Ekim. 26 - Ebaibul

Kimarae anyamet ŋinakitete

¹ Kedaun edeke ŋolo abu toar ŋituŋa, kirwor Ekapolon neni a Moses ka neni ka Eleasar a esacaradoti a ŋolo arae lokoku ka Aron,

² “Kimara Ŋisirael daadaŋ ŋulu erae ŋikaru kec ŋatomoniarei ka adepar. Kimara ikes a ŋatekerin kec, kimara Ŋisirael daadaŋ ŋulu epedorito alosit lojie.”

³ Apotu Moses ka Eleasar esacaradoti kirworo ka ŋituŋa anadipoe a Moab alodiyete aŋolol Yorodan aneni iteosi ka Yeriko; tolimokis Moses ka Eleasar ŋituŋa temasi,

⁴ “Kimara ŋituŋa daadaŋ ŋulu erae ŋikaru kec ŋatomoniarei ka adepar, ikwapei icikitor Ekapolon Moses.” Ŋisirael ŋulu apote anakwap a Ijipit ikes lu:

⁵ Ŋiletok a Ruben alokoku a Isirael a ŋolo kiya ikes lu: Anok, iŋes papaa a ateker a Ŋianoki, Palu, iŋes papaa a ateker a Ŋipalui,

⁶ Esiron iŋes papaa a ateker a Ŋierisoni; Karimi, iŋes papaa a ateker a Ŋikarimi.

⁷ Arae ŋun ŋatekerin a ŋiletok a Ruben, arae ekimar a ŋulu aponi kimarunae ŋalipyo ŋatomoniomwon ka ŋauni ka ŋamiae ŋakanikaarei ka ŋatomoniuni.

⁸ Lokoku a Palu iŋes Eliab

⁹ ka ŋidwe a Eliab ikes lu: Nemuel, Dasan ka Abiram. Dasan ka Abiram ŋul ikes abu sek ekiŋaren atukot a Ŋisirael toseu ka ikes apotu kitepega Moses ka Aron, toriwo ka ata a Kora apaki ŋina aŋerioto Ekapolon.

¹⁰ Apotu ikes kiyuuwaar tooma nalup, tolomasi ikes daadaŋ nalup kaapei ka Kora ŋolo apotu ŋirukitos keŋ totwaka apaki ŋina anomiyarya akim ŋikilyok ŋulu arae ekimar kec ŋamiae ŋaarei ka ŋatomonikan; apotu ŋun toruworos akitoodikinet aneni a Ŋisirael.

¹¹ Nai pa keponi toarae ŋiletok a Kora.

¹² Ŋiletok a Simeon a ŋatekerin kec ikes lu: Nemuel iŋes papaa a ateker a Ŋinemueli, Yamin iŋes papaa a ateker a Ŋiyamini, Yakin iŋes papaa a ateker a Ŋiyakini,

¹³ Sera iŋes papaa a ateker a Ŋisera, Saul iŋes papaa a ateker a Ŋisauli.

¹⁴ Arae ŋun ŋatekerin a Ŋisimeoni, ido arae ekimar a ŋulu aponi kimarunae ŋalipyo ŋatomoniarei ka ŋaarei ka ŋamiae ŋaarei

¹⁵ Arae lu ŋiletok a Gad a ŋatekerin kec: Sipon iŋes papaa a ateker a Ŋisiponi, Agi iŋes papaa a ateker a Ŋiagi, Suni iŋes papaa a ateker a Ŋisuni,

¹⁶ Oseni iŋes papaa a ateker a Ŋioseni, Eri iŋes papaa a ateker a Ŋieri,

¹⁷ Arod iŋes papaa a ateker a Ŋiarodi, Areli iŋes papaa a ateker a Ŋiareli.

¹⁸ Arae ŋun ŋatekerin a Ŋigadi, ekimar a ŋulu aponi kimarunae arae ŋalipyo ŋatomoniomwon ka ŋamiae ŋakan.

¹⁹ Arae Er ka Onan ŋidwe a Yuda ŋulusapa ŋulu apotu totwaka anakwap a Kanaan.

²⁰ Ŋiletok a Yuda a ŋatekerin kec ikes lu: Sela iŋes papaa a ateker a Ŋisela, Peres iŋes papaa a ateker a Ŋiperes, Sera iŋes papaa a ateker a Ŋisera.

²¹ Ŋiletok a Peres ikes lu: Esiron iŋes papaa ateker a Ŋiesironi, Amiul iŋes papaa a ateker a Ŋiamuli.

²² Arae ŋun ŋatekerin a ŋiletok a Yuda; arae ekimar a ŋulu aponi kimarunae a daadaŋ ŋalipyo ŋatomonikanikaarei ka ŋakanikaarei ka ŋamiae ŋakan.

