Ekim. 27 - Ebaibul

Ŋidwe a Selopead ŋulupesur

¹ Arae Selopead lokoku ka Eper, a ŋolo arae lokoku a Gilead, a ŋolo arae lokoku a Makir, a ŋolo arae lokoku a Manase, a ŋolo arae lokoku a Yosepu. Ayakar Selopead ŋidwe ŋulupesur bon; ŋirorwa kec ikes lu: Mala, Noa, Ogila, Milika ka Tirisa.

² Apotu ŋidwe a Selopead ŋulupesur ŋul toloto towua alokiŋaren Moses, Eleasar esacaradoti, ŋikarikok a Ŋisirael ka atukot a Ŋisirael daadaŋ alokiŋaren eema ŋolokilipet temasi,

³ “Abu papa kosi totwana analoŋisat, pa arae iŋes epei a ŋituŋa a ŋulu apotu tocunakinos toŋero Ekapolon kaapei ka Kora, nai atwani iŋes aŋuna ka asecit keŋ a elope, ido amamukar iŋes ŋidwe ŋulusapa.

⁴ Kaanukiro nai elemarere ekiro a papa kosi anateker keŋ aŋuna pa auruunitor iŋes ŋidwe ŋulusapa? Inakinae isua akwap ŋina eruwor ŋina kosi lopite ŋolo aryamuniata ŋiyeneta a papa kosi.”

⁵ Abu nai Moses yau ŋakiro kec neni ke Ekapolon,

⁶ ido tolimok Ekapolon Moses tema,

⁷ “Iyookinito ŋidwe a Selopead anakiro aŋuna iŋitasi ikes, emaikina iyoŋ kire inak ikes akwap ŋina eruwor ŋina kec aneni a ŋiyeneta a papa kec, inak ikes akwap ŋina emaikina eruwor ŋina a papa kec.

⁸ Tolimok daŋ Ŋisirael ŋakiro nu, ‘Ani ketwana ekile nyewuruuna ikoku ŋinisapat, emaikina iyoŋ inak neni a nakoku keŋ ŋalup a papa keŋ;

⁹ ani kemamukar ituŋanan ŋin tari ikoku ŋinipese, einakinio ŋalup keŋ neni a ŋikaitotoi keŋ;

¹⁰ Ani kemamukar iŋes tari ŋikaitotoi einakinio ŋalup neni a ŋikaitotoi a Papa keŋ,

¹¹ ani kemamukar papa keŋ ŋikaitotoi; einakinio ŋalup keŋ neni a iyenet a idio anateker keŋ a ekile a ŋol, ido eruwor ŋalup ŋun ŋuna a iyenet a ŋin. Eruwor ŋun ŋakiro ŋuna etubunitoe ka ekisil aŋuna a Ŋisirael lopite ŋolo ecikitor Ekapolon Moses.’ ”

Toseunae Yosua akilunyokin neni a Moses.

¹² Tolimok Ekapolon Moses tema, “Kitipeiyo kidiama lomoru ŋol, ŋolo enyaritae Abiram, ido kiŋolik akwap ŋina adau ayoŋ ainakin neni a Ŋisirael.

¹³ Kidau iyoŋ akiŋolikin, itwani iyoŋ ikwapei ŋituŋa ŋulu atwaka, lopite ŋolo atwania lokaato kon Aron;

¹⁴ anerae ipotu iyoŋ ka Aron toŋero ŋakiro kaŋ, analoŋisat a ŋina a Sin apaki ŋina eŋuruŋurar atukot a Ŋisirael neni kaŋ, ipotu iyes nyikitopoloosi ayoŋ anasegis kaŋ alokiŋaren kec anakipi a ŋuna a Meriba.” (Erae ŋun ŋakipi a Meriba a ŋina alo Kades analoŋisat a Sin.)

¹⁵ Tolimok Moses Ekapolon tema,

¹⁶ “Elipi Ekapolon Akuj ŋina a ŋitai a ŋituŋa a daadaŋ, toseu ituŋanan ice ŋini epolokini atukot a Ŋisirael,

¹⁷ ŋini iŋarenikini ikes elosete lojie, ido toboŋunio, ŋini iŋarenikini ikes aloticisyo kec a daadaŋ ikotere ŋituŋa a Ekapolon nyikwaanikin ka ŋamesekin ŋuna emam ekeyokon.”

¹⁸ Aŋun tolimok Ekapolon Moses tema, “Tonyarau Yosua lokoku a Nun, ekile ŋolo eyai etau ŋolo ka Akuj, tosodi kidokok ŋakan kon nakou keŋ,

¹⁹ kitowo iŋes alokiŋaren Eleasar esacaradoti ka alokiŋaren atukot a Ŋisirael daadaŋ, tosodi tolimok iŋes epupete ka itete ŋituŋa daadaŋ ŋakiro ŋuna emaikina iŋes kitiya.

²⁰ Inak iŋes apolou kon ace, ikotere atukot a Ŋisirael daadaŋ iwuapi ŋuna elimuni iŋes.

²¹ Nai, ewoi iŋes alokiŋaren Eleasar esacaradoti, ŋolo iŋitununui aŋuna keŋ ŋakiro anakisileerekinet a ŋina ke Ekapolon, mati kelimu iŋes atemar apena toloto nai Ŋisirael daadaŋ ka iŋes lojie ka mati kelimu iŋes atemar oboŋosi, iŋes nai eboŋunioto iŋes ka Ŋisirael daadaŋ alojie.”

²² Aŋun, abu Moses kitiya ikwapei ecikitor Ekapolon iŋes. Abu iŋes tonyarau Yosua, kitowo iŋes alokiŋaren Eleasar esacaradoti ka alokiŋaren atukot a Ŋisirael daadaŋ;

²³ tosodi kidokok Moses ŋakan keŋ nakou a Yosua, ido tolimok iŋes ŋuna emaikina kitiya lopite ŋolo alimokinitor Ekapolon iŋes.