Esek. 42 - Ebaibul

Ŋagulei ŋuna asegak ka arwatata ŋina alokiŋa

¹ Abu nai ekile ŋol okoya ayoŋ nalapatu ŋina alo kiŋa ŋina ayai lowae ŋolo alo Kuju. Okoya ayoŋ nagulei ŋuna eteosi ka alapatu ŋina ka Akai ka Akuj ka eteosi alapatu ŋin ka aduketait ŋina ayai lowae ŋolo alo Kuju.

² Arae aoyau alosepyon a aduketait a ŋina alowae a ŋolo alo Kuju ŋimitae ŋatomonikan ka arae anakou ka neni iteotor ŋimitae ŋatomoniarei ka ŋikan.

³ Alowae a ŋolo eŋoliyarit Kai ka Akuj, arae aduketait ŋin ŋimitae ŋitomon, eŋoliyarit ewae aduketait a ŋin ŋoloce neni enaminamitae ŋamoru analapatu a ŋina alokiŋa. Ayakasi naduketait ŋin ŋagulei ŋuna adukitoe idokitoe a ŋauniuni ameun alokwap tari kidiama.

⁴ Ayai kiŋaren ŋagulei ŋun alotooma neni etoreeneneo, arae alolomu ŋimitae ŋikan ka arae aoyau ŋimitae ŋatomonikan. Eŋoliyarito ŋipukei a ŋagulei a ŋun daadaŋ lowae ŋolo alo Kuju.

⁵ Adidiŋ ŋagulei ŋuna alokidiama akilo ŋuna alokidiŋ ka ŋuna alokwap, anerae alalak ŋirotin ŋulu etoreeneneo edoli nagulei ŋuna alokidiama.

⁶ Amam ŋipirin anagulei a ŋuna ewasiyete alokidiama, lopite ŋolo ayakatar nagulei ŋuna alokiŋaren alapatu; aŋun, adidiŋ ikes akilo ŋuna alokwap ka ŋuna alokidiŋ.

⁷ Ayai arwatata ŋina eteosi ka ŋagulei ŋun alowae a ŋolo alokiŋa a ŋolo ayai alapatu, arae aoyau a arwatata a ŋin ŋimitae ŋatomoniarei ka ŋikan;

⁸ arae aoyau a ŋagulei a ŋun erekina kiŋaren alapatu ŋin ŋimitae ŋatomoniarei ka ŋikan, nai ŋagulei ŋuna arekina iŋoliyarito lowae ŋolo ka Akai ka Akuj, arae aoyau kec ŋimitae ŋatomonikan.

⁹ Ayai nagulei ŋuna alokwap neni elomunere analapatu a ŋina alokiŋa ewasi nen alowae a ŋolo alo Kide,

¹⁰ arae lopuke ŋolo ayai nen esyakinitor arwatata ŋina ka alapatu. Alowae a ŋolo alo Kwap Akai ka Akuj daŋ aneni eteosi ka alapatu ka aneni eteosi ka akai ŋina ayai lowae ŋolo alo To Akai ka Akuj, ayakasi ŋagulei.

¹¹ Ayai kiŋaren ŋagulei ŋun neni etoreeneneo, ekwaan ŋagulei ŋuna ayakasi nen ka ŋuna ayakasi lowae ŋolo alo Kuju; eriyan aoyau kec alosepyon, anakou ka neni iteotor. Ekwaan ŋipukei pur ka ekwaan tari epite ŋolo adukitere ŋagulei kec ka ekwaan ŋipukei kec.

¹² Ayai nagulei ŋuna alokwap neni elomarere analapatu a ŋina alokiŋa, ewasi nen alowae a ŋolo alo Kwap, aneni esyakinitor erot ŋolo elosi narwatata ŋina alokiŋa, ŋina ayai epuke ŋolo elomunere tooma alowae a ŋolo alo Kide.

¹³ Tema ekile ŋol neni kaŋ, “Erae ŋagulei ŋuna alo Kuju ka ŋuna alo Kwap, ŋuna iteosi ka alapatu ŋuna asegak, erae ŋuna enyamyata ŋisacaradotin ŋulu elosete akiryamun ke Ekapolon ŋainakineta ŋuna asegak. Emaikina ikes kiwuanakinete ŋainakineta ŋuna asegak nen, ikwapei ŋainakineta ŋuna a ŋikinyom, ŋainakineta ŋuna a ka asecit ka ŋuna ka akiilit anasecit; anerae erae ŋagulei ŋun ŋuna asegak.

¹⁴ Ani elomarete ŋisacaradotin nakibois ŋina asegan, nyemaikina ikes tolomasi a nen nalapatu ŋina alokiŋa pa elacakinito nakibois ŋina asegan ŋilowi ŋulu itiyaata ikes anakibois a ŋina asegan, anerae erae ŋilowi ŋul ŋulu asegak. Emaikina ŋisacaradotin tonapa ŋilowi ŋice eriŋa ikes nyeapiyara neni eyakasi ŋituŋa.”

¹⁵ Ani kedau ekile ŋol akipim ibore daadaŋ ŋini ayai tooma arwatata ŋina ka Akai ka Akuj, abu okoya ayoŋ kiŋa, eketoryo lopuke ŋolo eŋoliyarit lowae ŋolo alo Kide, ido kipim alokiŋa arwatata daadaŋ ŋina ka Akai ka Akuj kiryam cib.

¹⁶ Abu iŋes kipim ewae ŋolo alo Kide a eoot a ŋolo epimia, toryamu aoyau erae ŋimitae ŋamiae ŋaarei ka ŋatomonikan.

¹⁷ Abu iŋes toboboŋ kipim ewae ŋolo alo Kuju a eoot a ŋolo epimia, toryamu aoyau erae ŋimitae ŋamiae ŋaarei ka ŋatomonikan.

¹⁸ Abu iŋes toboboŋ, kipim ewae ŋolo alo kwap a eoot a ŋolo epimia, toryamu erae ŋimitae ŋamiae ŋaarei ka ŋatomonikan.

¹⁹ Abu iŋes toboboŋ, kipim ewae ŋolo alo To a eoot a ŋolo epimia, toryamu erae aoyau ŋimitae ŋamiae ŋaarei ka ŋatomonikan.

²⁰ Abu iŋes kipim ŋiwaetin ŋuluomwon daadaŋ ŋulu ka arwatata a ŋina ka Akai ka Akuj. Eryamit arwatata ŋin nen cib, arae aoyau arwatata a ŋin alosepyon ŋimitae ŋamiae ŋaarei ka ŋatomonikan ka arae anakou ka neni iteotor ŋimitae ŋamiae ŋaarei ka ŋatomonikan. Adukitoe arwatata ŋin nen aŋuna ka atyakarya ŋulu asegak aneni a ŋulu nyesegak.