²³ Ŋiletok a Isakar a ŋatekerin kec ikes lu: Tola iŋes papaa a ateker a Ŋitola, Pupa iŋes papaa a ateker a Ŋipupa,

²⁴ Yasub iŋes papaa a ateker a Ŋiyasubi Simiron iŋes papaa a ateker a Ŋisimironi.

²⁵ Arae ŋun ŋatekerin a ŋiletok a Isakar; arae ekimar a ŋulu aponi kimarunae ŋalipyo ŋatomonikanikapei ka ŋaomwon ka ŋamiae ŋauni

²⁶ Ŋiletok a Sebulon a ŋatekerin kec ikes lu: Sered iŋes papaa a ateker a Ŋiseredi, Elon iŋes papaa a ateker a Ŋieloni, Yaleel iŋes papaa a ateker a Ŋiyeleeli.

²⁷ Arae ŋun ŋatekerin a ŋiletok a Sebulon; arae ekimar a ŋulu aponi kimarunae ŋalipyo ŋatomonikanikapei ka ŋamiae ŋakan.

²⁸ Arae Manase ka Epuraim ŋidwe a Yosepu ŋulusapa.

²⁹ Ŋiletok a Manase a ŋatekerin kec ikes lu: Makir iŋes papaa a ateker a Ŋimakiri arae Makir papa a Gilead; Gilead iŋes papaa a ateker a Ŋigilead

³⁰ Arae lu ŋiletok a Gilead: Ieser iŋes papaa a ateker a Ŋieseri, Elek iŋes papaa a ateker a Ŋieleki;

³¹ Asiriel iŋes papaa a ateker a Ŋiasiriel, Sekem iŋes papaa a ateker a Ŋisekemiti

³² Semida iŋes papaa a ateker a Ŋisemida, Eper iŋes papaa a ateker a Ŋieperi.

³³ Amamukar Selopead lokoku ka Eper ŋidwe ŋulusapa, nai ayakar ŋidwe ŋulupesur, tosodi arae lu ŋirorwa a ŋidwe Selopead a ŋulupesur: Mala, Noa, Ogila, Milika ka Tirisa.

³⁴ Arae ŋun ŋatekerin a ŋiletok a Manase, arae ekimar a ŋulu aponi kimarunae ŋalipyo ŋatomonikan ka ŋaarei ka ŋamiae ŋakanikaarei.

³⁵ Ŋiletok a Epuraim a ŋatekerin kec ikes lu: Susala iŋes papaa a ateker a Ŋisusala, Beker iŋes papaa a ateker a Ŋibekeri, Taan iŋes papaa a ateker a Ŋitaani.

³⁶ Lokoku a Susela iŋes Eran, arae Eran papaa a ateker a Ŋierani.

³⁷ Arae ŋun ŋatekerin a ŋiletok a Epuraim, ido arae ekimar a ŋulu aponi kimarunae ŋalipyo ŋatomoniuni ka ŋaarei ka ŋamiae ŋakan.

³⁸ Ŋiletok a Benjamin a ŋatekerin kec ikes lu: Bela iŋes papaa a ateker a Ŋibela, Asibel iŋes papaa a ateker a Ŋiasibeli, Airam, iŋes papaa a ateker a Ŋiairami,

³⁹ Sepupam iŋes papaa a ateker a Ŋisepupami, Upam iŋes papaa a ateker a Ŋiupami,

⁴⁰ Ŋiletok a Bela aneni ka Ared ka Naaman ikes lu: Ared iŋes papaa a ateker a Ŋiaredi, Naaman iŋes papaa a ateker a Ŋinaamani.

⁴¹ Arae ŋun ŋatekerin a ŋiletok a Benjamin, tosodi arae ekimar a ŋulu aponi kimarunae ŋalipyo ŋatomoniomwon ka ŋakan ka ŋamiae ŋakanikapei.

⁴² Ŋiletok a Dan a ŋatekerin kec ikes Ŋisuami ŋulu arae ŋiletok a Suam.

⁴³ Arae ekimar a ŋulu aponi kimarunae anateker a Ŋisuami ŋalipyo ŋatomonikanikapei ka ŋaomwon ka ŋamiae ŋaomwon.

⁴⁴ Ŋiletok ka Aser a ŋatekerin kec ikes lu: Imina iŋes papaa a ateker a Ŋiimina, Isipi iŋes papaa a ateker a Ŋiisipi, Beria iŋes papaa ateker a Ŋiberia.

