aoyau keŋ ŋakilomitae ŋatomon ka ŋaarei ta atutubet, torae auruwuanut ŋakilomitae ŋatomon. Emaikina akwap ŋin daadaŋ erae ŋina eseg.

² Tooma akwap ŋin, emaikina eyai akibois ŋina ipimim eriyan ŋiwaetin ŋuluomwon daadaŋ erae ŋimitae ŋamiae ŋaarei ka ŋatomonikan, nakibois ŋin iŋes edukokinio Akai ka Akuj, emaikina eyai kiŋa akibois ŋin neni elapat neni erae alolomu ŋimitae ŋatomoniarei ka ŋikan.

³ Alotooma akibois ŋina asegan ŋin, emaikina totyakae alokidiŋ eriyan, kipimunae atutubet apei erae aoyau alosepyon ŋakilomitae ŋatomon ka ŋaarei ka atutubet, torae ewae ŋolo euruwuana ŋakilomitae ŋakan. Eruwor nen edukokinio Akai ka Akuj ka eruwor akibois ŋin ŋina eseg akilo ŋakiboisyo daadaŋ.

⁴ Eruwor nen akibois ŋina eseg anakwap a Ŋisirael ka eruwor akibois a ŋisacaradotin a ŋulu itiyaete etic a Ekapolon anakibois keŋ a ŋina asegan, a ŋulu eapiyanarete kiŋaren Ekapolon akitiyanakin iŋes. Eruwor nen neni edukio ŋakais a ŋisacaradotin ka akibois ŋina asegan.

⁵ Emaikina atutubet ŋinace erae ŋina a ŋilepi a ŋulu itiyaete etic alo Kai ka Akuj. Emaikina todukoe ŋitaunio ŋulu iboiyoto ikes nen.

⁶ “Kipimakisi akibois ace diyete ŋina asegan, kipima aoyau keŋ alosepyon erae ŋakilomitae ŋatomon ka ŋaarei ta atutubet, torae aoyau alowaetin a ŋulu euruwuaka ŋakilomitae ŋaarei ka atutubet, emaikina totyakarae akibois ŋin aŋuna ke etaun a ŋolo epedorete Ŋisirael daadaŋ ŋulu ecamito akiboiyo.

⁷ “Emaikina daŋ totyakakinae akibois neni a ekepukan. Emaikina ŋun totyakunae ameun alokukoru a ŋolo alo To akibois ŋina asegan tomyaa To Nanam Mediteranian ka alokukoru a ŋolo alo Kide akibois ŋina asegan, emaikina akibois ŋin tomyaa tari lokukor ŋolo ka akwap a Ŋisirael alowae a ŋolo alo Kide. Iriyanikin akibois ŋin eoya ka ŋina einakinitae lokabilae a Isirael.

⁸ Eruwor akibois ŋin alo Isirael ŋina a ekepukan, ikotere emam alokepukak ŋini edemi ŋituŋa kaŋ ŋakiboisyo, nai torae ŋulu imyekinito akwap a Isirael erae ŋina a ŋikabilae a Isirael.

⁹ “Alimu Ekapolon Akuj atemar, okoe ŋikepukak a Isirael, itiyata iyes akisec ŋinapei paaran, toesikisi aryenyeo ka akisicanit ŋuluce, kitiyata ŋuna ajokak ka ŋuna iyookino, tojoŋoto akirisit ŋituŋa kaŋ anakwap kec, ayoŋ Ekapolon Akuj akalimokinit iyes.”

Ŋiboro ŋulu ipimere apotis kori aoyau kori ibore ŋini aliwan

¹⁰ “Emaikina iyes iyakatar ŋiboro ŋulu ipimere apotis ŋulu iyookino ka ŋulu ipimere aoyau ŋulu iyookino ta ŋulu ipimere ibore ŋini aliwan ŋulu iyookino.

¹¹ Emaikina eriyan ŋiboorei ŋulu ipimere ibore ŋini aonon ka ŋulu ipimere ibore ŋini ecamunito ŋituŋa daadaŋ akipimya. Ŋakipimeta ikes nu: Omer epei, erae Epa ŋitomon ka Epa ŋitomon, erae Bas ŋitomon.

¹² Emaikina ŋiboorei ŋulu ipimeta iyes apotis erae ikes lu: Ŋigeras ŋatomoniarei, erae ecekel epei, Ŋicekelia ŋatomonikanikapei, erae Emina epei.”

Ŋainakineta

¹³ “Ŋainakineta ŋuna emaikina iyes iyaut ikes nu: Ŋaganoi emaikina erae atutubet apei alotooma ŋatomon alotyae a ŋolo ilemunito iyes. Ŋikinyom ŋulu ikote erau, emaikina erae atutubet apei alotooma ŋitomon a lotyae a ŋolo ilemunito iyes.

