Ekim. 32 - Ebaibul

Akikamar ka akorakin akwap ŋina alo Kide Yorodan”

¹ Ayakatar ŋituŋa a ekabila a Ruben ka ŋituŋa a ekabila a Gad ŋaatuk ŋuna alalak nooi. Ani eanyunete ikes atemar ejokak ŋalup ŋuna ka akwap a Yaser ka Gilead aŋuna a ŋaatuk,

² apotu Ŋigadi ka Ŋirubeni toloto neni a Moses ka neni a Eleasar a esacaradoti ta neni a ŋikarikok Ŋisirael temasi,

³ “Erae ŋakiboisyo nu: Atoros, Dibon, Yaser, Nimira, Esibon Eleale, Sebam, Nebo ka Beon

⁴ ŋakiboisyo ŋuna a akwap a ŋina adau Ekapolon akiloun aŋuna a Ŋisirael ejokak aŋuna a ŋaatuk, ido isua ŋiketiyak kon ikiyakar ŋaatuk.

⁵ Ani kikijokak isua alokiŋaren kon, inakinae isua ŋiketiyak kon akwap ŋin toruwor ŋina kosi, kimyekinae isua edoŋo ne nyikilot lowae ye Yorodan.”

⁶ Nai tolimok Moses ŋituŋa a ekabila a Gad ka ŋulu a ekabila a Ruben tema, “Kaanukiro idoŋioto iyes ne tolosete bo lojie?

⁷ Kaanukiro icamitotor iyes akitokadanakin Ŋisirael analosit nakwap ŋina adau Ekapolon ainakin ikes?

⁸ Apotu atapapa kus kitiyata ŋun apaki ŋina eyakiyaritor ayoŋ ikes alo Kades-Barinea akiŋolikin akwap.

⁹ Ani itipeiyorete ikes neni ayai ayonae Esikol, ido ani iŋolikinete akwap ŋin, apotu ikes kitakadakis Ŋisirael analosit nakwap ŋina aris Ekapolon keinaki ikes.

¹⁰ Abu Ekapolon toŋo akoloŋit ŋin kikoŋ tema,

¹¹ ‘Kire mam ituŋanan alotuŋa a ŋulu etipeunete alo Ijipit ŋini erae ŋikaru ŋatomoniarei ka ŋikan ka adepar ŋini epedori akiŋolikin akwap ŋina abu ayoŋ ekoŋ ainakin Aburam, Isaka ka Yakob, anerae nyiwuapa ikes ŋuna kaŋ a acamit kec a daadaŋ,

¹² mam ipei daŋ alotooma kec ŋini edoli nakwap ŋin mati Kaleb lokoku ka Yepune Ekenisait ka Yosua lokoku a Nun ŋulu apotu kiwuapakis ŋuna kaŋ a acamit kec a daadaŋ.’

¹³ Abu Ekapolon toŋoik Ŋisirael, kimyek ikes kirimo analoŋisat ŋikaru ŋatomoniomwon tari ŋina adaunor anyamet daadaŋ ŋina abu kitiya ŋuna aronok alokiŋaren Ekapolon.

¹⁴ Iyes tokona lu, iyes ŋulu irae atukot a ŋikasecak, ilunyokinosi neni atapapa kus akiyatakin anyunyura a Ekapolon neni a Ŋisirael.

¹⁵ Ani kiŋero iyes akiwuap ŋuna ke Ekapolon, imyekini nabo iŋes Ŋisirael analoŋisat ka emunyari ŋituŋa lu daadaŋ.”

¹⁶ Aŋun, potu ŋituŋa a ekabila a Ruben ka ŋulu a ekabila a Gad temasi, “Ikidukokini isua ne ŋanokin aŋuna a ŋamesekin kosi ka ŋitaunio aŋuna a ŋaberu kosi ka ŋidwe kosi,

¹⁷ nai ikilemuni isua ŋiboro kosi ŋulu ke ejie, kiŋarenikinoe Ŋisirael daadaŋ tari ŋina ikiyaunia isua ikes nakibois kec. Nai mono emaikina ŋidwe kosi kidoŋo lotaunio ŋulu edukuk ejok aŋuna a ŋituŋa a ŋulu iboiyete anakwap a na.

¹⁸ Nyikiboŋuni isua lorerya kosi tari ŋina eryamuniata Ŋisirael daadaŋ akwap ŋina eruwor ŋina kec.

¹⁹ Nyikikorakinio isua akwap kaapei ka ikes alokekwaye Yorodan, anerae aryamun isua akorakinet kosi alowae a lo Yorodan, alowae a ŋolo alo Kide.”

