Esek. 14 - Ebaibul

Kisiyookinoe atubokino ŋina ka Akuj

¹ Apotu ŋikasikou a Isirael ŋice potu neni kaŋ, kiboikinos kiŋaren kaŋ.

² Abu nai Ekapolon kirwor neni kaŋ tema,

³ “Lokoku a ituŋanan, adaut ŋikilyok lu akiwuakin ŋitai kec neni a ŋakujo ka imyekinito ŋakujo erikorete ikes nasecit. Etamete mono ikes atemar aboŋokini ayoŋ ŋuna iŋikitasi ikes a?

⁴ Aŋun, kirwor neni kec tolimok ebe, ‘Alimu Ekapolon Akuj ŋakiro nu atemar ani kiwuak ituŋanan idio etau keŋ neni a ŋakujo ka kimyek aronis erikori iŋes nasecit, ido ani kitiyata ŋun, tolot neni a ekadwaran, ayoŋ Ekapolon aboŋokini iŋes ŋini ebuni, aboŋokini ayoŋ iŋes alotyae a ŋolo a ŋakujo keŋ.

⁵ Etiyae ayoŋ ŋun, ikotere enyakuni ŋitai a ŋituŋa kaŋ a Ŋisirael neni kaŋ, ŋituŋa kaŋ ŋulu akaesikis ayoŋ daadaŋ, ŋulu alot neni a ŋakujo.’

⁶ “Aŋun, tolimok Ŋisirael atemar ŋakiro ŋuna irworo Ekapolon Akuj ikes nu, ‘Tokiwa asecit kus, ido toboŋutu aneni aŋakujo kus ka kikoŋosi akitiya ŋuna ka asiilyo daadaŋ ŋuna itiyaete iyes.

⁷ Ani kelot aneni kaŋ Esiraelit edio, kori ituŋanan ŋinigelaanot ŋini iboi alo Isirael, kiwuak etau keŋ neni a ŋakujo ka kimyek aronis erikori iŋes nasecit, ido ani kitiya ŋun, tolot neni a ekadwaran, akiŋit ŋuna abala ayoŋ, ayoŋ Ekapolon elope aboŋokini iŋes.

⁸ Etoroniyari ayoŋ ituŋanan ŋini itiyae ŋun. Eturuwori ayoŋ ituŋanan ŋini itiyae ŋun akitoodikinet, ibore ŋinicaryoit ka alemari ayoŋ iŋes alotuŋa kaŋ; ido iyenunete iyes atemar arae ayoŋ Ekapolon.

⁹ “‘Ani kemodikin ekadwaran, ido todwar akirot adio, erae ayoŋ Ekapolon amodikinit iŋes, ido esicani ayoŋ ekadwaran ŋol olema alotuŋa kaŋ alo Isirael.

¹⁰ Eryamunete ekadwaran ŋol ka ŋini eŋita ŋakiro aneni keŋ akisicanet ŋina ikwaan;

¹¹ ikotere nai Ŋisirael nyeoliyosi nabo anakiwuapit ŋakiro kaŋ, kori nyemunaasi nabo ŋawat kec a ŋasecisya kec a daadaŋ. Eruwor nai ikes ŋituŋa kaŋ ka aruwor Akuj kec.’ ”

¹² Abu Ekapolon kirwor neni kaŋ tema,

¹³ “Lokoku a ituŋanan, ani keseca ŋituŋa a akwap alotooma amamukau anupit neni kaŋ, ido esican ayoŋ akwap ŋin, alemari ayoŋ akimuj oinak ikes eron tomunya ŋituŋa ka ŋibaren keŋ;

¹⁴ kerae toriŋa tari ŋikilyok lu ŋiuni Noa, Daniel ka Yob iboiyete anakwap a ŋin, keiuna ŋuluuni ŋul aŋuna ka akiyookino kec.

¹⁵ Ani keyakiya ayoŋ ŋityaŋ ŋulu anyamak nakwap ŋin daadaŋ, kirikasi ibore daadaŋ ŋini eyai nen kidoŋ akwap esil emam ibore, emam ituŋanan epedori akitor nen aŋuna a ŋityaŋ;

¹⁶ alimu Ekapolon Akuj atemar, ikwapei ayarya ayoŋ, kerae tari toriŋa ŋikilyok ŋuluuni ŋul eyakasi nakwap ŋin, pa keiunito ŋidwe kec ŋulusapa, kori ŋulupesur. Kerae ikes bon ŋikulepek eiuna, nai toris akwap kec asilu.

¹⁷ Kori ani kayau ayoŋ ŋimoe toremo akwap ŋin, otema ayoŋ, ‘Emaikina ŋimoe kikamasi akwap ŋin daadaŋ,’ ido oar ayoŋ anakwap a ŋin ŋituŋa ka ŋibaren,

¹⁸ alimu Ekapolon Akuj atemar ikwapei kire jik ayarya ayoŋ, kerae tari toriŋa ŋikilyok ŋuluuni ŋul eyakasi nakwap ŋin, pa keiunito ŋidwe kec ŋulusapa, kori ŋulupesur, nai kerae ikes bon ŋikulepek eiuna.

¹⁹ Kori ani keyakiya ayoŋ edeke nakwap ŋin, obuko anakwap a ŋin ŋaokot alotooma anyunyura kaŋ, oar ŋituŋa ka ŋibaren a akwap a ŋin,

²⁰ alimu Ekapolon Akuj atemar ikwapei kire jik ayarya ayoŋ, kerae tari toriŋa Noa, Daniel ka Yob eyakasi nakwap ŋin, pa keiunito ŋidwe kec ŋulupesur, kori ŋulusapa. Keiun ŋuluuni ŋul aŋuna ka akiyookino kec.

²¹ “Ŋuna iŋita Ekapolon Akuj ikes nu, ‘Etya nai ai epite ŋolo erokyarotor ŋakiro alo Yerusalem apaki ŋina eyakuunia ayoŋ ŋakisicaneta kaŋ ŋuna apipilak ŋaomwon? Ŋimoe, eron ka ŋityaŋ ŋulu anyamak ta ŋidekesyo, tomunyasi ŋul ŋituŋa ka ŋibaren a Yerusalem.’

²² Tari keyakaun ŋul, epiyanun alo Yerusalem ŋituŋa ŋice, eyaunete ŋituŋa ŋul ŋidwe kec ŋulusapa ka ŋulupesur kiŋa etaun. Epote ikes neni kon Esekiel, ani iŋolikini iyoŋ ŋipitesyo ka ŋiticisyo kec, etikiun etau kon aŋuna iŋolikinia atemar iyookino akisicanet ŋina abu ayoŋ oyau Yerusalem, ikilimokinete iyoŋ ŋakisicaneta daadaŋ ŋuna etiya ayoŋ nen atemar iyookino ŋakiro ŋuna abunio ayoŋ esicania Yerusalem.

²³ Etikiun etau kon iŋolikini iyoŋ ŋipitesyo ka ŋiticisyo kec, anerae ianyuni iyoŋ atemar nyitiya ayoŋ ŋadi neni a ŋituŋa a Yerusalem pa edyakarito ikes.”