Esek. 22 - Ebaibul

Etaun ŋolo arere ŋituŋa

¹ Abu Ekapolon kirwor neni kaŋ tema,

² “Lokoku a ituŋanan, itemokino iyoŋ atubokin Yerusalem a? Itemokino iyoŋ atubokin etaun ŋolo earere ŋituŋa lo a? kisileerek nai tokona ŋituŋa a Yerusalem ŋakiro ŋuna ka asiilyo daadaŋ ŋuna itiyaete ikes.

³ Tolimok ikes atemar alimu Ekapolon Akuj ŋakiro nu, ‘Okoe ŋituŋa a Yerusalem, iyes ŋulu iyaut amunyaro kus neni kus aŋuna iaryata ŋituŋa kus pei ka aŋuna imunaarotor make anakitiya ŋakujo, aapuu tokona apaki kus.

⁴ Iruworosi iyes ŋikasecak aŋuna iaryata ŋituŋa ŋuluce ka imunaarosi iyes anakujo a ŋuna itiyaut iyes. Itaapuut iyes akoloŋit kus, adaun ŋikaru kus. Aŋun, eketuruwori ayoŋ iyes ŋulu ikikyenare anakwapin ka ŋulu ikisoloo anakiboisyo a daadaŋ.

⁵ Ikisoloete iyes ŋituŋa ŋulu iboiyete alodiyete kus ka ŋulu elwaka aneni kus, anerae nyeriŋa etaun kus erae ŋolo eyenen, aruwor ŋolo a egurigur.

⁶ “‘Adaut ŋikarikok a Isirael daadaŋ ŋulu iboiyete alo Yerusalem akikinyom agogoŋu kec a ŋikulepek aarya ŋituŋa ŋuluce.

⁷ Alotooma kon Yerusalem nyeriŋa ŋituŋa ekerito atapapa kec, kori atatoto kec; alotooma kon Yerusalem, iteryamunito iyes ŋigelaanotin ŋican ka isicanito iyes ŋikokyok ta ŋapuseru.

⁸ Ijamuwasi iyes ŋiboro kaŋ ŋulu asegak ka nyeriŋa itamunito ŋirwa ŋulu a Sabato.

⁹ Eyakasi tooma kon Yerusalem ŋituŋa ŋulu isudete ŋakiro neni a ŋuluce ikotere earyo ŋulu isudokinitae ŋakiro. Eyakasi tooma kon ŋituŋa ŋulu enyamete ŋamuronisya ŋuna eayeneneo nakiboisyo ŋunamukur ka itiyaete aleeco aneni kon.

¹⁰ Eyakasi tooma kon ŋikilyok ŋulu iryamanakin ka ŋaberu atapapa kec, eyakasi tooma kon ŋikilyok ŋulu iryamanakin ka ŋaberu ŋuna eriŋa eyakasi lolap.

¹¹ Eyakasi tooma kon ŋikilyok ŋulu itiyaete asiilyo neni a ŋaberu a ŋikidunyet kec, itiyaete ŋice aleeco neni a ŋapesur a ŋuna eyenasi ka ŋaberu kec, iryamanakin ŋice alotooma kon ka ŋakaitotoi kec, kori ŋakaipapae kec.

¹² Eyakasi tooma kon ŋikilyok ŋulu ecamununuyete ŋakaluŋuluŋui aŋuna ka aarya ŋuluce; ijaanarete ikes ŋisiliŋa, ido kiyatakis ŋice neni a ŋulu idenikinitoe sek ituŋanan kec pei Esiraelit, ido abarakis ikes namodyanakin ŋikidunyet kec. Nyeriŋa ikes akamisito ayoŋ.

¹³ “‘Kiirasi, ebapibapakini ayoŋ ŋakan kaŋ aŋuna iryamununiata iyes ŋiboro alopite a ŋolo nyiyookino ka aŋuna iaryata iyes ŋituŋa ŋuluce alokidiŋ kus.

¹⁴ Itamete mono iyes atemar irubakinete iyakatar atitinyu, kori agogoŋu anakan kus ŋina ipedoryata ajio akoloŋit ŋina akatapya ayoŋ iyes a? Ayoŋ Ekapolon alimu ŋun ka etiyakini ayoŋ ŋun.

¹⁵ Ekeelari ayoŋ iyes nakwapin ka eketorotokini iyes nakiboisyo ŋuna alalak ka etasaluni ayoŋ aronis ŋina itiyaete iyes.

