Esek. 40 - Ebaibul

Akitoodiunet a Akai a ŋina kitete a ŋina ka Akuj

¹ Alokaru a ŋolo a ŋatomoniarei ka ŋikan eyakae isua nakwapin, torae apaki ŋin akisyakinet a ekaru a ŋol, ŋirwa a elap ŋitomon, toris ŋikaru ŋitomon ka ŋiomwon kelunyar ameun apaki ŋina enyasunere Yerusalem, abu apedor ŋina ke Ekapolon min neni kaŋ, okoyau ayoŋ neni sek ayai Akai ka Akuj.

² Anakitoodianakineta a ŋuna ka Akuj aŋuna abu ayoŋ eŋolik, abu Akuj okoya ayoŋ nakwap a Isirael, ekewuak ayoŋ lomoru ŋolo aoyan, ŋolo aya ŋaduketa ŋuna asibito ŋuna a etaun lowae keŋ ŋolo alo Kwap.

³ Ani akayauni ayoŋ Ekapolon nen, abu ayoŋ eŋolik ekile a nen ŋolo amilimili ikwa eburonis, awoi iŋes alopuke, ayakar nakan keŋ ausi ŋina amilimilan ka eoot ŋolokipimet.

⁴ Abu ekile ŋol tema neni kaŋ, “Lokoku a ituŋanan, kiŋolik ejok ediyediye ka topupok ejok nooi, yau ŋatameta kon neni a ibore a daadaŋ a ŋini alosi ayoŋ akitoodikin iyoŋ, anerae aponi iyoŋ ikiyaun ne, ikotere eketoodikini ayoŋ iyoŋ ibore daadaŋ. Emaikina iyoŋ tolimok Ŋisirael ibore daadaŋ ŋini iŋolikini iyoŋ a ne.”

⁵ Apaki ŋin, abu ayoŋ eŋolik arwatata iryamit akibois ŋina ayai Akai ka Akuj. Arae aoyau a eoot a ŋolokipimet a ŋolo ayai nakan a ekile a ŋol ŋimitae ŋiuni. Abu ekile ŋol kipim arwatata, toryamu aoyau alokwap tari kidiama erae ŋimitae ŋiuni ka toryamu abutur a arwatata erae ŋimitae ŋiuni.

⁶ Abu ekile ŋol tolot lopuke ŋolo iŋoliyarit lowae ŋolo alo Kide, todoka anadoketa a epuke a ŋol, kipim nenilapat a epuke a ŋol ameun alokidiama tari kwap, toryamu erae ŋimitae ŋiuni.

⁷ Yaaye epuke ŋol, ayai neni apedoryo akitor, ayakasi nen ŋagulei ŋauni a ŋolowae a epuke. Eriyan ŋagulei ŋun alowaetin a daadaŋ, arae aoyau ŋimitae ŋiuniuni. Arae abutur a ŋarwatatain a ŋuna atyakatyakato ŋagulei ŋun ŋimitae ŋiarei ka atutubet. Yaaye ŋagulei ŋuna eteere epuke ŋun, ayai neni apedoryo akitor, neni arae aoyau ŋimitae ŋiuni, amyaarit nen tari nagule ŋina eteosi ka Akai ka Akuj.

⁸ Ani ipimi ekile ŋol aoyau ameun alo Kai ka Akuj tari nagule ŋina ayai lopuke, abu toryamu arae ŋimitae ŋiuni.

⁹ Ani ipimi ekile ŋol agule ŋina ayai lopuke, toryamu aoyau ka arwatata erae ŋimitae ŋiomwon ka ŋipirin keŋ erae abutur emita epei. Ayai agule ŋina ke epuke ŋin lowae ŋolo alotooma epuke.

¹⁰ Ayakasi ŋagulei ŋauni ŋolowae a epuke a ŋolo eŋoliyarit lowae ŋolo alo Kide, eriyan ŋagulei ŋun ciribib ka eriyan ŋipirin a ŋagulei a ŋun daadaŋ alokiŋaren ka alokaku.

¹¹ Abu ekile ŋol kipim epuke ameun alowae ke epei tari ŋoloce, toryamu aoyau erae ŋimitae ŋikan, toryamu aoyau a epuke ameun alowae ke epei tari ŋoloce erae ŋimitae ŋikanikapei ka atutubet.

¹² Ayai kiŋaren ŋinagule arwatata ŋina arae aoyau alokwap tari kidiama atutubet ŋina a emita. Eriyan ŋiwaetin a ŋagulei a daadaŋ, area ŋimitae ŋiuni.

