Esek. 28 - Ebaibul

Kiserae ŋuna etoroniyaritere erwosit a Tiro

¹ Abu Ekapolon kirwor neni kaŋ tema,

² “Lokoku a ituŋanan, tolimok erwosit a Tiro atemar, alimu Ekapolon Akuj ŋakiro nu, ‘Anakituro ŋina eyai lotau kon,’ ibala iyoŋ ebe, ‘Arae ayoŋ akuj; eboi ayoŋ alokicoloŋ ikwapei iboiyoto ŋakujo, ayai ayoŋ kidiŋ jik ŋanamyo.’ Nai irae iyoŋ ibore ŋini etwani, meere iyoŋ akuj, tari daŋ kisikwaanit iyoŋ ŋatameta kon ka ŋuna ka akuj.

³ Kire jik, ioso iyoŋ akilo Daniel; mam ŋakiro ikimunonitae iyoŋ;

⁴ anaosou ka ayenut kon, idau iyoŋ akituk ebari kon, ituk iyoŋ egolid ka esilipa nakiboisyo ŋuna iŋadae iyoŋ ŋisiliŋa kon.

⁵ Anaosou kon a ŋina apolon a ŋina ka amucuruso, idau iyoŋ akiyatakin ebari kon, iturokin iyoŋ alotau kon aŋuna a ebari kon.

⁶ Aŋun, alimu tokona Ekapolon Akuj atemar, aŋuna isikwaania iyoŋ ŋatameta kon ka ŋuna ka akuj,

⁷ ayauni ayoŋ ŋituŋa ŋulugelaanotin ikiman iyoŋ, ayauni ayoŋ ŋituŋa ŋulu eryenyaaka anakwap nooi; eŋatarete ikes a ŋileŋia kec akibuses ŋina ka aosou kon. Emunaarete ikes apolou kon ŋina ailiilon

⁸ Ikiarete ikes iyoŋ ikimasakis nakipany, ikiaryo iyoŋ ka aryenyeo alotooma ŋanamyo.

⁹ Irubakini mono iyoŋ ibala, ‘Arae ayoŋ akuj; toyakas bo neni kon ŋikaarak iyoŋ a? Iruwor iyoŋ ibore ŋini etwani, meere akuj, apaki ŋina eponiata neni kon ŋikaarak iyoŋ.

¹⁰ Itwani iyoŋ irae eeŋok koŋin aneni a ŋigelaanotin a ŋulu ikiarete iyoŋ; ayoŋ Ekapolon adau alimun ŋun.’ ”

Akiolol aŋuna a erwosit a Tiro

¹¹ Abu nabo Ekapolon kirwor neni kaŋ tema,

¹² “Lokoku a ituŋanan, kiololo aŋuna a erwosit a Tiro, tolimok iŋes atemar, alimu Ekapolon Akuj ŋakiro nu, ‘Irae paaran iyoŋ akitaanyikinet a ibore a ŋini emam aronis, irae iyoŋ ŋolo ioso nooi ka ibus nooi.

¹³ Iboi iyoŋ paaran esibit iyai Eden, lomanikor ŋolo ka Akuj; apotu ŋamoru ŋuna epol egyelit daadaŋ ikisibusa iyoŋ inapit; ŋamoru ŋun ikes nu: Ŋuna areŋak puu ŋuna enyaritae Rubi, ŋuna enyaŋiyarito ŋuna enyaritae Topas, ŋuna inyalal ŋiraŋgi ŋuna enyaritae Diamon, ŋuna enyaŋiyarito ŋuna enyaritae Beril, ŋuna areŋak puu ŋuna enyaritae Oniks, ŋuna inyalal ŋiraŋgi ŋuna enyaritae Yasiper, ŋuna epusiyaka ŋuna enyaritae Sapire, ŋuna inyalal ŋiraŋgi ŋuna enyaritae Turikuoise, ŋuna alibak nooi ŋuna enyaritae Emerald ka egolid. Iyakar iyoŋ ŋinapito ŋulu enaminamitae egolid; aponi kitemonokinoe ŋinapito ŋul akoloŋit ŋina ikisubunere iyoŋ.

¹⁴ Abu ayoŋ ewuak emalaika ŋolo ikitubuli akitere iyoŋ; ibu iyoŋ kiboi alomukura a ŋolo asegan a ŋolo ka Akuj; itorenene iyoŋ kidiŋ ŋamoru ŋuna enepete.