¹⁶ Ekaku kikijamuwasi iyes ŋituŋa a ŋakwapin, iyenunete iyes atemar arae ayoŋ Ekapolon.’ ”

¹⁷ Abu Ekapolon Kirwor neni kaŋ tema,

¹⁸ “Lokoku a ituŋanan, aruwor Ŋisirael ŋicaryo aneni kaŋ. Ekwaanikin ikes ka ŋasuwa nu ŋuna edaun ajokis tari keboŋokin akiwuakin lokitet: Esilipa, eburonis, asuwat ŋina enyaritae tin, asuwat ŋina agogoŋon ka asuwat ŋina apotyon.

¹⁹ Aŋun, alimu Ekapolon Akuj atemar, aŋuna iruworotor iyes daadaŋ ŋicaryo aneni kaŋ, akacunakini ayoŋ iyes daadaŋ Yerusalem.

²⁰ Lopite ŋolopei ecunakiniata ŋituŋa lokitet esilipa, eburonis, ŋasuwa ŋunagogoŋ, ŋasuwa ŋuna apotyok ka ŋasuwa ŋuna enyaritae tin, akacunakini ayoŋ iyes Yerusalem ekenokak aŋuna ka aŋoit ka anyunyura kaŋ.

²¹ Akacunakini ayoŋ iyes nen eketulek aŋoit a ŋina ka anyunyura kaŋ, ikotere itonom iyes a nen totalasi ikwa ŋasuwa.

²² Lopite ŋolopei etalanarere esilipa alokitet, iyes daŋ ikitalaryo alo Yerusalem ka iyenunete iyes atemar ayoŋ Ekapolon abuku anyunyura kaŋ neni kus.”

²³ Abu nabo Ekapolon kirwor neni kaŋ tema,

²⁴ “Lokoku a ituŋanan, tolimok Ŋisirael atemar nyerae akwap kec ŋina itesegitae, mam akiru abu min neni keŋ akoloŋit ŋina abunio ayoŋ onyunyur aŋuna keŋ.

²⁵ Ekwaanikin ŋikarikok a akwap kec ka ŋiŋatunyo ŋulu irurumaete apaki ŋina enyamyata etyaŋ; adaut ŋikarikok kec amunyar ŋituŋa, alemasi ebari ka ŋiboro ŋulu epol egyelit, etalalata anakwap kec ŋapuseru.

²⁶ Etiyata ŋisacaradotin anakwap kec ŋakiro ŋuna nyecamakinito ŋikisila kaŋ, esitiyata ŋiboro kaŋ ŋulu asegak alopite a ŋolo aronon, nyeyenete atemar nyaalu ŋiboro ŋulu asegak ka ŋulu nyesegak, mam daŋ nyitatama ikes ŋituŋa toyenut ibore ŋini itoroniyaritae ka ŋini nyitoroniyaritae, aŋero ikes atamunit ŋarwa kaŋ ŋuna a Sabato, aŋun, adaut ikes ajamuwar ayoŋ alokidiŋ kec.

²⁷ Ekwaanikin ŋikarikok a akwap kec ka ŋipeei ŋulu enyamete etyaŋ; earete ŋituŋa ka amunyasi ŋituŋa aŋuna ka aryamun ibore ŋinidemuna ŋinice.

²⁸ Imunonito ŋikadwarak keŋ ŋakiro ŋuna itiyao a nen, elimonokinete ŋituŋa ŋakitoodyanakineta ŋuna ka alyokonu ka edwarete ŋakiro ŋuna erae alyokonu. Ebasi, ‘Ŋakiro ŋuna irworo Ekapolon Akuj ikes nu. Tomam bo ŋuna elimunit Ekapolon.

²⁹ Adaut ŋituŋa a akwap kec akitiya ŋakiro ŋuna ka ademonu ka akoko; iteryamunito ikes ŋikulyak ka ŋulu eyakatar akiitanit ŋican, adema ikes ŋiboro aneni a ŋigelaanotin etamete atemar mam ŋul ajokis ayakar ŋiboro.

³⁰ Abu ayoŋ ewar aneni kec ituŋanan ŋini epedori adukokin nabo arwatata, ido towo anakiboisyo a ŋuna aritaanara anarwatata, toji aŋuna ka akwap keŋ alokiŋaren kaŋ, ikotere nai ayoŋ nyamunya akwap keŋ. Nai mam aneni kec ituŋanan abu ayoŋ oryamu.

³¹ Aŋun, abukokini ayoŋ anyunyura kaŋ neni kec, opyea ikes anaŋoit a ŋina ka anyunyura kaŋ; adau ayoŋ akimyekin ŋakiro ŋuna itiyaete ikes pena nakyes kec pei.’ ”