Esek. 31 - Ebaibul

Ŋikito a Cedar ŋulu aoyak

¹ Alokaru a ŋolo a ŋitomon ka epei, elap ŋolo a ŋiuni, ŋirwa ka elap epei, abu Ekapolon kirwor neni kaŋ tema,

² “Lokoku a ituŋanan, tolimok Parao erwosit a Ijipit ka ŋituŋa keŋ ebe, ‘Ŋae mono ikwaanatar iyoŋ anapolou kon?

³ Ikwaan iyoŋ ka ekitoe a Cedar ŋolo eyai Lebanon, ŋolo eyakar ŋaten ŋuna ebusak ŋuna eyai etolim ŋolo ka amoni, ekitoe ŋolo aoyan nooi ŋolo edolit aoyau keŋ lodouwon.

⁴ Itopoloete ŋakipi iŋes ejok nooi, einakinito iŋes ŋakipi ŋuna alokwap apol tooyaar nooi. Eleleete ŋakipi a ŋaŋololin a ŋun neni elomunitor ekitoe ŋol, eleleete ŋayona ŋuna aŋaŋololin a ŋun namon daadaŋ ŋuna eyakasi nen.

⁵ Aŋuna alelyaata ŋakipi neni alomunitor ekitoe ŋol, abu ekitoe ŋol tooyaar nooi akilo ŋikito ŋuluce. Apotu ŋaten keŋ toburyoto ka tooyaata.

⁶ Apotu ŋikyeny a ŋikabilae a daadaŋ toduko ŋakais kec naten a ekitoe a ŋol. Apotu ŋityaŋ ŋulu ka ariet touryata lotolim a ekitoe a ŋol. Apotu ŋituŋa a ŋakwapin kiboiyoto alotolim a ekitoe a ŋol.

⁷ Ebus nooi apolou a ekitoe a ŋol egaaraete ŋaten keŋ, anerae alomarito ŋataagwor keŋ kwap neni elalaata ŋakipi.

⁸ Emam ekitoe a Cedar alomanikor ka Akuj ŋolo apedoryo akisikwaan ka ekitoe ŋol. Emam ekitoe a Cipres ayakar ŋaten ŋuna ekwaan ka ŋuna a ekitoe a ŋol. Emam ŋikito ŋulu ka ariet ŋulu ekwaan ŋaten ka ŋuna a ekitoe a ŋol. Emam ekitoe alomanikor ka Akuj ŋolo ekwaan akibuses keŋ ka ŋina a ekitoe a ŋol.

⁹ Abu ayoŋ etiyau ekitoe ŋol ibus nooi eyakar ŋaten ŋuna alalak. Ayakatar ŋikito a Eden a emanikor a ŋolo ka Akuj daadaŋ arakao aŋuna a ekitoe a ŋol.’

¹⁰ “Aŋun, ŋakiro ŋuna alimu Ekapolon Akuj ikes nu ebe, ‘Aŋuna abunio ekitoe ŋol tooyaar nooi todol aoyau keŋ lodouwon ka aŋuna abunio ekitoe ŋol kiturokinor aoyau keŋ,

¹¹ abu ayoŋ epotok iŋes neni a ekepukan a ŋakwapin, adau ekepukan ŋol akisican iŋes aŋuna ka aronis keŋ. Adau ayoŋ akipotor iŋes.

¹² Adaut ŋigelaanotin ŋulu eponito anakwapin a ŋuna aryenyaanak nooi ayepakin ekitoe ŋol kwap ka akimyekin eperi a nen. Emasakinosi ŋaten keŋ kidiama ŋikamukumukui ka tooma ŋakadipaalae daadaŋ, eperete ŋaten keŋ ebilibila alotooma ŋaŋololin daadaŋ ŋuna ka akwap; apotu ŋituŋa daadaŋ ŋulu ka akwap torotokis alotolim keŋ, kimyekis etolim keŋ a nen.

¹³ “‘Aduko ŋikyeny daadaŋ natorom a lokitoe a ŋolo eperi a ŋol, alomasi ŋityaŋ ŋulu ka ariet daadaŋ naten keŋ.

¹⁴ “‘Ameun nai tokona tari momit, mam ŋikito ŋulu elomunete aneni eya ŋakipi ŋulu eoyaketa, kori edoli aoyau kec lodouwon, mam ŋikito ŋulu emasete ŋakipi a ŋinapaki ŋulu eoyaketa ikwa ŋol. Emaikina tokona ŋikito daadaŋ toyakaun apaki ŋina etwakyata ikwa etwakyata ŋituŋa, emaikina tolomasi kwap toloto nakibois a ŋikatwak.’

¹⁵ “Alimu Ekapolon Akuj atemar, akoloŋit ŋina ayaunere ekitoe ŋol nakibois a ŋikatwak, abu ayoŋ ogolok akipany alokidiama keŋ, emuleleiya iŋes; abu ayoŋ ogol ŋaŋololin a ŋakipi a ekitoe a ŋol, kiudakinos ŋakipi ŋun iwapei towua. Abu ayoŋ elelebik akiyaloloŋ lotuŋa a Lebanon aŋuna a ekitoe a ŋol ka apotu ŋikito ŋulu ka ariet daadaŋ torinyiyosi aŋuna a ekitoe a ŋol.

¹⁶ Abu ayoŋ etamaranik ŋituŋa a ŋakwapin iirarete epite ŋolo aruunio ekitoe ŋol eritakin kwap, apaki ŋina emasarya ayoŋ iŋes nakibois a ŋikatwak kaapei ka ŋulu amaikina tolomasi nakipany. Apotu nai ŋikito daadaŋ ŋulu aya Eden ka ŋikito ŋulu ebusak ka ŋulu ebusak alo Lebanon ka daadaŋ ŋulu alomunito aneni aya ŋakipi tolakaros aŋuna ka aukor a ekitoe a ŋol.

¹⁷ Apotu ŋikito ŋul daŋ toloto nakibois a ŋikatwak kaapei ka ekitoe ŋol, torukosi nen ka ŋulu aaryo a ekileŋ ka ŋituŋa a ŋakwapin aŋuna ariito ka iŋes ta ŋulu eboiyete alotolim keŋ.

¹⁸ “Ekitoe ali alo Eden epedoryo akisikwaan ka iyoŋ anapolou kon a ŋina ailiilon ikimasakinio tokona iyoŋ kwap kaapei ka ŋikito a Eden, ikiwuakin nakibois a ŋikatwak, iperi iyoŋ aneni eperyoto ŋulu nyileŋeritae, aneni eperyoto ŋulu aaryo a ekileŋ. Erae Parao ka ŋajoresyo keŋ irworo Ekapolon ŋakiro kec a ne.”