²⁰ Abu nai Moses tolimok ikes tema, “Ani kitiyata iyes nu, kilemut ŋiboro ŋulu ke ejie, ido toloto ikiŋarenikinit Ekapolon lojie,

²¹ toloto kaapei ka ŋituŋa kus daadaŋ ŋulu eyakatar ŋiboro ŋulu ke ejie ka toloto lowae ye Yorodan ikiŋarenikinit Ekapolon tari ŋina iritarya Ekapolon ŋimoe keŋ alokiŋaren keŋ,

²² ido kikamarae akwap alokiŋaren Ekapolon, ekaku a ŋun iŋes nai iboŋunioto iyes ne, anerae idaut akiricakin ŋuna amaikina iyes kitiyata aŋuna ke Ekapolon ka aŋuna a Ŋisirael, ido eruwor akwap na ŋina kus alokiŋaren Ekapolon.

²³ Nai ani pa kitiyata iyes ŋun, isecete iyes aneni ke Ekapolon, ido emaikina toyenete atemar ikisicanio iyes aŋuna ka asecit kus.

²⁴ Toduko ŋitaunio aŋuna a ŋidwe kus ka ŋanokin aŋuna a ŋamesekin kus, nai kitiyata ŋuna idaut iyes akiikin.”

²⁵ Tolimokis nai ŋituŋa a ekabila a Ruben ka ŋulu a Gad Moses temasi, “Isua ŋiketiyak kon, ikitiyae lopite ŋolo ilimunio iyoŋ ekapolon kosi.

²⁶ Idoŋete ŋidwe kosi, ŋaberu kosi, ŋamesekin kosi ka ŋibaren kosi ŋuluce daadaŋ ama lotaunio a Gilead;

²⁷ nai isua ŋiketiyak kon, ikilosi odokasi lowae ye Yorodan, elosete daadaŋ ŋulu etiŋito ŋiboro ŋulujiet, ajiore aŋuna ke Ekapolon, lopite ŋolo ilimunio iyoŋ ekapolon.”

²⁸ Aŋun abu Moses kicik Eleasar esacaradoti ka Yosua lokoku a Nun ta ŋikarikok a ŋatekerin a Ŋisirael aŋuna a ŋituŋa a ekabila a Ruben ka Gad.

²⁹ Kirwor Moses neni kec tema, “Ani kelosete ŋituŋa a ekabila a Ruben ka ŋulu a Gad, ŋikilyok daadaŋ ŋulu etenito ejie iŋarenikinit Ekapolon, totuboros ekekwaye Yorodan kaapei ka iŋes, ido kilounae akwap ŋina eyai kiŋaren kus, ŋun iŋes ipedoryata iyes ainakin ikes akwap a Gilead toruwor ŋina kec;

³⁰ nai ani pa kecamut ikes atubor kaapei ka iyes etenito alosit lojie, eryamunete ikes kaapei ka iyes akwap ŋina eruwor ŋina kec anakwap a Kanaan.”

³¹ Toboŋokis ŋituŋa a ekabila a Ruben ka ŋulu a Gad temasi, “Ikwapei adaunia Ekapolon akirwor neni kon, ikitiyae isua ŋiketiyak kon ŋuna alimu iŋes.

³² Ikilosi isua nakwap a Kanaan ikiŋarenikinit Ekapolon ka ikitenit aŋuna ke ejie, nai akwap ŋina ikiryamuni isua erae ŋina kosi, idoŋi erae ŋina kosi alowae a lo aŋolol Yorodan.”

³³ Abu Moses inak ŋituŋa a ekabila a Gad ka ŋulu a ekabila a Ruben ta ŋulu a atutubet a apei a ŋina a ekabila a Manase alokoku a Yosepu akwap ŋina sek epukat erwosit Sikon ŋolo a Ŋiamori ka akwap ŋina sek epukat Og ŋolo a Basan; abu Moses inak ikes akwap ŋin ka ŋitaunio a akwap a ŋin ta ŋakiboisyo ŋuna edunyito nen.

³⁴ Apotu nai ŋituŋa a ekabila a Gad toduko nabo Dibon, Ataros, Aroer,

³⁵ Atiros-Sopan, Yaser, Yogibea,

³⁶ Bes-Nimiraa ka Bes-Aran, ŋitaunio ŋulu adukitoe ŋaduketa ŋunajiet ka adukitoe ŋanokin a ŋamesekin.

³⁷ Tosodi toduko nabo ŋituŋa a ekabila a Ruben Eleale Esibon, Kiriasaim,

³⁸ Nebo ka Baal-Meon (aponi kilocokinoe ŋirorwa a ŋitaunio a ŋul,) toduko nabo ikes Sibima ka tolimokis tari ŋitaunio ŋulu apotu ikes toduko nabo ŋirorwa ŋice.

³⁹ Apotu ŋiletok a Makir alokoku a Manase toloto Gilead, kikamasi ka kiritasi Ŋiamori ŋulu aya nen.

⁴⁰ Aŋun, abu Moses inak Gilead neni a Makir a lokoku a Manase, ido abu Makir tolom nen.

⁴¹ Abu Yair lokoku a Manase tolot kikama ŋirerya a Gilead, tolimok ikes ekiro lo, Apos-Yair.

⁴² Tosodi Noba tolot kikama etaun Kenas ka ŋirerya keŋ, ido tolimok etaun ŋol ekiro keŋ pei.