¹³ Abu ekile ŋol kipim aoyau a epuke ameun anarwatata a agule a ŋina alokiŋa epuke tari narwatata a agule a ŋina alotooma epuke; toryamu aoyau ameun a epeiwae tari ŋoloce erae ŋimitae ŋitomon ka ŋiarei ka atutubet.

¹⁴ Abu daŋ ekile ŋol kipim agule ŋina ayai lopuke, toryamu erae ŋimitae ŋitomon ka ŋiarei ka atutubet. Kipim daŋ iŋes ŋipirin ŋulu arekina nalapatui ŋuna aya kiŋa ka tooma epuke ŋol, toryamu erae ŋimitae ŋiuni.

¹⁵ Arae aoyau ameun alopuke alowae a ŋolo alotooma tari nakisalet a agule a ŋina ayai neni ŋimitae ŋatomoniarei ka ŋikan.

¹⁶ Ayakasi narwatatain ŋuna alokiŋa ŋidirisae ŋulucicik a ŋinagule ka ayakasi daŋ narwatatain ŋuna atyakito ŋagulei. Ecianakinitae narwatatain ŋuna alotooma epuke ŋitorubei ŋulu a ŋikito a ŋiŋolya.

¹⁷ Abu nai ekile ŋol okoya ayoŋ nalapatu ŋina ayai kiŋa; abu ayoŋ eŋolik a nen ŋagulei ŋatomoniuni ŋuna adukonokinitae narwatata alokiŋa, kiŋaren ŋagulei ŋun, ayai akibois ŋina enaminamitae ŋamoru.

¹⁸ Amekinit akibois ŋin alapatu daadaŋ alokiŋaren ŋipukei a ŋagulei, ido eriyan aoyau a ŋolopuke ka neni enaminamitae ŋamoru. Atikiyoro kwap iwadio akibois ŋin.

¹⁹ Abu nai ekile ŋol kipim aoyau akibois a ŋin ameun alotooma epuke ŋolo atikiyoro kwap tari kiŋa alapatu ŋina alotooma; arae aoyau ŋimitae ŋatomonikan.

²⁰ Abu nabo ekile ŋol kipim aoyau a ŋiwaetin a epuke a ŋolo a alapatu a ŋina alokiŋa a ŋina eŋoliyarit lowae ŋolo alo Kuju.

²¹ Ayakasi ŋolowae a epuke a ŋol ŋagulei ŋauni ŋuna eteere epuke ŋol; eriyan ciribib ŋarwatatain ŋuna aya kidiŋ kec ka eriyan agule ŋina ayai lopuke ŋol ka ŋina ayai lopuke ŋolo eŋoliyarit lowae ŋolo alo Kide. Arae aoyau a epuke alosepyon ŋimitae ŋatomoniarei ka ŋikan ka aoyau a epeiwae tari ŋoloce arae ŋimitae ŋitomon ka ŋiarei ka atutubet.

²² Ekwaan agule ŋina ayai lopuke ŋol ka ŋina ayai lopuke ŋolo eŋoliyarit lowae ŋolo alo Kide, ŋidirisae ka ŋitorubei a ŋiŋolya daŋ, ekwaan ka ŋulu aya lopuke ŋolo eŋoliyarit lowae ŋolo alo Kide. Ayakasi lopukei ŋul ŋadoketa ŋakanikaarei ka ayai agule a epuke a ŋol lowae ŋolo alotooma arwatata.

²³ Ayai epuke nalapatu ŋina alotooma ŋolo eŋoliyarit Kuju, lowae ŋolo ayai epuke ŋolo alo Kuju, lopite ŋolopei ayakar tari ŋolo eŋoliyarit Kide lowae ŋolo ayai epuke ŋolo alo Kide. Abu ekile ŋol kipim ameun alopuke ke epei tari lopuke ŋolo eteosi ka ŋol, toryamu aoyau erae ŋimitae ŋatomonikan.

²⁴ Abu nai ekile ŋol okoriko ayoŋ lowae ŋolo alo Kwap Akai ka Akuj; abu ayoŋ eŋolik a nen epuke ŋolo eŋoliyarit lowae ŋolo alo Kwap. Abu ekile ŋol kipim ŋipirin a epuke a ŋol ka agule ŋina ayai lopuke ŋol, toryamu eriyan ŋimitae ka ŋulu a aris iŋes epim.

²⁵ Ayakasi ŋidirisae nagulei ŋuna ayakasi lopuke ŋol lopite ŋolopei ayakatar nagulei a ŋipukei a ŋuluce daŋ. Arae aoyau a epuke a ŋol ameun alosepyon ŋimitae ŋatomoniarei ka ŋikan ka arae aoyau a epeiwae tari lowae ŋoloce ŋimitae ŋitomon ka ŋiarei.

