Esek. 32 - Ebaibul

Akiolol aŋuna a Parao ka aŋuna a akwap a Ijipit

¹ Alokaru a ŋolo a ŋitomon ka ŋiarei, elap ŋolo a ŋitomon ka ŋiarei, ŋirwa ka elap epei, abu Ekapolon kirwor neni kaŋ tema,

² “Lokoku a ituŋanan, kiololo aŋuna a Parao a erwosit a Ijipit, tolimok iŋes ebe, ‘Itami iyoŋ atemar igogoŋ iyoŋ anakwapin nooi ikwaan ka eŋatuny, nai ikwaan iyoŋ ka epiu koŋin ŋolo eperi anakipi a ŋanamyo; ibelibelo iyoŋ anakipi a ŋayona kon, imunae iyoŋ ŋakipi a ŋakejen kon toruwor ecoto ka itobos ŋakipi a ŋayona kon.

³ Alimu Ekapolon Akuj atemar, Ani akoloŋit ŋina ecunakinotor ŋituŋa a ŋakwapin ŋulu alalak nooi, emasuni ayoŋ atibait kaŋ neni kon; ikiriut iyoŋ ŋituŋa ŋul a atibait kaŋ.

⁴ Ekemasari ayoŋ iyoŋ neni aonon anakwap, ekecutari ayoŋ iyoŋ neni alapatan anakwap, etodoe ayoŋ ŋikyeny daadaŋ neni kon, emyekini ayoŋ ŋityaŋ ŋulu ka ariet daadaŋ ikiryetasi iyoŋ.

⁵ Eelielakini ayoŋ akuwan kon kidiama ŋikamukumukui, elelebik ŋakoyo kon nakadipaalae.

⁶ Epapauni ayoŋ ŋalup a ŋaokot a ŋuna eleleunete aneni kon, edolete ŋaokot ŋun tari lokamukumukui, ilelebun akuwan kon nayona ŋuna eya ŋakipi.

⁷ Ani akalemari ayoŋ iyoŋ, eteriboori ayoŋ nakuj aneni kon, esiryoni ayoŋ ŋikacer; eteriboori ayoŋ a edou akoloŋ aneni kon, nyecauni elap apaki ŋin.

⁸ Ibore daadaŋ ŋini ecai alokidiama, esiryoni ayoŋ alokidiama kon, esiryoni ayoŋ akwap kon.

⁹ “‘Ewuakini ayoŋ akiyaloloŋ lotai a ŋituŋa a ŋulu alalak, apaki ŋin ŋina eketirikorya ayoŋ iyoŋ ŋituŋa a ŋakwapin, nakwapin ŋuna nyiyeni iyoŋ ŋinapeikoloŋ.

¹⁰ Eturuwori ayoŋ ŋituŋa ŋulu alalak ŋulu ekadakinito ŋakiro kon; emaranikinete ŋirwosi a ŋituŋa a ŋul a ŋuna kon. Emaranikinete ŋirwosi ŋul iŋolikinete apwatari ayoŋ ekileŋ kaŋ alokiŋaren kec. Akoloŋit ŋina akalemarya ayoŋ iyoŋ, emaranikini ŋolorwosit a ŋinapaki aŋuna ka akiyar keŋ.

¹¹ “‘Alimu Ekapolon Akuj ŋakiro aŋuna a erwosit a Ijipit atemar, ikiari iyoŋ ikileŋ a erwosit a Babilon.

¹² Emyekini ayoŋ ŋajorei kon tomunyarae, emunyarete a ŋileŋia ŋikajiok ŋulu agogoŋok ikes, epote neni keŋ ŋikajiok a ŋakwapin ŋulu aryenyaanak nooi. Itoŋopiyarete ikes akituro a Ijipit, earyo ŋikajiok a Ijipit daadaŋ.

¹³ Amunyari ayoŋ ŋibaren a Ijipit daadaŋ ŋulu eyakasi diyete neni eya ŋakipi ŋuna alalak, mam nabo ituŋanan iguri ŋakipi ŋun, kori mam nabo ŋaatuk igurete ŋakipi ŋun toruwor ecoto.

¹⁴ Etiliwari nai ayoŋ ŋakipi a ŋituŋa a Ijipit, emyekini ayoŋ ŋayona kec tolelyata ikwa elelyaa akimyet.

¹⁵ Ani eturuwori ayoŋ akwap a Ijipit ŋina emam ibore eyai, apaki ŋina edaunor ibore eyai tooma keŋ, apaki ŋina aarya ayoŋ ibore daadaŋ ŋini sek ayari alotooma keŋ, eyenunete nai Ŋijipitian atemar arae ayoŋ Ekapolon.’

¹⁶ Eikinio eete iololoo aŋuna a Ijipit. Eikinete ŋaberu a ŋakwapin a ŋunace eete ŋol. Eikinete ikes aŋuna Ijipit, eikinete ŋajoresyo a Ijipit daadaŋ eete ŋol.”

Eete ŋolo egworore aŋuna a Ijipit

¹⁷ Alokaru a ŋolo a ŋitomon ka ŋiarei, elap ŋolo ka epei, ŋirwa ka elap ŋitomon ka ŋikan, abu Ekapolon kirwor neni kaŋ tema,

¹⁸ “Lokoku a ituŋanan, kiololo aŋuna a ŋajoresyo a Ijipit, kipotok ikes locan ŋulu akibois a ŋikatwak, kipotok ikes akwap a Ijipit kaapei ka ŋituŋa a ŋakwapin a ŋuna agogoŋok, kipotok ikes kaapei ŋulu enukio napanya.

