Ekim. 4 - Ebaibul

Ŋikoati

¹ Apaki ŋin, kirwor Ekapolon neni a Moses ka Aron tema,

² “Kigira Ŋikoasi, totyakasi ikes alo Lepi a ŋuluce, kigira ikes a ŋatekerin ka a ŋikalya atapapaa kec,

³ kigira ŋikilyok daadaŋ ŋulu erae ŋikaru kec akisyakin a ŋatomoniuni tari ŋatomonikan, ŋulu epedorete etic aloeema a ŋolokilipet.

⁴ Etic a Ŋikoati iŋes ŋolo ka akiyokit ŋiboro ŋulu asegak nooi.

⁵ “Apaki ŋina ewotokinia alomar, elomarete Aron ka ŋidwe keŋ ŋulusapa loeema tolacut anaŋga ŋina etyakit neni eyai Asaduku ŋina ka Acamunet ka akibois ŋinakilipet, emaikina ikes tolacut anaŋga ŋin kimukoryata Asaduku ŋina ka Acamunet,

⁶ torapakis ejamu ŋolo edaitae kidiama, topetakis nabo kidiama ejamu ŋol elou ŋolopus, ani irikakin kiwuakis ŋipirin neni emaikina eya.

⁷ Emaikina ikes topetakis elou ŋolopus kidiama emesa ŋolo ka amugati a ŋina ka ayakau a Ekapolon, kidokokis nen ŋasaani, ŋakalaae ŋuna ke ekinyate, ŋabakulei ka ŋicupae ŋulu a ŋainakineta a ŋuna emasyo, emaikina daŋ ikes kiwuakis nen amugati ŋina sek eyai nen a ŋinapaki,

⁸ kimukokis nai elou ŋolo areŋan loboro ŋul daadaŋ ka torapakis ejamu ŋolo edaitae, ido kiwuakis ŋipirin neni emaikina eya.

⁹ Emaikina ikes tolemut elou ŋolopus torapyata awoet a etaa, ŋitaae, ŋasuwa ŋunaridet ŋatotol, ŋasiniyae ka ŋiboro daadaŋ ŋulu iwuakinitae akimyet ŋina inokere ŋitaae a nen,

¹⁰ iwuakinete ikes awoet a etaa ŋin kaapei ka ŋiboro keŋ daadaŋ kimukokis ejamu ŋolo edaitae, ido kidokokis nakito ŋuna edakitere iŋes.

¹¹ Imukokinete ikes elou ŋolopus kidiama namuroet ŋina itiyaunitae a egolid, kimukokis kidiama keŋ ejamu ŋolo edaitae, ido kiwuakis ŋipirin keŋ neni emaikina eya.

¹² Emaikina ikes tolemut ŋiboro daadaŋ ŋulu isitiyao anakibois a ŋina asegan, kiwuakis ŋiboro ŋul lolou ŋolopus, kimukokis ejamu ŋolo edaitae, ido kidokokis nakito ŋuna edakitere.

¹³ Emaikina ikes tolemasi ekuron a namuroet torapakis elou ŋolo kipurat-areŋan kidiama namuroet

¹⁴ ka kiwuakis kidiama namuroet ŋiboro daadaŋ ŋulu sek isitiyao a namuroet lu: Ŋasipiryae ŋuna edakere akim, ŋiboro ŋulukuret akim, ŋikitiyoi, ŋabesenio ŋunawuaset ka ŋiboro daadaŋ ŋulu isitiyao a namuroet, ido kimukokis ejamu ŋolo edaitae ka kiwuakis ŋipirin neni emaikina eya.

¹⁵ Kedaut Aron ka ŋidwe keŋ ŋulusapa akimuk akibois ŋina asegan ka ŋiboro daadaŋ ŋulu isitiyao a nen, apaki ŋina ewotokinere edakete Ŋikoati ŋiboro ŋul, nyemaikina ikes etapete ŋiboro ŋulu italeunitoe, anerae ketapa ikes ŋiboro ŋul etwakete. Erae ŋul ŋiboro ŋulu a eema a ŋolokilipet ŋulu emaikina Ŋikoati todaka apaki ŋina ewotokinere.