²⁶ Ayakasi lopuke ŋol ŋadoketa ŋakanikaarei ka ayai agule a epuke a ŋol lowae ŋolo alotooma arwatata. Ayakasi lopirin a epuke a ŋol ŋitorubei a ŋiŋolya, aŋolowae a epuke a ŋol, ayai etorube epei.

²⁷ Ayai epuke a alapatu a ŋina alotooma epuke lowae ŋolo alo Kwap, ameun alopuke a ŋol tari lopuke ŋolo elomarere kiŋa alowae a ŋolo alo Kwap, arae aoyau ŋimitae ŋatomonikan.

²⁸ Abu nai ekile ŋol okoya ayoŋ nalapatu ŋina alotooma Akai ka Akuj, ayai alapatu ŋin diyete epuke ŋolo ayai lowae ŋolo alo Kwap, abu iŋes kipim epuke ŋol toryamu eriyan ka ŋuluce.

²⁹ Epimitae ŋagulei ŋuna eteere epuke ŋol, kaapei ka agule ŋina ayai lopuke ŋol eriyan ka ŋuna a ŋipukei a ŋuluce. Epimitae ŋipirin ŋulu ayakasi lopuke ŋol eriyan ka ŋulu ayakasi lopukei ŋuluce. Ayakasi lopuke ŋol ka nagule ŋina ayai nen ŋidirisae ŋiwaetin daadaŋ; arae aoyau a epuke a ŋol ameun alokwap tari kidiama ŋimitae ŋatomoniarei ka ŋikan ka ameun alowae ke epei tari ŋoloce, arae ŋimitae ŋitomon ka ŋiarei ka atutubet.

³⁰ Ayakasi lopukei daadaŋ ŋulu ka alapatu a ŋina alotooma ŋagulei ŋuna arae aoyau ameun alokwap tari kidiama ŋimitae ŋatomoniarei ka ŋikan torae aoyau anawaetin ŋimitae ŋiarei ka atutubet.

³¹ Eŋoliyarit agule a epuke aŋol nalapatu ŋina alokiŋa, ayakasi ŋitorubei a ŋiŋolya lopirin agule a ŋin ka ayakasi ŋadoketa ŋakanikauni lopuke ŋol.

³² Abu ekile ŋol okoya ayoŋ nalapatu ŋina ayai tooma epuke ŋolo ayai lowae ŋolo alo Kide, abu iŋes kipim epuke ŋol; epimitae epuke ŋol iriyan ka ŋuluce.

³³ Epimitae ŋagulei ŋuna eteere epuke ŋol kaapei ka agule ŋina ayai lopuke ŋol eriyan ka ŋuna aŋipukei a ŋuluce. Epimitae ŋipirin ŋulu ayakasi lopuke ŋol eriyan ka ŋulu ayakasi lopukei ŋuluce. Ayakasi lopuke ŋol ka nagule ŋina ayai nen ŋidirisae ŋiwaetin daadaŋ; arae aoyau a epuke a ŋol ameun alokwap tari kidiama ŋimitae ŋatomoniarei ka ŋikan ka ameun alowae ke epei tari ŋoloce arae ŋimitae ŋitomon ka ŋiarei ka atutubet.

³⁴ Eŋoliyarit agule a epuke a ŋol nalapatu ŋina alokiŋa, ayakasi ŋitorubei a ŋiŋolya lopirin a agule a ŋin, ayakasi ŋadoketa ŋakanikauni lopuke ŋol.

³⁵ Abu ekile ŋol okoya ayoŋ lopuke ŋolo ayai lowae ŋolo alo Kuju, abu ekile ŋol kipim epuke ŋol, epimitae eriyan ka ŋipukei ŋuluce.

³⁶ Epimitae ŋagulei ŋuna eteere epuke ŋol kaapei ka agule ŋina ayai lopuke ŋol eriyan ka ŋuna a ŋipukei a ŋuluce. Epimitae ŋipirin ŋulu ayakasi lopuke ŋol eriyan ka ŋulu ayakasi lopukei ŋuluce. Ayakasi lopuke ŋol ka nagule ŋina ayai nen ŋidirisae ŋiwaetin daadaŋ; arae aoyau a epuke a ŋol ameun alokwap tari kidiama ŋimitae ŋatomoniarei ka ŋikan ka ameun alowae ke epei tari ŋoloce, arae ŋimitae ŋitomon ka ŋiarei ka atutubet.

