Ekim. 29 - Ebaibul

Ŋainakineta aŋuna a ŋasuban a ŋuna a ŋarupepe

¹ Ŋirwa ke elap epei elap ŋolo a ŋikanikaarei, emaikina iyes tocunakinos iwapei kilipa, nyemaikina iyes toloto loticisyo kus kitiyata, erae akoloŋit ŋin ŋina ikusyata iyes ŋarupepe,

² ido emaikina iyes yaut ŋainakineta nu ŋuna epeyo ŋuna ebob eure kec aneni ke Ekapolon: Emoŋ ŋolosorokit, emesek ka ŋikaalei ŋulumesekin ŋikanikaarei ŋulu erae apolou kec ekaru epei, ŋulu emam neni eŋwalit.

³ Ikwapei ainakinet ŋina a ŋikinyom, emaikina iyes yaut ŋakirya ŋuna ajokak ŋuna iguritoe ka akimyet, aŋuna a emoŋ, ŋakiloi ŋauni aŋuna a emesek, ŋakiloi ŋaarei

⁴ ka akilo apei aŋuna a ŋinikale a ŋulukanikaarei.

⁵ Emaikina nabo iyes yaut ekoroe erae ainakinet aŋuna ka asecit ka aŋuna ka amookuno kus.

⁶ Einakinio ŋainakineta ŋun kaapei ka ŋainakineta ŋuna epeyo ŋuna ke elap a ŋolokitete kaapei ka ŋainakineta ŋuna a ŋikinyom ta ŋainakineta ŋuna epeyo ŋuna a ŋinakoloŋit kaapei ka ŋainakineta ŋuna a ŋikinyom, kaapei ka ŋainakineta ŋuna a ŋimaten lopite ŋolo elimunitere aŋuna kec alokisil, erae ikes ŋainakineta ŋuna epeyo ŋuna ebob eure aneni ke Ekapolon.

Ŋainakineta aŋuna ka akoloŋit a ŋina ka amookuno

⁷ Ani edoli ŋirwa ke elap ŋitomon, elap ŋolo a ŋikanikaarei, tocunakinos kilipa, emaikina iyes kiredakis akiron ka nyilot loticisyo kus kitiyata.

⁸ Emaikina iyes yaut neni ke Ekapolon ŋainakineta nu ŋuna epeyo ŋuna ebob eure aneni ke Ekapolon: Emoŋ, emesek ka ŋikaalei ŋikanikaarei ŋulumesekin ŋulu emam neni eŋwalit.

⁹ Ikwapei ainakinet ŋina a ŋikinyom, emaikina iyes yaut ŋakirya ŋuna ajokak ŋuna iguritoe ka akimyet: Ŋakirya ŋakiloi ŋauni aŋuna a emoŋ, ŋakiloi ŋaarei aŋuna a emesek

¹⁰ ka akilo apei aŋuna a ŋinikale a ŋulukanikaarei.

¹¹ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet aŋuna ka asecit ka amookuno kus ta ŋainakineta ŋuna a ŋimaten.

Ŋainakineta aŋuna a ŋasuban a ŋuna a ŋisakaitei

¹² Ŋirwa ke elap ŋitomon ka ŋikan elap ŋolo a ŋikanikaarei, emaikina tocunakinos iwapei kilipa, nyilot loticisyo kus kitiyata. Emaikina iyes kinumunuma ŋasuban neni ke Ekapolon ŋirwa ŋikanikaarei.

¹³ Emaikina iyes yaut neni ke Ekapolon ŋainakineta nu ŋuna epeyo, ŋuna ebob eure aneni ke Ekapolon: Ŋimoŋin ŋulusorok ŋitomon ka ŋiuni, ŋimeesekin ŋiarei ka ŋikaalei ŋulumesekin ŋitomon ka ŋiomwon ŋulu erae apolou kec ekaru epei, ido tomam neni eŋwalit.

¹⁴ Ikwapei ainakinet ŋina a ŋikinyom, emaikina iyes yaut ŋakirya ŋuna ajokak ŋuna iguritoe ka akimyet: Ŋakirya ŋakiloi ŋauni aŋuna a ŋolomoŋ a ŋulutomon ka ŋiuni, ŋakiloi ŋaarei aŋuna a ŋolomesek a ŋuluarei

¹⁵ ka akilo apei aŋuna a ŋinikale a ŋulutomon ka ŋiomwon.

¹⁶ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit kaapei ka ainakinet ŋina a ŋikinyom ta ainakinet ŋina a ŋimaten.

¹⁷ Akoloŋit ŋina etupakini ŋin, emaikina iyes yaut ŋimoŋin ŋulusorok ŋitomon ka ŋiarei, ŋimeesekin ŋiarei ka ŋikaalei ŋulumesekin ŋitomon ka ŋiomwon ŋulu erae apolou kec ekaru epei ŋulu emam neni eŋwalit.

¹⁸ Emaikina daŋ yaut ŋainakineta ŋuna a ŋikinyom ka ŋuna a ŋimaten aŋuna a ŋimoŋin ka aŋuna a ŋimeesekin ta aŋuna a ŋinikale lopite ŋolo elimunitere alokisil aŋuna a ekimar kec.

¹⁹ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit kaapei ka ainakinet ŋina a ŋikinyom ka ŋina a ŋimaten.

