Esek. 30 - Ebaibul

Akiolol aŋuna a Ijipit

¹ Abu Ekapolon kirwor neni kaŋ tema,

² “Lokoku a ituŋanan, todwar, tolimu ŋakiro nu atemar ebala Ekapolon Akuj, kiololou irworo ŋakiro nu, ‘Oitakoi! ebunit akoloŋit ŋina a ekabule!’

³ Tolimu ŋun, anerae aapuu akoloŋit ŋin, aapuu akoloŋit ŋina itiyakinia Ekapolon ŋuna ecamit, elalata ŋidouwon akoloŋit ŋin, eruwor apaki ŋin ŋina emunyarere ŋakwapin.

⁴ Epote ŋikaarak Ijipit etiŋito ŋileŋia, eyakaun ŋican Kuc Ani earyo Ŋijipitian, elemaryo ebari kec kiwokoroe iwace, eritakinio ŋaduketa keŋ kwap.

⁵ Earyo ŋituŋa a ŋakwapin a nu ka Ŋijipitian: Ŋulu a Kuc, ŋulu a Put, ŋulu a Lud ka ŋulu ka Arabia daadaŋ, ŋulu a Libiya ka ŋice alokidiŋ ŋituŋa ŋulu a akwap a ŋina ikicamuna ka ayoŋ.”

⁶ Alimu Ekapolon ŋakiro nu ebe, “Earyo ŋituŋa ŋulu eriito ka Ŋijipitian, itoŋopiyaryo agogoŋu ŋina ituror Ijipit. Ameun alo Migidol tari Siene, earakinio ikes nakwap kec a ekileŋ.

⁷ Eruwor ŋakiboisyo ŋun ŋuna esilok anakwap, eruwor ŋitaunio kec ŋireŋoroto ikwa ŋitaunio ŋulu sek erae ŋireŋoroto.

⁸ Eyenuniate nai ikes atemar arae ayoŋ Ekapolon apaki ŋina enokakinia ayoŋ Ijipit a akim, ido omunya ŋulu iŋarakinito iŋes daadaŋ.

⁹ “Akoloŋit ŋin, elosete aneni kaŋ ŋikiyakia edokito ŋameeli, kitukuryana ŋituŋa a Kuc ŋulu atenito akinup ŋakiro. Emini ekabule neni kec akoloŋit ŋina isicanere Ijipit, ebunit kire jik akoloŋit ŋin.

¹⁰ “Alimu Ekapolon Akuj ŋakiro nu ebe, Etasaluni ayoŋ ebari a Ijipit, esitiyae ayoŋ Nebukadinesar erwosit a Babilon tolema ebari ŋol.

¹¹ Epote Nebukadinesar ka ŋituŋa keŋ ŋulu aryenyaanak ŋulu iloito ŋituŋa a ŋakwapin, eyaunio ikes tomunaasi akwap a Ijipit, epote ikes akiar ŋituŋa a Ijipit a ŋileŋia kiletiletakis ŋawat nakwap a Ijipit daadaŋ.

¹² Etooniyori ayoŋ ŋakitelesyo a ŋakipi kon, epotok Ijipit neni a ŋulu epote akirem iŋes; ayauni ayoŋ ŋituŋa ŋulugelae yaut ekasile nakwap a Ijipit, kituruwosi ibore daadaŋ ŋini eyai Ijipit ikoŋinait. Ayoŋ Ekapolon alimu ŋun.

¹³ “Alimu Ekapolon Akuj ŋakiro nu ebe, Amunaari ayoŋ ŋakujo etasaluni ayoŋ ŋitorubei ŋulu eya Memipis; emamukaun anakwap a Ijipit erwosit nabo; aŋun, ewuakini ayoŋ akuryanu lotuŋa a akwap a Ijipit.

¹⁴ Eturuwori ayoŋ Pasiros ereŋorot, ecunyi ayoŋ Soan a akim, esicani ayoŋ ŋituŋa a Sebes.

¹⁵ Esicani ayoŋ ananyunyura kaŋ ŋituŋa a etaun a Pelusium, a etaun a Ijipit a ŋolo edukuk nooi; amunaari ayoŋ ebari a Sebes.

¹⁶ Ecunyari ayoŋ akwap a Ijipit; emini aryeba ŋina apolon nooi lotaun Pelusium; ebwaŋabwaŋakinio kwap ŋarwatatain a Sebes, eremete ŋimoe Mempis naparan.

¹⁷ Earyo ŋisorok ŋulu a ŋitaunio a lu: Eliopolis ka Bubasitis ka ikamarete ŋimoe ŋitaunio ŋul toriko ŋituŋa kec.

¹⁸ Emini akiryonut naparan lotaun Teapanes apaki ŋin ŋina alemarya ayoŋ agogoŋu aneni a Ŋijipitian, esaluni agogoŋu keŋ ŋina ituror iŋes. erapuwaryo Teapanes a ŋidouwon ka ikamaryo ŋirerya ŋulu idunyatar iŋes torikoe ŋituŋa kec.

¹⁹ Ani esicani ayoŋ Ijipit akoloŋit ŋin, eyenunete ikes atemar arae ayoŋ Ekapolon. ”

Kiserae ŋuna etoroniyaritere Parao

²⁰ Alokaru a ŋolo a ŋitomon ka epei, elap ŋolo ka epei, ŋirwa ka elap ŋikanikaarei, abu Ekapolon kirwor neni kaŋ tema,

²¹ “Lokoku a ituŋanan, adau ayoŋ alemar agogoŋ a Parao a erwosit a Ijipit; mam ituŋanan iŋarakini iŋes, ikotere egogoŋior, kori eriyete ka iŋes, ikotere egogoŋior toji a ekileŋ nabo.

²² Aŋun, alimu Ekapolon Akuj ŋakiro nu ebe, ‘Emanit ayoŋ Parao erwosit ŋolo a Ijipit. Alemari ayoŋ agogoŋu keŋ daadaŋ, ŋina sek eyakar ka ŋina iŋarakinit iŋes, ikotere tojoŋo ekileŋ keŋ akiar ŋituŋa.

²³ Eelari ayoŋ Ŋijipitian nakwapin, emyek ikes toloto nakwapin daadaŋ.

²⁴ Ewuakini ayoŋ agogoŋu neni a erwosit a Babilon, Oinak iŋes ekileŋ kaŋ totiŋ; nai alemari ayoŋ agogoŋu a Parao, ido kigwor irurumae alokiŋaren erwosit a Babilon lopite ŋolo igworor ituŋanan ŋini ewanitae nooi.

²⁵ Ewuakini ayoŋ agogoŋu neni a erwosit a Babilon, nai elilimiyorete ŋakan a Parao. Eyenunete nai Ŋijipitian atemar arae ayoŋ Ekapolon apaki ŋina ewuakinia ayoŋ ekileŋ kaŋ nakan a erwosit a Babilon. Edodari iŋes ekileŋ ŋol nakwap a ijipit imanit akwap a Ijipit,

²⁶ ido eelari ayoŋ Ŋijipitian nakwapin, emyek ikes toloto nakwapin daadaŋ. Eyenunete nai ikes a nen atemar arae ayoŋ Ekapolon.’ ”