Ekim. 8 - Ebaibul

Ŋitaae ŋulukanikaarei

¹ Kirwor Ekapolon neni a Moses tema,

² “Kirwor neni ka Aron tolimok iŋes ebe: ‘Ani inokakini iyoŋ ŋitaae, emaikina akica a ŋitaae a ŋulukanikaarei kinwak kiŋaren awoet a ŋitaae.’ ”

³ Abu nai Aron kinokak ŋitaae, kimyek kinwak akica kec kiŋaren awoet a ŋitaae, lopite ŋolo ecikitor Ekapolon Moses.

⁴ Erae lo epite ŋolo etiyaunitere awoet a ŋitaae. Etiyaunitae iŋes ke egolid a ŋolo etyekitae ejok; ameun alokwap tari natur keŋ, etyekitae lopite ŋolo etoodikinitor Ekapolon Moses. Epite ŋolo etiyaunitere awoet a ŋitaae iŋes ŋol.

Totyakarae ŋilepi ka inakinae etic kec

⁵ Kirwor Ekapolon neni a Moses tema,

⁶ “Totyaka ŋilepi aneni a Ŋisirael a ŋuluce, ido kitaleu ikes.

⁷ Kitiya nu neni kec kitaleunio ikes: Towuatak ikes ŋakipi ŋuna kitaleunet, tolimok ikes tobanya a ewembe ŋawat kec daadaŋ ka kilotasi ŋilowi kec, kitaleunos.

⁸ Ekaku emaikina ikes tolemut etaok kaapei ka ainakinet ŋina a ŋikinyom ŋina erae ŋakirya ŋuna ajokak nooi ŋuna iguritoe ka akimyet, ido tolemu nabo iyoŋ etaok ece erae ainakinet aŋuna ka asecit.

⁹ Emaikina iyoŋ yau ŋilepi kiŋaren eema ŋolokilipet, ido tocunak Ŋisirael daadaŋ.

¹⁰ Apaki ŋina iyaunia iyoŋ ŋilepi kiŋaren Ekapolon, emaikina Ŋisirael kidokokis ŋakan kec neni a ŋilepi,

¹¹ einakini nai Aron ŋilepi neni ke Ekapolon erae ainakinet aneni a Ŋisirael ŋina apolon nooi, ikotere itiyaete ikes etic aŋuna ke Ekapolon.

¹² Idokokinete nai ŋilepi ŋakan kec nakyes a ŋimoŋin, ido inak Aron ŋimoŋin ŋul neni ke Ekapolon, epei erae ainakinet aŋuna ka asecit, epei erae ainakinet ŋina epeyo aŋuna ka amookunia ŋilepi.

¹³ Kedaun ŋun imyekini iyoŋ ŋilepi towua alokiŋaren Aron ka ŋidwe keŋ ŋulusapa, aŋun iinakini iyoŋ ikes neni ke Ekapolon erae ainakinet ŋina apolon nooi.

¹⁴ “Aŋun ityakari iyoŋ ŋilepi aneni a Ŋisirael a ŋuluce, ido eruworosi ŋilepi ŋulu kaŋ.

¹⁵ Ekaku, epedorete ŋilepi alosit akitiya ŋiticisyo alo eema a ŋolokilipet kidau iyoŋ akitaleun ikes ka ainakin ikes erae ainakinet ŋina apolon nooi,

¹⁶ anerae akainakinitae ayoŋ bon ikes aneni a Ŋisirael. Adau ayoŋ acamun ikes toruworos ŋulu kaŋ, kilunyokin neni a ŋikiyae a ŋulusapa a ŋulu a Ŋisirael a daadaŋ,

¹⁷ anerae erae ŋikiyae a Ŋisirael daadaŋ ŋulu kaŋ, kerae ŋikiyae a ŋituŋa, kori ŋikiyae a ŋibaren. Akoloŋit ŋina amunyarya ayoŋ ŋikiyae daadaŋ anakwap a Ijipit, abu ayoŋ otyaka ikes aŋuna kaŋ,

¹⁸ Nai aseu ayoŋ ŋilepi kilunyokin lorot a ŋikiyae a Ŋisirael daadaŋ.

¹⁹ Nabo daŋ adau ayoŋ ainakin ŋilepi erae ainakinet neni ka Aron ka ŋidwe keŋ ŋulusapa aneni a Ŋisirael akitiya ŋiticisyo aŋuna a Ŋisirael alo eema a ŋolokilipet ka amookuunun Ŋisirael, ikotere nyeyakaun edeke ŋolo emunyari Ŋisirael apaki ŋina eapiyaryata ikes nakibois ŋina asegan.”

²⁰ Apotu Moses ka Aron ta atukot a Ŋisirael kaapei ka ŋilepi kitiyata ŋuna alimokinitae ikes, apotu Ŋisirael kaapei ka ŋilepi kitiyata daadaŋ ŋuna ecikit Ekapolon Moses akitiya aŋuna kec.

²¹ Apotu ŋilepi kitaleunos anasecit, kilotasi daŋ ŋilowi kec, ekaku a ŋun, abu Aron inak ikes neni ke Ekapolon erae ainakinet ŋina apolon nooi ka abu Aron tomooku ikes kitesegu.

²² Kedaun ŋun, apotu ŋilepi toloto akitiya ŋiticisyo kec alotooma eema ŋolokilipet akiŋarakin Aron ka ŋidwe keŋ ŋulusapa. Apotu Ŋisirael kitiyata ŋun neni a ŋilepi lopite ŋolo ecikitor Ekapolon Moses!

²³ Kirwor Ekapolon neni a Moses tema, “Emaikina ŋilepi, togeut etic kec alotooma eema ŋolokilipet erae ŋikaru kec ŋatomoniarei ka ŋikan ka adepar,

²⁴ nai ani edolete ŋikaru kec ŋatomonikan emaikina ikes tojoŋoto akitiya etic alotooma eema ŋolokilipet.

²⁵ Epedorete ca akiŋarakinit ŋikaitotoi kec alo eema a ŋolokilipet apaki ŋina itiyaata ŋiticisyo kec, nai nyemaikina ikes bon kitiyata ediotic.

²⁶ Kitiya ŋun neni a ŋilepi ikoranakini ikes ŋiticisyo kec.”