¹⁶ “Emaikina Elasar ŋolo arae lokoku ka Aron a esacaradoti kiric ŋiboro lu: Akimyet ŋina a etaa, ekinyate ŋolo akukunyon, ŋainakineta ŋuna a ŋikinyom ŋuna a ŋinakoloŋit ka akimyet ŋina iwosere ŋituŋa ta ŋiboro daadaŋ ŋulu eya nakibois ŋina asegan ka loeema ŋolokilipet.”

¹⁷ Kirwor nabo Ekapolon neni a Moses ka Aron tema,

¹⁸ “Nyimyekis ŋituŋa ateker a Ŋikoati emunyarosi alotuŋa a ekabila a ŋilepi

¹⁹ Emaikina iyes kitiyata nu, ikotere ikes eyarete ka nyetwaka apaki ŋina eponiata ikes diyete ŋiboro ŋulu asegak nooi ŋul, emaikina Aron ka ŋidwe keŋ ŋulusapa tolomasi tooma eema tokorakis ŋolokile etic keŋ, ido tolimokis ŋolokile ŋiboro ŋulu emaikina iŋes todak.

²⁰ Nai nyemaikina Ŋikoati tolomasi tooma eema akiŋolikin ŋiboro ŋulu asegak nooi ŋul tari apaki ŋina euruwuana, anerae kiŋolikis ikes ŋiboro ŋul, etwakete apaki ŋina euruwuana ŋin.”

Ŋiticisyo a Ŋigerisoni

²¹ Kirwor Ekapolon neni a Moses tema,

²² “Kimar daŋ Ŋigerisoni daadaŋ a ŋatekerin kec iwuapit ŋikalya atapapaa kec.

²³ Kimar ŋikilyok daadaŋ ŋulu erae ŋikaru kec ŋatomoniuni akitodol ŋatomonikan, ŋulu epedorito akitiya etic alotooma eema ŋolokilipet.

²⁴ Erae lo etic a ŋatekerin a Ŋigerisoni ŋuna emaikina ikes kitiyata ka ŋiboro ŋulu emaikina ikes kiwoko:

²⁵ Akidak ŋanaŋgae ŋuna a akibois a ŋina asegan, eema ŋolokilipet kaapei ka ŋanaŋgae ka ejamu ŋolo edaitae ŋolo imukokinitae kidiama eema ta anaŋga ŋina inenekinitoe lopuke ŋolo ke eema a ŋolokilipet,

²⁶ ŋanaŋgae ŋuna a alapatu a ŋina irimokinit eema ka namuroet, anaŋga ŋina ke epuke a ŋolo ka alapatu kaapei ka ŋaunoi ta ŋiboro daadaŋ ŋulu isitiyao a nen. Emaikina Ŋigerisoni kitiyata ŋiticisyo daadaŋ ŋulu emaikina ikes itiyaete.

²⁷ Itiyaete Ŋigarisoni ŋiticisyo kec daadaŋ ikwapei elimokiniata Aron ka ŋidwe keŋ ŋulusapa ikes, akidak ŋiboro ŋulu emaikina ikes todaka ka akitiya etic ŋolo emaikina ikes kitiyata. Erae Aron ka ŋidwe keŋ ŋulusapa ikes elimokinete Ŋigerisoni akitiya ŋuna emaikina ikes kitiyata.

²⁸ Erae ŋul ŋiticisyo a ŋatekerin a Ŋigerisoni alotooma eema ŋolokilipet, Isamar lokoku ka Aron a esacaradoti iŋes epolokini ikes aloticisyo kec.”

Ŋiticisyo a Ŋimerari

²⁹ Tolimok nabo Ekapolon Moses tema, “Kimar ŋilepi ŋulu ka ateker a Ŋimerari, kimar ikes a ŋatekerin kec iwuapit ŋikalya atapapaa kec,

³⁰ kimar ŋikilyok daadaŋ ŋulu erae ŋikaru kec, ŋatomoniuni akitodol ŋatomonikan, ŋulu epedorito akitiya etic tooma eema ŋolokilipet.

