Esek. 43 - Ebaibul

Toboŋu akica a Ekapolon Kai ka Akuj

¹ Abu ekile ŋol okoya ayoŋ lopuke ŋolo eŋoliyarit lowae ŋolo alo Kide,

² eŋolik ayoŋ a nen akica ŋina ka Akuj a Isirael ebunit alo Kide. Ekwaan eruye keŋ ka ŋolo a ŋakipi a ŋuna alalak a ŋuna ipumasi, abu akica ŋina ka Akuj kinwak akwap.

³ Akitoodikinet ŋina abu ayoŋ eŋolik ŋin, ekwaan ka ŋina sek abu ayoŋ eŋolik apaki ŋina abunio Akuj amunaar etaun ka ekwaan ka ŋina eŋolikinit sek ayoŋ alodiyete aŋolol Kebar; abu ayoŋ oramakin kwap obuburiyar.

⁴ Ani elomari akica ŋina a Ekapolon Kai ka Akuj alopuke a ŋolo eŋoliyarit lowae ŋolo alo Kide,

⁵ abu etau ekekyaa ayoŋ kidiama, okoya ayoŋ nalapatu ŋina alotooma Akai ka Akuj, abu nai akica ŋina a Ekapolon kilelebun Kai ka Akuj.

⁶ Ani eriŋa ekile ŋol ewoi alodiyete kaŋ, abu ayoŋ eiira ituŋanan ice irworo neni kaŋ alotooma Akai ka Akuj.

⁷ Abala ituŋanan ŋin neni kaŋ, “Lokoku a ituŋanan, erae na akibois ŋina eyai ekicoloŋ ŋolo ka apolou kaŋ ka neni ewuakinit ayoŋ ŋakejen kaŋ. Erae ne neni eboikin ayoŋ oruko ka Ŋisirael ŋikaru ka ŋikaru. Nyemunaarete nabo Ŋisirael ekiro kaŋ ŋolo asegan, nyitiyakinete ikes, kori ŋirwosi kec ŋun anakilip neni a ŋakujo a ŋace, kori anakinuk ŋawat a ŋirwosi kec nakibois na.

⁸ Apaki ŋina aponiata ŋirwosi a Ŋisirael toduko ŋipukei kec diyete ŋulu kaŋ ka kiwuanakis ŋakito ŋuna anawae ka ŋuna alokidiama ŋipukei diyete ŋuna kaŋ, toruwor arwatata bon eyai kidiŋ kaŋ ka ikes, apotu ikes apaki ŋin tomunaasi ekiro kaŋ ŋolo asegan anakitiya asiilyo. Aŋun, abu ayoŋ anaŋoit kaŋ omunya ikes.

⁹ Emaikina ikes tokona toesikis akilip neni a ŋakujo a ŋace ka kiteekasi anakibois kaŋ ŋawat a ŋirwosi kec, nen nai apedorya ayoŋ akiboikin neni a Ŋisirael ŋikaru ka ŋikaru.”

¹⁰ Torubak Ekapolon irworo ebala, “Lokoku a ituŋanan, tolimok Ŋisirael ŋakiro a Akai ka Akuj, kimyek ikes kitama ka kipima. Kisirum ikes ŋileec anakiro a ŋuna ka asecit a ŋuna itiyaete ikes.

¹¹ Ekaku kiruma ikes ŋileec anakiro a daadaŋ a ŋuna etiyata ikes, emaikina iyoŋ kiteyenik ikes epite ŋolo itamitere Akai ka Akuj, ibore ŋini emaikina todukokinae nen, ŋirotin ŋulu emaikina eya nen, ŋipukei ŋulu emaikina eya nen ka ibore daadaŋ ŋini emaikina eyai enen; kiteyenik ikes ŋakiro daadaŋ ŋuna adau Akuj atubun aŋuna a Akai a ŋin kaapei ka ŋikisila ŋulu iwuapitae a nen. Kigir ŋakiro ŋun daadaŋ alokiŋaren kec, ikotere ikes eruwor ŋulu iwuapete epite ŋolo itamitere Akai ŋin ka ŋulu iwuapete ŋakiro daadaŋ ŋuna adau Akuj atubun aŋuna a Akai a ŋin.

¹² Erae lo ekisil ŋolo ka Akai ka Akuj, kidiama daadaŋ neni edukokinitae Akai ka Akuj alokamukumukut, eruwor akibois ŋina italeunitoe, ŋina asegan.”

namuroet

¹³ “Arae lo epite ŋolo epimitere namuroet isitiyatae akipimet ŋina sek epimere Akai ka Akuj. Ayai nakisyakinet a namuroet neni arae akitelosit ŋina elelyaa ibore ŋini aliwan, arae acukul keŋ ŋisentimitae ŋatomonikan ka arae alolomu keŋ ŋisentimitae ŋatomonikan, toyai akituk ŋina arae ŋisentimitae ŋatomonikan ka ŋikan. Emaikina namuroet ŋin erae aoyau keŋ na:

¹⁴ Akisyakin alokwap aneni ewuar iŋes tari lokeli keŋ ŋolo eapi alokwap, emaikina erae emita ka adapalu keŋ erae ŋisentimitae ŋatomonikan. Akisyakin alokeli a ŋolo aapi alokwap tari lokeli ŋolo aoya alokwap, arae ŋimitae ŋiarei ka adapalu keŋ arae ŋisentimitae ŋatomonikan.

