Esek. 26 - Ebaibul

Kiserae ŋuna etoroniyaritere akwap a Tiro

¹ Alokaru a ŋolo a ŋitomon ka epei, ŋirwa ke elap epei, abu Ekapolon kirwor neni kaŋ tema,

² “Lokoku a ituŋanan, aŋuna aponiata ŋituŋa a Tiro temasi neni a Yerusalem ebe, ‘Coe! Kebilibiliyar etaun ŋolo itoreneneete ŋituŋa a ŋakwapin; edoŋ ŋipukei keŋ itaditadasi eŋaara aŋuna kosi; ebaryo nai tokona isua, anerae nyeriŋa Yerusalem ejokuni.’

³ Aŋun, alimu tokona Ekapolon Akuj ebe, ‘Okoe Tiro! Ekemanit ayoŋ iyoŋ, ekesimani ayoŋ iyoŋ ŋituŋa a ŋakwapin a ŋuna alalak, ebukunosi ikes neni kon lopite ŋolo ebukotor ŋikaguragurae a ŋakipi ananam.

⁴ Emunaarete ŋituŋa ŋul ŋarwatatain ŋuna a Tiro, ebwaŋabwaŋakinete kwap ŋaduketa a Tiro ŋuna aoyak. Ekesikisaari ayoŋ ŋalup alo Tiro eturuwo Tiro ataaba ŋina emam ŋalup.

⁵ Eruwor Tiro akibois ŋina eyai kidiŋ anam, ŋina epetanakinio ŋatibae a ŋikolya. Abala Ekapolon adau iŋes alimun ŋun. Eruwor Tiro akibois ŋina eŋatarete ŋituŋa aŋakwpin,

⁶ ŋituŋa ŋulu iboiyete alotaunio a ŋulu eyakasi tooma keŋ daŋ, emunyaryo a ekileŋ. Ŋun nai eyenuniata ikes atemar arae ayoŋ Ekapolon.’

⁷ “Alimu Ekapolon Akuj atemar, ainakini ayoŋ erwosit ŋolo eyai lowae ŋolo alo Kuju kiman Tiro, erae erwosit ŋol Nebukadinesar, erwosit a Babilon, ŋolo epukat ŋirwosi ŋuluce. Ebuni erwosit ŋol eyakar ŋaŋolei, ŋagaari ŋuna iritae aŋaŋolei, ŋasigarya ŋuna elosete a ŋaŋolei ka ŋasigarya ŋace ŋuna alalak nooi ŋuna agogoŋok nooi.

⁸ ŋituŋa ŋulu iboiyete alotaunio a ŋulu eyakasi tooma Tiro daŋ, emunyaryo a ekileŋ. Ikirikauni iyoŋ Tiro erwosit ŋol ikimanit, etuki akititis narwatata kon ecamit alomunia tooma kon aŋuna ikimanitor, igakinete ŋasigarya keŋ a ŋaupala kec, ikitijikis iyoŋ aŋuna ikimanitotor.

⁹ Ijukakini iŋes narwatatain kon ŋiboorei ŋulu bwaŋabwaŋaet arwatata, eyepanakini kwap a ŋaepe ŋaduketa kon ŋuna aoyak.

¹⁰ Iudun neni kon ŋaŋolei keŋ ŋuna alalak nooi, ido ikirapuwari iyoŋ apuwa kec Ani eruunete ŋaŋolei, ŋakejen a ŋagaari ka ŋagaari, iloilookin ŋarwatatain kon daadaŋ, iloilookin ŋarwatatain kon elomunete ikes tooma kon lopite ŋolo elomuniata ŋimoe lotaun ŋolo apedepedoi arwatata keŋ.

¹¹ Ipudaarete ŋaŋolei a erwosit a ŋol ŋirotin daadaŋ ŋulu a etaun kon Tiro. Eari erwosit ŋol ŋituŋa kon a ekileŋ, ebilibilakini kwap ŋipirin ŋulu agogoŋok ŋulu aduketait kon.

¹² Eŋatarete ŋituŋa ebari kon, elemarete ŋiboro kon ŋulu iŋadat iyoŋ, ebwaŋabwaŋakinete kwap narwatatain kon, tomunaasi ŋakais kon ŋun ŋuna ebusak. Imasakinete nakipi ŋamoru kon, ŋabaoi kon ka ŋalup kon.

¹³ Ekisililiŋi ayoŋ iyes nyieikis ŋieosyo kus; nyiiraryo nabo jik eruye aŋagitae kus.

¹⁴ Eketuruwori ayoŋ iyoŋ ataaba ŋina emam ibore eyai; Iruwor iyoŋ akibois ŋina epesere ŋatibae. Nyikidukokinio nabo iyoŋ jik, anerae ayoŋ Ekapolon alimu ŋun.

¹⁵ “Alimu Ekapolon Akuj ŋakiro nu neni a Tiro, nyemaranikinete mono ŋituŋa ŋulu iboiyete alodiyete anam iirarete akigworo ŋina ka alemaro kus, apaki ŋina eumenioto ŋulu ewanawanatae ka ŋina earere ŋituŋa aneni kon Tiro a?

¹⁶ Apaki ŋin, eŋerete ŋirwosi daadaŋ ŋulu a ŋiculeta ka anam araakau ŋirwosi, elacarete ŋikaasoi kec ŋulu eraakatar ŋirwosi, elacarete ŋilowi kec ŋulu isibusitae. Emaranikinete ikes ebulit nooi ka iboikinosi kwap; emini amaran neni kec a ŋinapaki iŋolikinete ŋican ŋulu iryamut iyes.

¹⁷ Egeunete nai ikes akiolol aŋuna kus ebasi, ‘Okoe! Alemar bareca etaun ŋolo arwon alotaunio a ŋulu ka anam, irae sek iyoŋ etaun a ŋikilyok a ŋulu eyenete akitiya nanam, ŋituŋa kon sek arae ŋitirunoe ŋulu ka anam. Iyes ŋituŋa ŋulu iboiyete alo Tiro iyaut ekabule neni a ŋituŋa a daadaŋ a ŋulu iboiyete a nen.

¹⁸ Amaranikis tokona ŋituŋa ŋulu iboiyete alodiyete anam aŋuna eŋolikiniata akoloŋit ŋina ikilemarere iyes. Akadaki ŋituŋa ŋulu iboiyete alodiyete anam iŋolikinete epite ŋolo idaunotor iyes.’

¹⁹ “Alimu Ekapolon Akuj atemar, ani eketuruwori ayoŋ iyoŋ Tiro ereŋorot koŋin, ikwa ŋitaunio ŋulu emam ituŋanan eyai ka ani akasipori ayoŋ iyoŋ kwap anam ikilelyaasi ŋakipi,

²⁰ apaki ŋin nai ekewuakinia ayoŋ iyoŋ nakibois a ŋikatwak, kimorikinos ka ŋituŋa ŋulu koloŋ sek kiboiyete anakwap. Ekemyekini ayoŋ iyoŋ kiboi anakibois a ŋin a ŋina erubakini emunaara ŋikaru ka ŋikaru, irubakini iyoŋ Tiro iyai nen ka ŋulu adaut atwakare, ikotere todaun ituŋanan iboikin tooma kon, kori nyimin nabo jik neni eyakasi ŋituŋa ŋulu eyarete.

²¹ Eketasaluni ayoŋ iyoŋ a ŋinyas a ŋulu ikitubulete nooi ka nyiyakaun nabo iyoŋ jik. Iwarete ŋituŋa akiŋolikin iyoŋ, nai nyikiryamunete ikes iyoŋ jik.”