Esek. 34 - Ebaibul

Ŋikeyokok a Isirael ŋulu alyokonok

¹ Abu Ekapolon kirwor neni kaŋ tema,

² “Lokoku a ituŋanan, todwar itoroniyarit ŋikeyokok a Isirael; todwar, tolimok ikes atemar alimu Ekapolon Akuj ŋakiro nu ebe, ‘Ekaŋ iyes ŋikeyokok a Isirael! Iyes ŋulu itanete ŋawat kus bon!’ Nyemaikina mono kitana ŋikeyokok ŋamesekin a?

³ Inyamete iyes ŋasepwa a ŋamesekin, inapete iyes ŋilowi ŋulu itiyaunitae a ŋajul a ŋamesekin ka iseete iyes ŋamesekin ŋuna atumak toara, nai nyitanete iyes ŋamesekin.

⁴ Nyitogogoŋo iyes ŋamesekin ŋuna epalag, nyitaŋaleuno iyes ŋuna edyakasi, nyeena iyes ŋajemei aŋuna ewanawana, nyinyakuna iyes ŋuna eoliyorito, nyiwarara iyes ŋuna eolito, nai ipolokis iyes ŋamesekin alotooma aryenyeo ka anyunyura.

⁵ Apotu ŋamesekin kielaros nariet, anerae apotu kicanakinos ekeyokon, ani ielarosi ikes nariet, apotu ŋityaŋ ŋulu anariet daadaŋ tonyama ikes.

⁶ Apotu ŋamesekin kaŋ kielaros, apotu kitwaŋata alokidiama ŋikamukumukui daadaŋ ka anawaetin a ŋikamukumukui a daadaŋ a ŋulu aoyak, apotu ŋamesekin kielaros nakwap daadaŋ, todaun ituŋanan iwarari, kori iŋitanari neni eya.

⁷ “Aŋun, iyes ŋikeyokok, kiirasi ŋakiro a Ekapolon nu ebe,

⁸ ‘Ikwapei kire jik ayarya ayoŋ, iyes ŋikeyokok, aŋuna aponiata ŋamesekin kaŋ kicanakinos ekeyokon ka apotu ŋityaŋ ŋulu anariet kielasi ikes daadaŋ ka tonyama aŋuna amamukar ekeyokon eyoki ikes ka aŋuna pa aponiata ŋikeyokok kaŋ kiwarasi ŋamesekin kaŋ, nai apotu kiyoko ŋawat kec bon akilo akiyok ŋamesekin kaŋ,’

⁹ aŋun, iyes ŋikeyokok, kiirasi ŋakiro nu ŋuna a Ekapolon,

¹⁰ alimu Ekapolon ebe, ‘Emanit ayoŋ ŋikeyokok a ŋamesekin kaŋ, eŋisi ayoŋ ikes okoinakis ayoŋ ŋamesekin kaŋ, etojoŋo nai ayoŋ ikes akitan ŋamesekin kaŋ, nyerubakinete nabo ŋikeyokok ŋul imujete. Aiuni ayoŋ ŋamesekin kaŋ anakituka kec, ikotere ikes ejoŋoete akinyam ŋamesekin kaŋ.’”

Akuj iŋes erae Ekeyokon ŋolo a kire

¹¹ Ŋakiro ŋuna irworo Ekapolon Akuj ikes nu ebe, “Ayoŋ elope ewarari ŋamesekin kaŋ, ido eyok ikes.

¹² Lopite ŋolopei iwararyata ŋikeyokok ŋamesekin kec ŋuna ielakina losipanin a ŋamesekin ŋuluce, ewarari ayoŋ daŋ ŋamesekin kaŋ. Aiuni ayoŋ ikes anakiboisyo a daadaŋ a ŋuna aponi kielarae ikes akoloŋit ŋina ka akiryonut ŋina alalaata ŋican.

¹³ Ayauni ayoŋ ikes alotuŋa a ŋakwapin, acununi ayoŋ ikes anakiboisyo, oyau tooma nakwap kec, eyok ikes alokidiama ŋikamukumukui a Isirael, alodiyete ŋayona ŋuna eya ŋakipi ka aneni daadaŋ iboikinosi ikes alo Isirael.

¹⁴ Eyoki ayoŋ ikes neni eyakasi ŋinya ŋulu ajokak, eyakaun ŋinya kec naitae ŋuna a ŋikamukumukui a Isirael, euryanikin neni eya ŋinya ŋulu ajokak, enyamete ŋinya ŋulu etumak alokidiama ŋikamukumukui a Isirael.

