Esek. 11 - Ebaibul

Atubokino a ŋikarikok a ŋulu aronok

¹ Abu nai etau okopororya ayoŋ, okoyau lopuke ŋolo alo Kide Akai ka Akuj, lopuke ŋolo iŋoliyarit Kide. Ayakasi lopuke ŋol ŋikilyok ŋatomoniarei ka ŋikan; eŋolik ayoŋ alokilyok a ŋul Yaasania lokoku ka Asur ka Pelatia lokoku a Benaia ta ŋikarikok a ŋituŋa.

² Tema Ekapolon neni kaŋ, “Lokoku a ituŋanan, ŋikilyok lu ikes eyeete aronis ka elimonokinete ŋituŋa akitiya ŋuna aronok alotaun a lo;

³ ebasi ikes, ‘Eriŋa apaki ŋina edukere ŋakais; ikoni etaun lo amot ŋina ipoere ka ikikoni iwon akiriŋ ŋina idorokinio.’

⁴ Aŋun, todwar itoroniyarit ikes, iyoŋ lokoku a ituŋanan, todwar.”

⁵ Abu nai etau a Ekapolon bu, min neni kaŋ, okolimok Ekapolon ayoŋ alimokin ŋituŋa ŋakiro nu ebe, “Ebala Ekapolon, ŋituŋa a Isirael, ayeni ayoŋ ŋuna irworosi iyes ka ŋuna iyeete iyes akitiyakin.

⁶ Idaut iyes akiar ŋituŋa ŋulu alalak alotaun a lo, elelebun ŋawat kec lorotin ŋulu ke etaun a lo.

⁷ Aŋun, ŋakiro ŋuna tokona alimu Ekapolon Akuj ikes nu ebe, ‘Ikokinete ŋawat ŋuna imasakis iyes lorotin ŋun akiriŋ ka ikokini etaun lo amot, nai ekeritari ayoŋ iyes alotaun a lo.’

⁸ Iraakasi iyes ŋulu ikerito aaro a ekileŋ, nai ekileŋ ikiarere iyes.

⁹ Ekeritari ayoŋ iyes alotaun a lo, ekepotok neni a ŋituŋa a ŋulu erae ŋigelaanotin, ido ekesican iyes.

¹⁰ Ikimunyaryo iyes a ekileŋ, akatubokini ayoŋ iyes alokukorin a ŋulu ka akwap a Isirael; ido iyenunete iyes atemar arae ayoŋ Ekapolon.

¹¹ Nyikokini etaun lo amot ŋina ikipoe iyes, nyiruworosi tari iyes akiriŋ ŋina eyai tooma keŋ, akatubokini ayoŋ iyes alokukorin a Isirael.

¹² Ŋun nai iyenuniata iyes atemar arae ayoŋ Ekapolon ŋolo nyiwuapa iyes ŋuna atubunit ayoŋ atemar kiwuapa ka ŋolo nyiwuapa iyes ŋikisila keŋ, nai iwuapa iyes ŋikisila a ŋakwapin a ŋuna eyakasi nawaetin kus.”

¹³ Ani eriŋa ayoŋ adwari ŋakiro ŋun, kiridak Pelatia lokoku a Benaia. Abu nai oramakin kwap ejuuru, eorou nooi otema, “Mam, Ekapolon Akuj! Imunyari kire iyoŋ ŋipiya ŋulu eyakasi Isirael a?”

Akiikinet ka Akuj alakun Ŋisirael

¹⁴ Abu nai akirot bu aneni ka Akuj neni kaŋ ebala,

¹⁵ “Lokoku a ituŋanan, ŋituŋa ŋulu erae ŋikaitotoi kon, ŋiyeneta kon ŋulu a kire ka ŋituŋa ŋulu a ekal a Isirael, ikes ŋituŋa ŋulu apotu ŋituŋa a Yerusalem temasi ebe, ‘Aekasi aneni ke Ekapolon, ido adaun ainakin isua akwap kec na aruwor ŋina kosi.’

¹⁶ Aŋun tolimok ikes atemar ŋakiro ŋuna irworo Ekapolon Akuj ikes nu, ‘Tari daŋ keritarit ayoŋ ikes nakwapin ŋuna alalak, eruwor ayoŋ aiunit ikes apaki ŋina euruwuana ŋina eyakatar ikes nakwapin ŋuna alwanak ka tari daŋ keelarit ayoŋ ikes nakwapin ŋuna alalak, eruwor ayoŋ aiunit ikes apaki ŋina eyakatar nakwapin ŋun.’

¹⁷ Aŋun, tolimok ikes atemar ŋakiro ŋuna irworo Ekapolon Akuj ikes nu, ‘Akacununi ayoŋ iyes alotuŋa a ŋakwapin, ekenyaku anakwapin kec aneni aponi ikielar iyes, akainakini nabo ayoŋ iyes akwap a Isirael.’

¹⁸ Ani ŋina eboŋunito Ŋisirael ne, elemarete alo Isirael ibore ŋini nyenyamio daadaŋ ka ŋakujo alo Isirael daadaŋ.

¹⁹ Ainakini ayoŋ ikes toyakaunotor etau epei, ewuakini ayoŋ etau ŋolokitete neni kec, alemari ayoŋ agogoŋu a ŋakyes kec aneni kec, oinak ikes ŋitai ŋulu iwuapito ŋuna abala ayoŋ,

²⁰ ikotere nai ikes ikiwuapeta alotooma anupit ŋikisila kaŋ ka iwuapete ŋuna atubunit ayoŋ. Eruworosi ikes ŋituŋa kaŋ ka aruwor ayoŋ Akuj kec.

²¹ Nai ikes ŋulu einakina alotai kec neni a ŋiboorei a ŋulu nyenyamio ka neni a ŋakujo, esicani ayoŋ ikes aŋuna a ŋiticisyo kec a ŋul.”

²² Apotu nai ŋisubuna ŋulu a ŋabebenuk ŋul toporosi ka apotu ŋiboorei ŋulu ekwaan ka ŋakejen a agaari torukosi ka ikes. Toyakaun akica ŋina ka ayau a Akuj a Isirael kidiama kec.

²³ Kikyaar nai alokidiŋ etaun akica ŋina ka ayakau a Ekapolon, min kidiama emukura ŋolo eyai Kide etaun.

²⁴ Alotorube a ŋolo abu ayoŋ oyakaun, abu etau ekekyaa ayoŋ a nen, okoyau ayoŋ neni a ŋituŋa a ŋulu eelaritae nakwap ŋina a Kalidea. Abu nai etorube ŋolo abu ayoŋ eŋolik torotok aneni kaŋ.

²⁵ Abu nai ayoŋ olimok ŋituŋa ŋulu eelaritae anakwap kec ŋakiro daadaŋ ŋuna abu Ekapolon eketoodik ayoŋ.