Ekim. 28 - Ebaibul

Ŋainakineta aŋuna a ŋinakoloŋit

¹ Kirwor Ekapolon neni a Moses tema,

² “Kicik Ŋisirael daadaŋ, tolimok ikes ebe, ‘Emaikina iyes yaut neni kaŋ anapaki a ŋina etubunitoe ŋainakineta ŋuna epeyo ŋuna a ŋamugati aŋuna ebob eure kec aneni kaŋ.’”

³ Tolimok ikes atemar erae nu ŋainakineta ŋuna epeyo, ŋuna emaikina iyes inakis neni a Ekapolon: Ŋikaalei ŋulumesekin ŋiarei ŋulu erae apolou kec ekaru epei, ŋulu emam neni eŋwalit ikwapei ŋainakineta ŋuna a ŋinakoloŋit.

⁴ Inak ikale ipei taparacu, ido inak ŋinice eboŋ,

⁵ emaikina inakinae ŋinikale kaapei ka ainakinet ŋina a ŋikinyom ŋina erae akilo apei ŋina a ŋakirya iguritoe a akimyet a ŋina ajokan a ŋina erae elita epei.

⁶ Erae ŋun ŋainakineta ŋuna epeyo ŋuna emaikina inanakinetei a ŋinakoloŋit, ŋuna epeyo ŋuna ebob eure kec aneni ke Ekapolon.

⁷ Ikwapei ainakinet ŋina a ŋimaten, emaikina inakinae aŋuna a ŋinikale elita epei ŋolo ke epiini; emaikina tobukokinae aŋuna ke Ekapolon ainakinet ŋina a ŋimaten nakibois ŋina asegan.

⁸ Emaikina iyoŋ inak ikale ŋinice eboŋ kaapei ka ainakinet ŋina a ŋikinyom ta ainakinet ŋina a ŋimaten lopite ŋolo etiyaere aŋuna ka ainakinet a ŋina ka ataparacu. Emaikina inak iŋes erae ainakinet ŋina epeyo ŋina ebob eure aneni ke Ekapolon ka ŋina elakara Ekapolon aŋuna keŋ.

Ŋainakineta aŋuna a Sabato

⁹ Akoloŋit ŋina a Sabato emaikina iyoŋ yau ŋikaalei ŋiarei ŋulumesekin ŋulu erae apolou ekaru epei, ŋulu emam neni eŋwali, yau ŋul kaapei ka ainakinet ŋina a ŋikinyom ŋakiloi ŋaarei ŋuna a ŋakirya a ŋuna ajokak a ŋuna iguritoe ka akimyet ta ainakinet ŋina a ŋimaten.

¹⁰ Erae ŋin ainakinet ŋina epeyo ŋina a ŋinakoloŋit a Sabato ŋina emaikina yaunae kaapei ka ainakinet ŋina epeyo a ŋinakoloŋit ta ainakinet ŋina a ŋimaten.

Ŋainakineta aŋuna a ŋololap.

¹¹ Ŋirwa ke elap epei a ŋololap, emaikina iyes yaut ŋainakineta nu ŋuna epeyo neni ke Ekapolon: Ŋimoŋin ŋulusorok ŋiarei, emesek, ŋikaalei ŋulumesekin ŋikanikaarei ŋulu erae apolou kec ekaru epei, ido tomam neni eŋwalilt

¹² ka daŋ aŋuna a ŋolomoŋ, emaikina yaunae ŋakiloi ŋauni ŋuna a ŋakirya ŋuna ajokak a ŋuna iguritoe ka akimyet ikwapei ainakinet ŋina a ŋikinyom ka aŋuna a emesek, emaikina yaunae ŋakiloi ŋaarei ŋuna a ŋakirya a ŋuna ajokak a ŋuna iguritoe ka akimyet

¹³ ka aŋuna a ŋinikalemesek, emaikina yaunae akilo apei ŋina a ŋakirya a ŋuna ajokak a ŋuna iguritoe ka akimyet. Erae ŋin ainakinet ŋina epeyo ŋina ebob eure aneni ke Ekapolon.

¹⁴ Ŋainakineta kec ŋuna a ŋimaten erae ŋilitae ŋiarei ŋulu ke epiini aŋuna a ŋolomoŋ, elita epei aŋuna emesek ka elita epei aŋuna a ŋinikalemesek. Erae ŋun ŋainakineta aŋuna a ŋololap, alolapyo a daadaŋ a ŋulu ke ekaru.