¹⁵ Akisyakin alokwap tari nenidapal a namuroet, arae ŋimitae ŋiarei, ayakasi nenidapal a namuroet ŋiboorei ŋulu asibito ŋamomwar.

¹⁶ Eriyan ŋiwaetin ŋuluomwon daadaŋ ŋulu alokwap aneni dapal a namuroet, arae ŋimitae ŋikanikapei a ŋolowae.

¹⁷ Alokidiama daŋ anenidapal, eriyan ŋiwaetin ŋuluomwon daadaŋ, arae ŋimitae ŋikanikaarei a ŋolowae, toyai akituk ŋina arae ŋisentimitae ŋatomoniarei ka ŋikan ka akitelosit ŋina alelyaa ibore ŋini aliwan, ŋina arae alolomu keŋ ŋisentimitae ŋatomonikan. Arae lowae ŋolo alo Kide namuroet ayakasi ŋadoketa ŋuna adokanarere namuroet.”

¹⁸ Tema nai ekile ŋol neni kaŋ, “Lokoku a ituŋanan, alimu Ekapolon Akuj atemar erae lu ŋikisila ŋulu a namuroet: Ani irikakinio akiduk namuroet, emaikina iyoŋ kitaleu iŋes a ŋainakineta a ŋuna epeyo alokidiama keŋ ka towuatak kidiama keŋ ŋaokot a ŋainakineta a ŋun.

¹⁹ Ŋisacaradotin ŋulu alokabila a Lepi ŋulu erae ŋiletok a Sadok bon emaikina potu kiŋaren kaŋ akitiya etic kaŋ, ayoŋ Ekapolon Akuj ekecik iyoŋ ŋun. Emaikina iyoŋ inak ikes emoŋ ŋolosorokit yaut ikes neni kaŋ erae ainakinet ŋina ka asecit kec.

²⁰ Emaikina iyoŋ tolemu ŋaokot ŋadi anainakinet a ŋin, kiosak loboorei ŋulu esibito ŋamomwar a namuroet ŋul ka lokoonae a namuroet ŋuluomwon ŋulu alowae a ŋolo alokidiama ka nakituk keŋ daadaŋ kiryam. Alopite a ŋol, italeu iyoŋ iŋes ka imookuni.

²¹ Emaikina daŋ iyoŋ tolem emoŋ ŋolo erae ainakinet a ŋuna ka asecit, tope aneni eseunitae apeyo anakibois a ŋina imarakinitae Kai ka Akuj, a ŋina eyai kiŋa neni italeunitoe.

²² “Ani epete ŋirwa ŋiarei, emaikina iyoŋ tolemu ekoroe ŋolo nyeŋwalit iwadio, ya erae ainakinet aŋuna ka asecit. Emaikina iyoŋ kitaleu namuroet a ŋaokot a ekoroe a ŋol, lopite ŋolo ibunio iyoŋ kitaleunio aŋaokot ke emoŋ.

²³ Ekaku kitaleu iyoŋ namuroet, emaikina iyoŋ tolemu emoŋ ŋolo nyeŋwalit ka emesek ŋolo nyeŋwalit alosipan.

²⁴ Emaikina iyoŋ ya ŋibaren ŋul kiŋaren Ekapolon, ŋisacaradotin towuatakis acumbi lobaren ŋul, ido inakis neni ke Ekapolon erae ŋainakineta ŋuna epeyo aŋuna a Ekapolon.

²⁵ Aŋinakoloŋit alotooma ŋirwa ŋikanikaarei, emaikina iyoŋ ya ekoroe ikwapei ainakinet neni ke Ekapolon aŋuna ka asecit. Emaikina daŋ ya neni ke Ekapolon emoŋ ka emesek ŋulu nyeŋwalito ŋulu ilemuni iyoŋ alosipan.

²⁶ Emaikina ikes alotooma ŋirwa ŋulukanikaarei ŋul tomookut, namuroet, kitaleut iŋes toruwor ŋina epedoryo akisitiya.

²⁷ Ani elunyarosi ŋirwa ŋul, edoli ŋirwa ŋikanikauni tomyaa kiŋaren, emaikina ŋisacaradotin yaut ŋainakineta kus ŋuna epeyo, ŋuna a ekisil, Kiwuakis kidiama namuroet. Alimu Ekapolon Akuj atemar, apaki ŋin nai akacamunia ayoŋ iyes Ŋisirael.”