¹⁵ Ayoŋ elope aruwor ekeyokon a ŋamesekin kaŋ, emyekini ayoŋ ikes touryanikin.

¹⁶ Alosi ayoŋ akiŋitanar ŋuna eolito, enyakuni ayoŋ ŋuna eoliyorito, aeni ayoŋ ŋajemei a ŋuna ewanawana, etogogoŋi ayoŋ ŋuna epalag, nai amunyari ayoŋ ŋuna atumak ka ŋuna agogoŋok. Eyoki ayoŋ ŋamesekin anakiyookino.

¹⁷ “Ani eruwor iyes ŋamesekin kaŋ, alimu Ekapolon Akuj ŋakiro nu aŋuna kus ebe, ‘Atubokini ayoŋ ŋinamesek aneni kus, otyaka ŋuna ajokak aneni aŋuna aronok, otyaka ŋamesekin aneni aŋamee.

¹⁸ Nyimwonikina ŋace kus anakinyam ŋinya ŋulu ajokak, ipudanakinete iyes kwap ŋinya ŋulu nyinyamete iyes, imasete iyes ŋakipi ŋuna aliwak ka imunaete ŋuna nyipedorito akimat toruwor ecoto.

¹⁹ Epedorete mono ŋamesekin kaŋ ŋunace akinyam ŋinya ŋulu ipudata iyes ka akimat ŋakipi ŋuna igurito iyes a?’

²⁰ “Aŋun, alimu Ekapolon Akuj ŋakiro nu ebe, ‘Kiirasi, alosi ayoŋ elope atubokin iyes ŋamesekin ŋuna atumak ka iyes ŋamesekin ŋuna asenyak,’

²¹ anerae ipotu iyes kijukasi ŋuna asenyak a ŋikorei ka a ŋiseketa ka ipotu iyes kigumugumoosi a ŋamomwar kus ŋuna apalag alobaren daadaŋ, akitodol ŋina ielaryata iyes ikes neni alwanan anamesekin a ŋunace.

²² Aiuni ayoŋ ŋamesekin kaŋ, nyetiŋio nabo ikes neni aronon, atubokini ayoŋ ŋinamesek anamesekin kaŋ.

²³ “Ewuakini ayoŋ ekeyokon epei kiyok ikes, ekeyokon ŋol iŋes Daudi eketiyan kaŋ, itani iŋes ŋamesekin kaŋ, iyokiuni ejok erae ekeyokon kec.

²⁴ Ayoŋ Ekapolon aruwor Akuj kec, eketiyan kaŋ Daudi iŋes eruwor ekepukan kec. Ayoŋ Ekapolon adau alimun ŋun.

²⁵ “Ewuakini ayoŋ acamunet ŋina a ekisil neni kaŋ ka ikes, alemari ayoŋ ŋityaŋ ŋulu adedeŋak anakwap kec, ikotere ŋamesekin kaŋ iboiyete analoŋisat ka eperete anamon emam ibore enyami.

²⁶ Eterereŋi ayoŋ ikes, esilimi ayoŋ akiru edoli apaki nakiboisyo ŋuna irimokinito emukura kaŋ kidiŋ, eruwor akiru ŋin arereŋu aneni kec.

²⁷ Erayete ŋikito ŋaraito kec ka eraunete ŋikinyom alokwap, mam awasya eyakaunotor ŋituŋa kaŋ anakwap kec. Eyenunete ikes atemar arae ayoŋ Ekapolon apaki ŋina alemarya ayoŋ ŋican kec ŋulu eenito ikes ikwa ŋapaadei ŋuna ikienikinito nayokot, aiuni ayoŋ ikes anapedor a ŋulu apotu yaasi ikes erae ŋipi.

²⁸ Nyielielaryo nabo jik ikes nakwapin, kori nyenyamete nabo jik ŋityaŋ ŋulu ka ariet ikes. Mam awasya eyakaunotor ikes, mam ituŋanan einakini ikes ekabule.

²⁹ Ainakini ayoŋ ikes akwap ŋina eyenitae aŋuna a ŋaraito keŋ, mam nabo nyielari eron ikes anakwap kec, kori nyidaŋidaŋete nabo jik ikes araakau ŋulu ejamuwaritae anakwapin.

³⁰ Eyenunete ikes atemar ikirukit ayoŋ ŋolo arae Ekapolon Akuj kec ka ikes. Eyenunete Ŋisirael atemar erae ikes ŋituŋa kaŋ.

³¹ Iraakasi iyes ŋamesekin kaŋ, ŋamesekin ŋuna eyoki ayoŋ ka arae ayoŋ Akuj Kus.”