³⁷ Eŋoliyarit agule a epuke a ŋol nalapatu ŋina alokiŋa, ayakasi ŋitorubei a ŋiŋolya lopirin agule a ŋin a ŋolowae ka ayakasi ŋadoketa ŋakanikauni lopuke ŋol.

³⁸ Tooma agule ŋina ayai lopuke ŋol, ayai agule ace ŋina ayai epuke, arae nagule ŋin elosere ŋainakineta ŋuna epeyo.

³⁹ Tooma agule ŋina ayai lopuke ŋol, ayakasi ŋimesae ŋiomwon, ŋiarei a ŋolowae, arae lomesae ŋul aarenenere ŋainakineta ŋuna epeyo, ŋuna a ŋasecisya ka ŋuna a akiilit anasecit.

⁴⁰ Ayakasi ŋimesae ŋiarei kiŋa arwatata ŋina ka agule a epuke a ŋol, aapiyete alopuke a ŋolo alo Kuju ka lowae ŋoloce daŋ anagule a ŋina a epuke a ŋol, ayakasi ŋimesae ŋiarei.

⁴¹ Ayakasi lopuke ŋol ŋimesae ŋiomwon alotooma ka ayakasi ŋiomwon alokiŋa. Arae daadaŋ ŋikanikauni eyakasi lopuke ŋol; lomesae ŋul aarenenere ŋamuronisya.

⁴² Ayakasi daŋ nen ŋimesae ŋiomwon ŋulu etyekunitae anamoru, esitiyao ŋimesae ŋul aŋuna a ŋainakineta a ŋuna epeyo, aapiyarit aoyau a ŋolomesa alosepyon ŋasentimitae ŋakanikauni, aapiyarit aoyau anakou ka neni iteotor ŋasentimitae ŋakanikauni ka aapiyarit aoyau alokwap tari kidiama asentimita apei. Ewuanakinio kidiama ŋimesae ŋul ŋiboro ŋulu esitiyao earyo ŋainakineta ŋuna epeyo ka ŋamuronisya ŋunace.

⁴³ Ayakasi nawaetin a ŋimesae a ŋul a daadaŋ ŋiboorei ŋulu aapiyarit adapalu kec asentimita apei. Arae lomesae ŋul ewuanakinio akiriŋ a ŋibaren a ŋulu erae ŋainakineta.

⁴⁴ Abu nai ekile ŋol okoyau ayoŋ nalapatu ŋina alotooma Akai ka Akuj. Ayakasi nalapatu ŋin ŋagulei ŋaarei ŋuna aŋaara, eŋoliyarit apei lowae ŋolo alo Kwap alodiyete epuke ŋolo alo Kuju, eŋoliyarit ŋinace lowae ŋolo a epuke a ŋolo alo Kide a ŋolo eŋoliyarit lowae ŋolo alo Kuju.

⁴⁵ Abu ekile ŋol okolimok ayoŋ atemar erae agule ŋina iŋoliyarit lowae ŋolo alo Kwap ŋina a ŋisacaradotin a ŋulu erae etic kec akiyok Akai ka Akuj,

⁴⁶ tosodi agule ŋina iŋoliyarit lowae ŋolo alo Kuju, erae ŋina a ŋisacaradotin a ŋulu erae etic kec akiyok namuroet. Erae ŋisacaradotin ŋul ŋidwe a Sadok ŋulusapa ŋulu erae ikes bon ecamakinitae aloletok a Lepi aponare akitiya etic alokiŋaren Ekapolon.

⁴⁷ Abu ekile ŋol kipim alapatu ŋina alotooma ŋin, toryamu eriyan ŋiwaetin daadaŋ erae ŋimitae ŋatomonikan. Ayai Akai ka Akuj To alapatu ŋin ka ayai namuroet kiŋaren Akai ka Akuj.

Akai ka Akuj

⁴⁸ Abu nai ekile ŋol okoya ayoŋ nagule ŋina elomarere Kai ka Akuj ka abu iŋes kipim ŋipirin ŋulu a agule a ŋin, toryamu erae aoyau kec alowaetin a agule a daadaŋ ŋimitae ŋiarei ka atutubet; toryamu epuke a agule a ŋin erae ŋimitae ŋikanikaarei ameun alowae ke epei tari ŋoloce ka ŋarwatatain a epuke a ŋol erae abutur emita ka atutubet alowaetin a daadaŋ.

⁴⁹ Arae aoyau a agule a ŋin alosepyon ŋimitae ŋitomon ka arae anakou ka neni iteotor ŋimitae ŋikanikapei. Adokio a ŋadoketa elosyo nagule ŋin ka ayakasi ŋipirin ŋiarei lopuke a agule a ŋin, epeiwae epuke.