Esek. 19 - Ebaibul

Kituruworoe ŋirwosi a Isirael ŋicaryo

¹ Abu Ekapolon okolimok ayoŋ aeikin eete ŋolo ka aumonokin lo aŋuna a ŋidwe a ŋiarei a ŋulu a ŋirwosi a Isirael.

² Ŋakiro a eete nu, “Okoe arae toto kon aŋatuny ŋina eloit ŋanatunyo ŋunace! Amina iŋes auryan alokidiŋ ŋiŋatunyo ŋulusorok ka etani ŋitak keŋ.

³ Abu kitopolou itaok keŋ ipei, ŋini abu toyenik akikam ibore ŋininyamat, ido abu tonyam ŋituŋa.

⁴ Apotu ŋituŋa a ŋakwapin toramakis eli aŋuna ka akiman iŋes, ido apotu kitolomasi nakipany ŋina abokito ikes; kiriut a nen a ŋikodoce, yaasi nakwap ŋina a Ijipit.

⁵ Ani eanyuni aŋatuny ŋin atemar kedaun akikinyoma aneni keŋ ka kedaun akigeno aneni keŋ, abu tolemu ice alotak keŋ, kituruwo eŋatuny ŋolo agogoŋon.

⁶ Abu eŋatuny ŋol kirimok iwarit ibore ŋiniarat, anerae abu toruwor eŋatuny ŋolo agogoŋon, ŋolo abu toyenik akikam ibore ŋininyamat, ido abu tonyam ŋituŋa.

⁷ Abu eŋatuny ŋol toritanak kwap ŋarwatatain a ŋitaunio a ŋituŋa a ŋul, ido abu tomunaiya ŋitaunio kec. Abu eruye a eŋatuny a ŋol yau ekabule neni a ŋituŋa ka akwap a ŋin ka neni a ibore a daadaŋ a ŋini ayai nakwap ŋin.

⁸ Apotu nai ŋakwapin kimana iŋes, apotu ŋituŋa tocunun anakiboisyo a daadaŋ, Apotu toterosi ŋatibae kec ecamito akisurum iŋes, ido apotu kisuruma iŋes.

⁹ Apotu torikosi iŋes a ŋikodoce, kiwuakis neni pa apedorya alomun kiŋa, ido apotu todakasi anibore a ŋin yaasi neni a erwosit a Babilon kiwuakinae a nen lojera, tojoŋoto Ŋisirael akipup eruye keŋ alomoru a ŋulu alo Isirael.

¹⁰ Aponi tolimokinae iŋes atemar ekoni koloŋ toto kon ekitoe a epiini ŋolo eyai lomanikor a epiini, ŋolo edupakinitae diyete ŋakipi, ŋolo erai ejok nooi ka alalak ŋaten aŋuna ayakar diyete ŋakipi ŋuna alalak.

¹¹ Aponi atorom keŋ ŋina agogoŋon nooi ŋin tolemunae toruwor ebela a erwosit. Abu sek ekitoe a epiini ŋol tooyaar kileŋ ŋaten ŋuna ka amoni a nen, Abu ekitoe ŋol kileereu a nen erae ŋolo eoya nooi ka ayakar ŋaten ŋuna alalak nooi.

¹² Nai apotu ŋituŋa ŋulu aŋoito torutut iŋes, kimasakis kwap. Abu ekuwuam ŋolo akutunit alo Kide kitooniyo iŋes, toraraar ŋaraito keŋ, toiniya atorom keŋ ŋin ŋina agogoŋon, ido abu akim tonomiya.

¹³ Adupar tokona ekitoe ŋol naloŋisat naonite ka nakwap ŋina emam ŋakipi.

¹⁴ Amyaa akim ŋinapei anatorom keŋ, anomiya ŋaten keŋ ka ŋaraito keŋ. Emam nabo atorom keŋ ŋina agogoŋon ŋin neni idoŋit, neni emaikina tolemunae ebela a erwosit. “Erae lo eete ŋolo ka aumonokin ka emaikina kisitiyae erae eete ŋolo ka aumonokin.”