¹⁹ Tolimok Ijipit ebe, ‘Ibus mono iyoŋ nooi akilo ŋakwapin ŋunace a? Toloma kwap! Emaikina iyoŋ ikinuki kaapei ka ŋulu nyenupito neni ka Akuj.’

²⁰ Earyo ikes kaapei ka ŋulu earyo a ekileŋ. Adaun akipotor Ijipit tomunyarae a ekileŋ; ikamaryo Ijipit ka erikoryo ŋajoresyo keŋ.

²¹ Etemarete ŋikarikok ŋulu a agogoŋok ŋulu eya nakibois a ŋikatwak neni a Ijipit ka neni a ŋulu ariitoror Ijipit ebe, ‘Apotu ikes daŋ nakibois a ŋikatwak, eperete kaapei ka ŋulu nyenupito neni ka Akuj ŋulu aponi toarae a ekileŋ.’

²² “Eyai akwap ka Asiriya nakibois a ŋikatwak ŋin, eyakasi kaapei ka ŋulu ariitotor iŋes, irimokinito ŋalyalin a ŋul Asiriya kidiŋ aaryo ŋul daadaŋ a ekileŋ.

²³ Erekinitae ŋalyalin kec neni ecukul nooi anakibois a ŋikatwak. Eperete ŋikajiok ka Asiriya daadaŋ anakibois a ŋin irimokinito neni eyai Asiriya kidiŋ. Aaryo ikes daadaŋ a ekileŋ. Ŋituŋa ŋul sek ekiŋaren apotu yaut ekabule nakwap a ŋituŋa a ŋulu eyarete.

²⁴ “Eyai akwap a Elam nakibois a ŋikatwak ŋin, irimokinito alyal keŋ kidiŋ ŋajoresyo keŋ daadaŋ, aaryo ŋul daadaŋ a ekileŋ, apotu ikes toloto nakibois a ŋikatwak pa enupito neni ka Akuj, arae ikes apotu yaut ekabule nakwap a ŋituŋa a ŋulu eyarete. Irumito ikes ŋileec kec kaapei ka ŋulu alomasi nakipany.

²⁵ Eturuwosi ikes Elam ekitaada ŋolo eyai neni a ŋulu aari kaapei ka ŋajoresyo kec daadaŋ, eturuwosi ikes Elam neni irimokinito ŋalyalin kec kidiŋ, erae ikes daadaŋ ŋulu nyenupito neni ka Akuj, ŋulu aaryo a ekileŋ, anerae apotu ikes kielakis ekabule nakwap a ŋituŋa a ŋulu eyarete. Idaŋidaŋete ikes ŋileec kec kaapei ka ŋituŋa ŋulu alomasi nakipany, iperikinitoe ikes neni eya ŋulu aponi toarae.

²⁶ “Eyakasi nen Mesek ka Tubal, eyakasi ikes nen kaapei ka ŋituŋa kec ŋulu alalak nooi, irimokinito ŋalyalin a ŋul a daadaŋ ikes kidiŋ, erae ikes daadaŋ ŋulu nyenupito neni ka Akuj, aaryo ikes a ekileŋ, anerae apotu ikes kielakis ekabule nakwap a ŋituŋa a ŋulu eyarete.

²⁷ Nyeperete mono ikes kaapei ka ŋikajiok ŋulu koloŋ aponi toarae, ŋulu anupito neni ka Akuj, ŋulu apotu tolomasi nakibois a ŋikatwak kaapei ka ŋiboro kec ŋulujiet, ŋikajiok ŋulu aponi kisicoloŋoi ŋileŋia kec a? Ŋikajiok ŋulu eya tokona ŋaupala kec kidiama ŋakoyo kec, anerae apotu ikes kielakis ekabule nakwap a ŋituŋa a ŋulu eyarete.

²⁸ Okoe iyoŋ daŋ Parao, ikibilio, toper aneni eperyoto ŋulu nyenupito neni ka Akuj, topero ka ŋulu aponi toarae a ekileŋ.

²⁹ “Eyai akwap a Edom nakibois a ŋikatwak ŋin, tari sek kegogoŋ ikes, iperikinitoe Edom nen kaapei ka ŋirwosi keŋ ka ŋikepukak keŋ. Iperikinitoe ikes nen kaapei ka ŋulu aponi toarae a ekileŋ, iperikinitoe ikes nen kaapei ka ŋulu nyenupito neni ka Akuj ka ŋulu alomasi nakipany.

³⁰ “Eyakasi nakibois a ŋikatwak ŋin ŋikepukak ŋulu alowae a ŋolo alo Kuju ka ŋisidoniani daadaŋ. Aponi toarae ikes ka alomasi kwap irumito ŋileec, anerae apotu ikes yaut ekabule aŋuna ka agogoŋu kec, eperete ikes a nen erae ŋulu pa anupito neni ka Akuj, erukito ikes ka ŋulu aponi toarae a ekileŋ, irumito ŋileec ikes a nen kaapei ka ŋulu apotu tolomasi nakipany.

³¹ “Apaki ŋina iŋolikinia Parao ŋituŋa ŋul daadaŋ ŋulu keponi toarae alojie, isirworiun iŋes aŋuna a ŋajoresyo keŋ a daadaŋ.

³² Tari daŋ kacamakinit ayoŋ Parao kielak ekabule nakwap a ŋituŋa a ŋulu eyarete, iperikinio Parao kaapei ka ŋajoresyo keŋ daadaŋ neni eyakasi ŋulu nyenupito neni ka Akuj, toruko a nen ka ŋulu aaryo a ekileŋ.”