¹⁵ Amam ŋakiro ikitoroniyaritere iyoŋ anakiro a ŋuna iwuapit iyoŋ ameun akoloŋit ŋina ikisubunere iyoŋ, akitodol apaki ŋina aryamunere asecit aneni kon.

¹⁶ Anakicuruta kon a ŋina alalan nooi, abu aryenyeo kilelebun neni kon, ido ibu iyoŋ tosec; aŋun, abu ayoŋ okojal iyoŋ ikwa ibore ŋini eturuwor ikoŋinait alomukura a ŋolo ka Akuj, abu nai emalaika ŋolo ikiyoki iyoŋ a nen ikirita iyoŋ alokidiŋ ŋamoru ŋuna anepete.

¹⁷ Ibu iyoŋ kiturokin nooi alotau kon aŋuna ka akibuses kon; ibu iyoŋ tomunaa aosou kon, aŋuna ka ailiil kon anapolou. Aŋun, eketolomari ayoŋ iyoŋ kwap; ekesileerekini ayoŋ iyoŋ neni a ŋirwosi, ikotere ikes ikiteete iyoŋ irae ecaryoit.

¹⁸ Anasecisya kon a ŋuna alalak ka anamucuruso kon a ŋina pa eyookino, idau iyoŋ akiyany ŋakiboisyo kon ŋuna asegak. Aŋun, abu ayoŋ etolomu akim alokidiŋ etaun kon; abu akim ŋin tonyamuwa etaun kon, abu ayoŋ eturuwo etaun kon ekuron ŋolo eperi alokwap, abu ayoŋ eturuwo etaun kon ekuron alokiŋaren ŋituŋa daadaŋ ŋulu iteete iŋes tokona.

¹⁹ Akadaki ŋituŋa a ŋakwapin ŋulu ikiyenete iyoŋ; idaun iyoŋ jik, nyiyakaun nabo iyoŋ jik ŋikaru ka ŋikaru.’ ”

Kiserae ŋuna etoroniyaritere etaun Sidon

²⁰ Abu Ekapolon kirwor neni kaŋ tema,

²¹ “Lokoku a ituŋanan, kiŋoliya lowae ŋolo eyai etaun Sidon, ido todwar ŋakiro nu itoroniyarit ŋituŋa keŋ.

²² Tolimok ikes atemar, alimu Ekapolon Akuj ŋakiro nu, ‘Okoe ŋituŋa a Sidon, ekemanit ayoŋ iyes, eketopoloorete ayoŋ ŋituŋa kon. Eyenunete ikes atemar arae ayoŋ Ekapolon, eyenunete ikes ŋun apaki ŋina esicania ayoŋ ikes, etoodiun ayoŋ neni kec arae ŋolo asegan alotooma Sidon.

²³ Eyakiyari ayoŋ edeke lotuŋa a Sidon aari ayoŋ ŋituŋa toleleiyasi ŋaokot alorotin a Sidon. Earyo ŋituŋa alotooma Sidon, irikaunete Sidon, ŋikaarak alowaetin a daadaŋ. Apaki nai ŋin eyenuniata ikes atemar arae ayoŋ Ekapolon.

²⁴ “‘Nyeryamunete nabo Ŋisirael ŋikidunyet ŋulu enyasak ŋulu a ŋiman, ŋulu ikwaan ka ibore ŋinikwaam ŋini epipil ikimeme, kori ŋulu ikwaan ka ŋikukwa ŋulu eitaaka. Eyenunete ikes apaki ŋin atemar arae ayoŋ Ekapolon Akuj.’”

Ŋarereŋisyo ŋuna epote Isirael

²⁵ Alimu Ekapolon Akuj ŋakiro nu ebe, “Ani acununi ayoŋ Ŋisirael alotuŋa a ŋakwapin a ŋuna ielakina ikes, etoodikin ayoŋ neni kec eketeete ŋituŋa a ŋakwapin arae ŋolo asegan, iboikinosi nai Ŋisirael nakwap kec ŋina abu ayoŋ oinak eketiyan kaŋ Yakob.

²⁶ Iboikinosi ikes nen emam awasya, edukokinete ikes ŋakais nen ka itakinete ŋikito a epiini nen. Iboikinosi ikes nen emam awasya apaki ŋina esicania ayoŋ ŋikidunyet kec daadaŋ ŋulu apotu kinyasa ikes imanito. Eyenunete nai Ŋisirael apaki ŋin atemar arae ayoŋ Ekapolon Akuj kec.”