³¹ ŋiboro ŋulu emaikina ikes todaka ikes lu: Ŋakito ŋuna edukununuere neni iwuanakinio Asaduku ŋina ka Acamunet, kaapei ka ŋasuwa keŋ ka ŋipirin ta ŋakito ŋuna epetanakinio kwap,

³² ŋipirin daadaŋ ŋulu ka alapatu a ŋina erimokinit eema, ŋakito ŋuna epetanakinio kwap, ŋases ka ŋaunoi kaapei ka ŋiboro daadaŋ ŋulu isitiyao a nen ta akitiya ŋiticisyo daadaŋ ŋulu emaikina ikes kitiyata a ŋiboro a ŋul. Ikorakini iyoŋ ŋolokile ŋiboro ŋulu emaikina iŋes todak.

³³ Erae ŋul ŋiticisyo a ŋatekerin a Ŋimerari alotooma eema ŋolokilipet. Isamar lokoku ka Aron a esacaradoti iŋes epolokini ikes aloticisyo kec.”

Akimaro a ŋilepi

³⁴ Apotu nai Moses ka Aron ta ŋikarikok a atukot a Ŋisirael kimara Ŋikoati a ŋatekerin iwuapito ŋikalya atapapaa kec,

³⁵ kimara ŋikilyok daadaŋ ŋulu arae ŋikaru kec ŋatomoniuni akitodol ŋatomonikan, ŋulu apedorito akitiya etic alotooma eema ŋolokilipet.

³⁶ Arae ekimar kec daadaŋ, imaritae a ŋatekerin ŋalipyo ŋaarei ka ŋamiae ŋakanikaarei ka ŋatomonikan,

³⁷ arae ŋol ekimar a Ŋikoati a daadaŋ a ŋulu etiyaete ŋiticisyo alotooma eema ŋolokilipet. Abu Moses kimar ikes daadaŋ ikwapei ecikitor Ekapolon iŋes.

³⁸ Aponi kimarae Ŋigerisoni a ŋatekerin ka a ŋikalya atapapaa kec.

³⁹ Ŋikilyok daadaŋ ŋulu arae ŋikaru kec ŋatomoniuni akitodol ŋatomonikan ŋulu apedorito akitiya etic alotooma eema ŋolokilipet,

⁴⁰ ŋulu aponi kimarae a ŋatekerin ka iwuapitae a ŋikalya kec arae ŋalipyo ŋamiae ŋaarei ka ŋamiae ŋakanikapei ka ŋatomoniuni.

⁴¹ Arae ŋol ekimar a ŋatekerin a Ŋigarisoni a daadaŋ a ŋulu etiyaete tooma eema ŋolokilipet, a ŋulu apotu Moses ka Aron kimara ikwapei ecikitor Ekapolon ikes.

⁴² Aponi kimarae Ŋimerari, a ŋatekerin iwuapitae ŋikalya atapapaa kec

⁴³ ŋikilyok daadaŋ ŋulu arae ŋikaru kec ŋatomoniuni akitodol ŋatomonikan ŋulu apedorito akitiya ŋiticisyo alotooma eema ŋolokilipet,

⁴⁴ ŋulu aponi kimarunae a ŋatekerin ka ŋikalya atapapaa kec, arae ŋalipyo ŋauni ka ŋamiae ŋaarei.

⁴⁵ Erae ŋol ekimar a ŋatekerin a Ŋimerari a ŋulu apotu Moses ka Aron kimara ikwapei ecikitor Ekapolon Moses.

⁴⁶ Ŋilepi ŋulu apotu Moses ka Aron ta ŋikarikok a Ŋisirael kimara a ŋatekerin iwuapitae ŋikalya atapapaa kec,

⁴⁷ ŋikilyok ŋulu arae ŋikaru kec ŋatomoniuni akitodol ŋatomonikan ŋulu apedorito akitiya etic alotooma eema ŋolokilipet,

⁴⁸ arae ekimar kec a daadaŋ ŋalipyo ŋakanikauni ka ŋamiae ŋakan ka ŋatomonikanikauni.

⁴⁹ Ikwapei ecikitor Ekapolon Moses, aponi inakinae ŋilepi ŋiticisyo ŋulu egelegelya ŋulu ka akitiya loeema ŋolokilipet, kori adakit ŋiboro ŋulu ke eema a ŋolokilipet. Aŋun, abu Moses kimar ikes ikwapei ecikitor Ekapolon iŋes.