¹⁵ Tosodi emaikina yaunae ekoroe epei erae ainakinet neni ke Ekapolon aŋuna ka asecit a ŋina emaikina yaunae kaapei ka ainakinet ŋina epeyo a ŋinakoloŋit ta ainakinet ŋina a ŋimaten.

Ŋainakineta a apaki a ŋina a Paska

¹⁶ Ŋirwa ke elap ŋitomon ka ŋiomwon elap ŋolo ke epei, emaikina yaunae ŋainakineta ŋuna a Paska.

¹⁷ Ani edoli ŋirwa ke elap ŋitomon ka ŋikan elap ŋol, emaikina kitiyata ŋasuban; emaikina ŋituŋa kimuja ŋamugati ŋuna emam ŋakinyalet ŋirwa ŋikanikaarei.

¹⁸ Akoloŋit ŋin, emaikina ŋituŋa tocunakinos iwapei kilipa, nyilot loticisyo kus akitiya.

¹⁹ Emaikina yaunae neni ke Ekapolon ŋainakineta ŋuna epeyo: Ŋimoŋin ŋulusorok ŋiarei, emesek ka ŋikaalei ŋulumesekin ŋikanikaarei ŋulu erae apolou ke ekaru epei ŋulu emam neni eŋwalit.

²⁰ Ainakinet kec ŋina a ŋikinyom emaikina erae ŋakirya ŋuna ajokak ŋuna iguritoe ka akimyet; aŋuna a ŋolomoŋ, emaikina yaunae ŋakiloi ŋauni ŋuna a ŋakirya aŋuna a emesek, emaikina yaunae ŋakiloi ŋaarei

²¹ ka aŋuna a ŋinikale a ŋulukanikaarei emaikina yaunae akilo apei ŋina a ŋakirya;

²² emaikina daŋ yaunae ekoroe epei ikwapei ainakinet aŋuna ka asecit aŋuna ka amookunia iyes.

²³ Emaikina iyes yaut ŋainakineta ŋun kaapei ka ŋainakineta ŋuna epeyo a ŋina taparacu, ŋun erae ŋainakineta ŋuna a ŋinakoloŋit.

²⁴ Alopite a ŋolopei a ŋol emaikina iyes yaut a ŋinakoloŋit alotooma ŋirwa ŋikanikaarei, akimuj ŋina epeyo ŋina erae ainakinet ŋina ebob eure aneni ke Ekapolon, einakinio iŋes kaapei ka ainakinet ŋina epeyo ŋina a ŋinakoloŋit ta ainakinet ŋina a ŋimaten.

²⁵ Tosodi akoloŋit ŋina a ŋakanikaarei emaikina iyes tocunakinos iwapei kilipa, nyiloto loticisyo kus kitiyata.

Ŋainakineta aŋuna a ŋasuban a ŋisabito

²⁶ Akoloŋit ŋina iyauniata iyes ŋaraito ŋuna eŋarenok, apaki ŋina iyauniata iyes neni ke Ekapolon ainakinet ŋina a ŋikinyom aŋuna a ŋasuban a ŋisabito, emaikina iyes tocunakinos kilipa, nyilot loticisyo kus kitiyata.

²⁷ Emaikina iyes yaut ŋainakineta nu ŋuna epeyo, ŋuna ebob eure kec aneni ke Ekapolon: Ŋimoŋin ŋiarei ŋulusorok, emesek ka ŋikaalei ŋulumesekin ŋikanikaarei ŋulu erae apolou kec ekaru epei, ŋulu emam neni eŋwalit.

²⁸ Ikwapei ainakinet ŋina a ŋikinyom, emaikina iyes yaut ŋakirya ŋuna ajokak ŋuna iguritoe ka akimyet, emaikina iyes yaut ŋakirya ŋuna iguritoe ka akimyet ŋakiloi ŋauni aŋuna a ŋolomoŋ, ŋakiloi ŋaarei aŋuna a emesek

²⁹ ka akilo apei aŋuna a ŋinikale a ŋulukanikaarei.

³⁰ Emaikina daŋ iyes yaut ekoroe aŋuna ka amookuno kus.

³¹ Einakinio ŋainakineta ŋun kaapei ka ŋainanakineta ŋuna epeyo ŋuna a ŋinakoloŋit kaapei ka ŋainakineta ŋuna a ŋikinyom ta ainakinet ŋina a ŋimaten. Emaikina ŋibaren ŋul daadaŋ emam neni eŋwalit.