²⁰ Ani epete ŋirwa ŋiuni, emaikina iyes yaut ŋimoŋin ŋulusorok ŋitomon ka epei, ŋimeesekin ŋiarei ka ŋikaalei ŋulumesekin ŋitomon ka ŋiomwon ŋulu erae apolou kec ekaru epei, ŋulu emam neni eŋwalit.

²¹ Emaikina daŋ yaut ŋainakineta ŋuna a ŋikinyom ka ŋuna a ŋimaten aŋuna a ŋimoŋin ka a ŋimeesekin ta aŋuna a ŋikaalei, lopite ŋolo elimunitere alokisil aŋuna a ekimar kec.

²² Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina a ŋikinyom ka ŋina a ŋimaten.

²³ Ani epete ŋirwa ŋiomwon emaikina iyes yaut ŋimoŋin ŋulusorok ŋitomon, ŋimeesekin ŋiarei ka ŋikaalei ŋulumesekin ŋitomon ka ŋiomwon ŋulu erae apolou kec ekaru epei emam neni eŋwalit.

²⁴ Emaikina daŋ yaut ŋainakineta ŋuna a ŋikinyom ka ŋuna ŋimaten aŋuna a ŋimoŋin ka a ŋimeesekin ka aŋuna a ŋikaalei, lopite ŋolo elimunitere alokisil aŋuna a ekimar kec.

²⁵ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit kaapei ŋainakineta ŋuna a ŋikinyom ta ŋuna a ŋimaten.

²⁶ Ani, epete ŋirwa ŋikan, emaikina iyes yaut ŋimoŋin ŋulusorok ŋikanikaomwon, ŋimesekin ŋiarei ka ŋikaalei ŋulumesekin ŋitomon ka ŋiomwon ŋulu erae apolou ekaru epei, ŋulu emam neni eŋwalit.

²⁷ Emaikina daŋ yaut ŋainakineta ŋuna a ŋikinyom ka ŋuna a ŋimaten aŋuna a ŋimoŋin ka ŋimeesekin ta aŋuna a ŋikaalei lopite ŋolo elimunitere alokisil aŋuna a ekimar kec.

²⁸ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit kaapei ka ainakinet ŋina a ŋikinyom ta ŋina a ŋimaten.

²⁹ Ani epete ŋirwa ŋikanikapei, emaikina iyes yaut ŋimoŋin ŋikanikauni, ŋimeesekin ŋiarei ka ŋikaalei ŋulumesekin ŋitomon ka ŋiomwon ŋulu emam neni eŋwalit ŋulu erae apolou kec ekaru epei.

³⁰ Emaikina daŋ yaut ŋainakineta ŋuna a ŋikinyom ka ŋuna a ŋimaten aŋuna a ŋimoŋin ka a ŋimeesekin ka aŋuna a ŋikaalei, lopite ŋolo elimunitere alokisil aŋuna a ekimar kec.

³¹ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit kaapei ka ainakinet kec ŋina a ŋikinyom ta ŋina a ŋimaten.

³² Ani epete ŋirwa ŋikanikaarei, emaikina iyes yaut ŋimoŋin ŋulusorok ŋikanikaarei, ŋimeesekin ŋiarei ka ŋikaalei ŋulumesekin ŋitomon ka ŋiomwon ŋulu emam neni eŋwalit, ŋulu erae apolou kec ekaru epei.

³³ Emaikina daŋ yaut ŋainakineta ŋuna a ŋikinyom ka ŋuna a ŋimaten aŋuna ŋimoŋin ka aŋuna a ŋimeesekin ta ŋikaalei, lopite ŋolo elimunitere alokisil aŋuna a ekimar kec.

³⁴ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit ka ainakinet ŋina a ŋikinyom ta ŋina a ŋimaten.

³⁵ Ani epete ŋirwa ŋikanikauni emaikina iyes tocunakinos kilipa, nyemaikina toloto loticisyo kitiyata.

³⁶ Emaikina iyes yaut ŋainakineta nu ŋuna epeyo, ŋuna ebob eure aneni ke Ekapolon: Emoŋ, emesek ka ŋikaalei ŋulumesekin ŋikanikaarei ŋulu erae apolou kec ekaru epei, ŋulu emam neni eŋwalit.

³⁷ Emaikina daŋ yaut ŋainakineta ŋuna a ŋikinyom ka ŋuna a ŋimaten aŋuna emoŋ, aŋuna a emesek ka aŋuna a ŋikaalei lopite ŋolo elimunitere alokisil aŋuna a ekimar kec.

³⁸ Emaikina daŋ iyes yaut ekoroe erae ainakinet aŋuna ka asecit, yaut kaapei ka ainakinet ŋina epeyo ŋina a ŋinakoloŋit ka ainakinet ŋina a ŋikinyom ka ŋina a ŋimaten.

³⁹ Emaikina iyes yaut neni ke Ekapolon ŋainakineta ŋun alorwa a ŋulu a ŋasuban a ŋuna etubunitoe. Emaikina iyes yaut ŋainakineta ŋun kaapei ka ŋainakineta ŋuna ikoŋitotor iyes, ŋainakineta ŋuna ka acamit a ŋinituŋanan ikwapei ŋainakineta ŋuna epeyo, ŋainakineta ŋuna a ŋikinyom, ŋuna a ŋimaten ta ŋainakineta ŋuna ke ekisil.

⁴⁰ Aŋun, abu Moses tolimok Ŋisirael ŋakiro daadaŋ lopite ŋolo ecikitor Ekapolon iŋes.