Esek. 25 - Ebaibul

Kiserae ŋuna etoroniyaritere akwap ŋina ka Amon

¹ Abu Ekapolon kirwor neni kaŋ tema,

² “Lokoku a ituŋanan, kiŋoliya lowae ŋolo eya Ŋiamoni, ido todwar ŋakiro nu neni kec itoroniyarit ikes.

³ Tolimok Ŋiamoni atemar, kiirasi ŋakiro a Ekapolon Akuj, alimu Ekapolon Akuj atemar, aŋuna iponiata iyes itemasi, ‘Coe’ nakibois kaŋ ŋina asegan apaki ŋina iponiata iyes tojamuwasi, aŋuna iponiata iyes tolelyana apaki ŋina etisilunere akwap a Isirael ka aŋuna iponiata iyes kitiyata ŋun lotuŋa a Yudaya apaki ŋina aayere erae ŋirikon;

⁴ alosi ayoŋ tokona akipotokin iyes lotuŋa ŋulu alowae a ŋolo alo Kide, toruworos iyes ŋulu a ŋituŋa a ŋul. Isiboikinete ikes ŋajorei kec kidiŋ kus, igurokinete ŋiemae kec kidiŋ kus, enyamete ŋaraito kus ka emasete ŋakile kus.

⁵ Eturuwori ayoŋ Raba neni edakasi ŋikaala ka eturuwori Amon neni euryaketa ŋamesekin, ŋun nai iyenuniata iyes atemar arae ayoŋ Ekapolon.

⁶ Irworo Ekapolon Akuj ŋakiro nu, atemar, aŋuna iponiata iyes kibapibapata ŋakan kus ka toramanakis ŋakejen kus kwap ilelyanete aŋuna a ŋinyas a daadaŋ a ŋulu eya lotai kus a ŋulu imanitotor akwap a Isirael,

⁷ akatapi tokona ayoŋ iyes akan kaŋ ekemanit, ido ekepoto iyes irae ŋulu ikiŋatarito ŋituŋa a ŋakwapin. Akamunyari ayoŋ iyes alotuŋa a ŋul ka eketasaluni ayoŋ iyes anakiboisyo a ŋuna ikiyayo. Akamunyari ayoŋ iyes ka iyenunete iyes atemar arae ayoŋ Ekapolon.”

Kiserae ŋuna etoroniyaritere akwap ŋina a Moab

⁸ “Alimu Ekapolon Akuj atemar, aŋuna aponiata ŋituŋa a Moab tolimut ebe, ‘Kiŋolikisi, ekwaanikin ŋituŋa a Yudaya ka ŋulu a ŋakwapin a ŋunace,’

⁹ aŋun, alosi tokona ayoŋ aŋakin ŋimoe kitijioto ŋitaunio ŋulu eyakasi lokukorin a Moab, kitijioto tari ŋitaunio a Moab ŋulu ebusak nooi lu: Bes-Yesimos, Baal-Meon ka Kiriasaim.

¹⁰ Epotori ayoŋ Moab kaapei ka Amon neni a ŋituŋa a ŋulu alowae a ŋolo alo Kide, toruworos ikes ŋulu a ŋituŋa a ŋul, ikotere ejoŋoete ŋituŋa aŋakwapin atamunit Ŋiamoni.

¹¹ Esicani ayoŋ ŋituŋa a Moab ka eyenunete ikes atemar arae ayoŋ Ekapolon.”

Kiserae ŋuna etoroniyaritere akwap a Edom

¹² “Alimu Ekapolon Akuj atemar, aŋuna aponiata ŋituŋa a Edom kitiyata anyaŋan lotuŋa a Yudaya, ido iilit ikes aŋuna ka asecit a ŋin,

¹³ alimu tokona Ekapolon Akuj atemar esicani ayoŋ Edom emanit, aari ayoŋ ŋituŋa ka ŋityaŋ ŋulu eya nen; emyek Edom erae ereŋorot koŋin. Emunyaryo a ekileŋ ŋituŋa a Edom akisyakin alo Teman akitodol Dedan.

¹⁴ Ayai ayoŋ anyaŋan kaŋ Edom, esitiyae ayoŋ ŋituŋa kaŋ Ŋisirael akitiya anyaŋan ŋin. Iteyenikinete ŋuna itiyaete Ŋisirael akitiya anyaŋan ŋin. Iteyenikinete ŋuna itiyaete Ŋisirael ŋituŋa a Edom epite ŋolo aŋoitor ayoŋ ka ŋolo anyunyurar, eyenunete ŋituŋa a Edom epite ŋolo enyaŋia ayoŋ.”

Kiserae ŋuna etoroniyaritere akwap a Pilistia

¹⁵ “Alimu Ekapolon Akuj atemar, aŋuna aponiata Ŋipilistin tomasikis itiyaete anyaŋan eryenyanikinito ŋimoe kec aloman aŋuluŋorok ka aŋuna aponiata kiwara amunyar ikes,

¹⁶ alimu tokona Ekapolon Akuj atemar esicani ayoŋ Ŋipilistin emanit, aari ayoŋ Ŋikeresi ka amunyari ŋituŋa daadaŋ ŋulu elomito diyete Anam Mediteranian.

¹⁷ Alosi ayoŋ akitiya anyaŋan ŋina apolon neni kec esican ikes anyunyurikinit. Eyenunete nai ikes atemar arae ayoŋ Ekapolon. Eyenunete ikes ŋun apaki ŋina eyakaunor anyaŋan neni kec.”