Ekim. 6 - Ebaibul

Ŋinasari

¹ Kirwor Ekapolon neni a Moses tema,

² “Tolimok Ŋisirael ŋakiro nu: ‘Ani kecamit ekile, kori aberu akikoŋ neni ka Akuj, akikoŋiet ŋina ecamitor iŋes aruwor Enasarait, ituŋanan ŋini italeoritae aŋuna ka akitiyanakin Akuj,

³ emaikina ituŋanan ŋin nyemat epiini, kori ŋagwe ŋuna adwarak; nyemaikina iŋes emasi epiini ŋolo ca daadaŋ, nyemaikina iŋes tomat tari ŋakipi ŋuna ecuunitae anaraito a epiini, kori tonyam ŋaraito a epiini kerae ŋuna epapal, kori ŋuna itoonitoe.

⁴ Nyemaikina ikes kiira idiobore ŋini elemunitae alokitoe a epiini, kerae ŋicok, kori ŋapoco ŋirwa daadaŋ ŋulu ka akiyar kec ŋulu eraakatar ikes Ŋinasari.

⁵ “‘Ŋirwa daadaŋ ŋulu eraakatar ikes Ŋinasari ŋulu ikoŋito aŋuna ka akitiyanakin Ekapolon, nyemaikina ikes totubo ŋitim kec, emaikina ikes kipinya ŋitim kec kimyekis tooyata akitodol apaki ŋina edaunotor ŋirwa ŋulu ikoŋitotor ikes araakau Ŋinasari, emaikina ikes erae ŋulu esegak.

⁶ “‘Ŋirwa daadaŋ ŋulu eraakatar ikes ŋulu italeoritae aŋuna ka akitiyanakin Ekapolon, nyemaikina ikes toapiyasi diyete ituŋanan ŋini etwanit.

⁷ Tari daŋ ketwana papa, kori toto, lokaato, kori nakaato a ituŋanan a ŋin idio, nyemaikina ikes kitiyata ŋuna italeo ikes akitiya, anerae nyecamakinit akikoŋiet kec ŋina italeoritere ikes aŋuna ka akitiyanakin Ekapolon akitiya ŋun.

⁸ Emaikina ikes torubakis esegak ŋirwa daadaŋ ŋulu eraakatar ikes Ŋinasari.

⁹ “‘Ani ketwana ituŋanan atipei aneni eyai ituŋanan ŋini italeoritae aŋuna ka akitiyanakin Ekapolon, emaikina totuboroe ŋitim keŋ akoloŋit ŋina italeunere iŋes, edolete ŋirwa ŋikanikaarei.

¹⁰ Kelunyar ŋirwa ŋikanikaarei, emaikina iŋes yau ŋakuryo ŋaarei, kori ŋatemeleudi ŋaarei neni ke esacaradoti lopuke ŋolo ke eema a ŋolokilipet,

¹¹ einakini nai esacaradoti apei ainakinet a ŋin, erae ainakinet aŋuna ka asecit ka ainakinet ŋinace erae ainakinet ŋina epeyo tomookunia ituŋanan ŋin, anerae abu iŋes tosec aŋuna ayakar diyete ituŋanan ŋini etwanit. Emaikina ituŋanan ŋin kitaleu ŋitim keŋ akoloŋit ŋinapei ŋin,

¹² ido kitaleunoe iŋes aŋuna ka akitiyanakin Ekapolon ŋirwa daadaŋ ŋulu eraakar iŋes Enasarait. Emaikina daŋ iŋes yau ikale ŋinimesek ŋini erae apolou keŋ ekaru epei erae ainakinet aŋuna a Ŋinasari ka asecit.

¹³ “‘Erae ŋol ekisil aŋuna a Ŋinasari, ani edaun ŋirwa ŋulu italeoritere ikes aŋuna ka akitiyanakin Ekapolon, emaikina yaunae ikes lopuke ŋolo ke eema a ŋolokilipet,

¹⁴ ido inakis ainakinet kec neni ke Ekapolon, inakis ikale ipei ŋinimesek ŋinimoŋ ŋini erae apolou keŋ ekaru epei, ŋini ejok, ŋini emam neni eŋwalit erae ainakinet ŋina epeyo,

¹⁵ emaikina ikes yaut ainakinet ŋina a ŋamugati a ŋuna emam ŋakinyalet ileleba ebukit, ŋimugati ŋulu ipounitoe a ŋakirya a ŋuna ajokak nooi a ŋuna iguritoe ka akimyet ka ŋabisikotyo ŋuna emam ŋakinyalet kiwosakinitetei akimyet, emaikina daŋ ikes yaut ŋainakineta kec ŋuna a ŋikinyom ka ŋuna a ŋimaten.

¹⁶ Eai nai esacaradoti ŋainakineta ŋun daadaŋ kiŋaren Ekapolon, ido inak neni ke Ekapolon ŋainakineta kec aŋuna ka asecit ka ŋuna epeyo.

¹⁷ Tosodi inak emesek neni ke Ekapolon erae amuronot ŋina ke ekisil kaapei ka ŋamugati ŋuna emam ŋakinyalet eya lobukit, ya daŋ neni ke Ekapolon ŋainakineta ŋuna a ŋikinyom ka ŋuna a ŋimaten.

¹⁸ Etubori nai ituŋanan ŋini sek etaleoritae aŋuna ka akitiyanakin Ekapolon ŋitim keŋ alopuke a eema a ŋolokilipet, tolemu ŋitim keŋ ŋulu atubuni anakou keŋ, kiwuak nakim kwap ibarasit ŋini erae amuronot ŋina ke ekisil.

¹⁹ Elemuni nai esacaradoti eseket a emesek ipotoi ka imugati ipei alobukit ŋini emam ŋakinyalet ka abisikot apei ŋina emam ŋakinyalet, kiwuak nakan a ituŋanan a ŋini italeoritae aŋuna ka akitiyanakin Ekapolon kedau ituŋanan atubor ŋitim keŋ.

²⁰ Ikyaari nai esacaradoti ŋainakineta ŋuna kikyaara aloŋaren Ekapolon, erae ŋainakineta ŋun ŋuna esegak ŋuna emaikina esacaradoti toryamu kaapei ka atorobu ŋina ikyaanaryo ta amuro ŋina erae ainakinet. Ekaku ŋun epedori ituŋanan ŋini sek etaleoritae aŋuna ka akitiyanakin Ekapolon akimat epiini.

²¹ “‘Erae ŋol ekisil aŋuna a Ŋinasari a ŋulu ikoŋete. Emaikina ikes inakis neni ke Ekapolon ŋainakineta kec lopite ŋolo ikoŋitotor ikes, pa imaritae ibore ice ŋini epedorete ikes alemun. Emaikina ikes kitiyata ŋuna ikoŋito iwuapito ŋikisila ŋulu akitaleoro kec.’ ”

Akiterereŋ a ŋisacaradotin ŋituŋa

²² Kirwor Ekapolon neni a Moses tema,

²³ “Tolimok Aron ka ŋidwe keŋ ŋulusapa tema, ‘Ani iterereŋete iyes Ŋisirael, emaikina iyes tolimut ŋakiro nu:

²⁴ Ikiterereŋ Ekapolon iyes ka ikiyok;

²⁵ elipi torimaaniar Ekapolon aneni kus ka kitiya ejok neni kus;’ ”

²⁶ elipi torimaaniar Ekapolon aneni kus ka ikiinak iyes ekisil.

²⁷ Abu Ekapolon tema, “Ani kiterereŋo ŋisacaradotin ŋituŋa elimito ekiro kaŋ eterereŋi ayoŋ ikes.”