⁴⁵ Ŋiletok a Beria a ŋatekerin kec ikes lu: Eber iŋes papaa a ateker a Ŋieberi Malikiel iŋes papaa a ateker a Ŋimalikieli.

⁴⁶ Ayakar Aser ikoku ŋinipese ŋini anyaritae Sera.

⁴⁷ Erae ŋun ŋatekerin a ŋiletok ka Aser, arae ekimar a ŋulu aponi kimarunae ŋalipyo ŋatomonikan ka ŋauni ka ŋamiae ŋomwon.

⁴⁸ Ŋiletok a Naputali a ŋatekerin kec ikes lu: Yeseel iŋes papaa a ateker a Ŋiyaseeli, Guni iŋes papaa a ateker a Ŋiguni;

⁴⁹ Yeser iŋes papaa a ateker a Ŋiyeseri, Silem iŋes papaa a ateker a Ŋisilemi,

⁵⁰ Arae ŋul ŋiletok a Naputali a ŋatekerin kec; arae ekimar a ŋulu aponi kimarunae ŋalipyo ŋatomoniomwon ka ŋakan ka ŋamiae ŋaomwon.

⁵¹ Arae ekimar a Ŋisirael a ŋulu arae ŋikilyok a ŋulu aponi kimarunae ŋalipyo ŋamiae ŋakanikapei ka apei ka ŋamiae ŋakanikaarei ka ŋatomoniuni.

⁵² Kirwor Ekapolon neni a Moses tema,

⁵³ “Ŋituŋa ŋul ikes ekorakinio akwap toruwor ŋina kec, iwuapitae ŋirorwa ŋulu imarunitae.

⁵⁴ Ani ekabila ŋolo elalak ŋituŋa keŋ emaikina iyoŋ tokorak akwap daŋ ŋina alalan, tosodi ekabila ŋolo ekudyoko ŋituŋa, emaikina iyoŋ tokorak akwap ŋina edit; emaikina ŋikabilae daadaŋ toryamut akwap ŋina eruwor ŋina kec alokimar a ŋituŋa keŋ.

⁵⁵ Nai, ekoryo akwap anakilamilam, iwuapitae ŋirorwa atapapaa a ŋikabilae.

⁵⁶ Ekoryo ŋinakwap anakilamilam ekorakinio neni a ekabila a ŋolo elalak, kori ekudyoko ŋituŋa keŋ.”

⁵⁷ Erae lo ekimar a ŋilepi a ŋatekerin kec: Gerisom iŋes papaa a ateker a Ŋigerisoni, Kaot iŋes papaa a ateker a Ŋikaoti, Merari iŋes papaa a ateker a Ŋimerari.

⁵⁸ Erae nu ŋatekerin a Lepi: Ateker a Ŋilibini, ateker a Ŋieburoni, ateker a Ŋimali, ateker a Ŋimusi, ateker a Ŋikorai. Arae Kaos papa ka Amiram.

⁵⁹ Arae ekiro a aberu ka Amiram Yokebed nakoku a Lepi ŋina auruunio alo Ijipit. Abu Yokebed touruut ka Amiram ŋidwe lu: Aron, Moses ka nakaato kec Miriam.

⁶⁰ Abu Aron touru ŋidwe lu: Nadab Abiu ka Eleasar ta Isamar.

⁶¹ Nai apotu Nadab ka Abiu totwaka apaki ŋina ainakiniata ikes neni ke Ekapolon akim ŋina pa etaleuno.

⁶² Arae ekimar a ŋilepi a daadaŋ a ŋulu aponi kimarunae ŋalipyo ŋatomoniarei ka ŋauni, arae ŋul ŋisapa ŋulu arae apolou kec elap epei ka adepar. Pa emarakinitae ikes neni a Ŋisirael a ŋuluce, anerae pa apotu ikes toryamut akwap adio lopite ŋolo aryamuniata ŋikabilae a Ŋisirael ŋuluce.

⁶³ Erae ŋul ŋituŋa ŋulu apotu Moses ka Eleasar esacaradoti kimara apaki ŋina emaryata anadipoe aŋuna a Moab alo Kide Yorodan aneni iteosi ka Yeriko.

⁶⁴ Alotuŋa a ŋulu imarunitae a ŋul, mam ipei daŋ ŋini edounitoe apaki ŋina emaryata Moses ka Aron esacaradoti Ŋisirael analoŋisat a ŋina a Sinai.

⁶⁵ Apotu ŋituŋa ŋul daadaŋ totwaka, anerae alimunit Ekapolon aŋuna kec ebe, “Etwakete ikes analoŋisat.” Mam ikes ipei daŋ ŋini ariŋa eyari mati Kaleb lokoku a Yepune ka Yosua lokoku a Nun.