¹⁴ Akimyet ŋina a ŋikito a Olipa, emaikina erae atutubet apei alotooma amiat a ŋina icuut iyes anaraito a ŋikito kus. (Kipima akimyet ŋin a ibore a ŋini ipimere ibore ŋini aliwan, Ŋibas ŋitomon, erae Omer epei, kori Ekor epei)

¹⁵ Amesek apei alotooma ŋamesekin ŋamiae ŋaarei a ŋinadakari a Ŋisirael. Emaikina iyes yaut ŋainakineta a ŋuna a ŋikinyom ka a ŋuna a ŋibaren, toruwor ikes ŋainakineta ŋuna epeyo ka ŋuna ekisil, ikotere ikimookunere iyes anasecit kus.

¹⁶ Emaikina ŋituŋa daadaŋ anakwap a Isirael yaut kaapei ka ekepukan ŋainakineta.

¹⁷ Nai erae etic a ekepukan alemunun ŋainakineta a ŋibaren ŋuna epeyo, ŋainakineta ŋuna a ŋikinyom, ŋainakineta ŋuna a ŋimaten. Emaikina iŋes kitiya ŋun a ŋuna a ŋituŋa a akwap keŋ apaki ŋina a ŋasuban a elap a ŋolokitete, a ŋasuban a Sabato ka anasuban a ŋunace daŋ. Emaikina iŋes yau ŋainakineta aŋuna ka asecit, ŋainakineta ŋuna epeyo ka ŋuna a ekisil aŋuna ka amookunia ŋituŋa alo Isirael.”

Ŋasuban ŋuna emaikina kitiyaetei

¹⁸ “Alimu Ekapolon Akuj atemar ani edoli elap ŋolo ke epei, ŋirwa a elap epei, emaikina iyes tolemut emoŋ ŋolosorokit ŋolo emam neni eŋwalit, kitaleunioto akibois ŋina asegan.

¹⁹ Emaikina esacaradoti tolemu ŋaokot ŋadi ŋuna ka ainakinet aŋuna ka asecit, kiosak nakito a epuke a Akai ka Akuj ka lokoonae ŋuluomwon anamuroet ŋulu alokidiama ta nakito ŋuna a ŋipukei a alapatu a ŋina alotooma.

²⁰ Emaikina iyes kitiya ŋunapei ŋun edoli ŋirwa a elap ŋikanikaarei aŋuna a ituŋanan a daadaŋ a ŋini eseci pa iredakinit, kori pa sek eyeni; emaikina iyes tomookut Akai ka Akuj.

²¹ “Ani edoli elap ŋolo ke epei, ŋirwa a elap ŋitomon ka ŋiomwon, emaikina iyes kinumunuma ŋasuban ŋuna a Paska, tonyama ŋamugati ŋuna emam ŋakinyalet ŋirwa ŋikanikaarei.

²² Akoloŋit ŋin, emaikina ekepukan tolemu aŋuna keŋ ka aŋuna a ŋituŋa a daadaŋ emoŋ ŋolosorokit ŋolo erae ainakinet aŋuna ka asecit.

²³ Alotooma ŋirwa ŋikanikaarei ŋulu a ŋasuban, emaikina ekepukan tolemu aŋuna a Ekapolon ŋimoŋin ŋulusorok ŋikanikaarei ka ŋimeesekin ŋikanikaarei ŋulu nyeŋwalito erae ŋainakineta ŋuna epeyo. Emaikina iŋes kitiya ŋun a ŋinakoloŋit alotooma ŋirwa ŋulukanikaarei ŋul ka emaikina iŋes tolemu ekoroe a ŋinakoloŋit erae ainakinet aŋuna ka asecit.

²⁴ Emaikina iŋes tolemu ainakinet ŋina aŋikinyom apeikilo aŋuna ke emoŋ a epei, apeikilo a ŋuna a emesek a epei ka ŋilitae ŋiomwon ŋulu ka akimyet aŋuna ka akilo ka apei a ŋina a ŋikinyom.

²⁵ Ani edoli elap ŋolo a ŋikanikaarei, ŋirwa a elap ŋitomon ka ŋikan ka alotooma ŋirwa ŋulukanikaarei ŋulu a ŋasuban ŋul, emaikina ekepukan tolemu ŋamuja ŋunapei ŋun aŋuna a ŋainakineta aŋuna ka asecit, aŋuna epeyo ka aŋuna a ŋikinyom ta ŋuna ka akimyet.”