Ekim. 25 - Ebaibul

Akilip neni a Baal alo Peor

¹ Ani eriŋa Ŋisirael elomito Sitim, kisyakis ŋikilyok a Ŋisirael akiryamanakin ka ŋaberu ŋuna arae Ŋamoabi.

² Apotu ŋaberu ŋun torikokis Ŋisirael akitiya ŋamuronisya neni a ŋakujo a Ŋimoabi, kisyakis Ŋisirael akimuj ka akilip neni a ŋakujo a Ŋimoabi.

³ Aŋun, apotu kisyakis akilip neni a Baal alo Peor. Apotu ŋakiro ŋun kitoŋoa Ekapolon, toŋoik Ŋisirael.

⁴ Tolimok Ekapolon Moses tema, “Tocunak ŋikarikok a ŋituŋa daadaŋ, toar ikes daadaŋ naparan alokiŋaren Ekapolon, ikotere ejoŋoe Ekapolon aŋoikinit Ŋisirael.”

⁵ Kirwor Moses neni a ŋikatubok a Ŋisirael tema, “Emaikina iyes toara ŋinituŋanan kus ŋini ilipi neni a Baal alo Peor.”

⁶ Apaki ŋinapei ŋin, yau Esiraelit epei aberu ŋina Midianait lotuŋa keŋ, iteete Moses ka Ŋisirael ŋuluce daadaŋ, apaki ŋin egworosi Ŋisirael alopuke ke eema a ŋolokilipet.

⁷ Ani iŋolikini Pineas lokoku ka Eleasar a ŋolo arae lokoku ka Aron a esacaradoti ŋakiro ŋun, tonyou toesik atukot a Ŋisirael. Tolemu akwara,

⁸ kiwuapak Esiraelit ŋolo ayauni aberu ŋina Midianait, kicum ikes daadaŋ ŋiarei nakookyes. Aŋun, abu edeke tojoŋo akiar Ŋisirael.

⁹ Nai ŋulu apotu totwaka aŋuna ke edeke arae ŋalipyo ŋatomoniarei ka ŋaomwon.

¹⁰ Kirwor Ekapolon neni a Moses tema,

¹¹ “Alema Pineas lokoku ka Eleasar a ŋolo erae lokoku ka Aron a esacaradoti aŋoit kaŋ neni a Ŋisirael, aŋuna ainakina keŋ neni kaŋ alokiŋaren Ŋisirael, aŋun abu ayoŋ analilit kaŋ nyamunya Ŋisirael.

¹² Aŋun, tolimok Pineas ebe, ‘Ikicamun ayoŋ ka iŋes anacamunet kaŋ a ŋina ke ekisil.

¹³ Eruwor aneni keŋ ka aneni a ŋiletok keŋ acamunet ŋin ŋina ka asacaradotonu ŋinaruba, anerae ainakina iŋes aŋuna ka Akuj keŋ, ido amooku iŋes Ŋisirael anasecit.’ ”

¹⁴ Ekiro a ekile a ŋolo abu Pineas toar, a ŋolo aaryo kaapei ka aberu ŋina Midianait arae Simiri lokoku a Salu, ekarikon a ateker a ŋina arae ŋina a Ŋisimeoni.

¹⁵ Arae ekiro ka aberu a ŋina Midianait a ŋina aaryo Kosibi nakoku a Sur a ŋolo arae ekarikon a ateker alo Midian.

¹⁶ Tolimok Ekapolon Moses tema,

¹⁷ “Kiman Ŋimidian, tomunya ikes,

¹⁸ anerae apotu ikes ikimana iyoŋ ikimodiyasi anakiro a ŋuna alo Peor ka a Kosibi anakaato kec, arae Kosibi nakoku a ekarikon a ateker a Midian, a aberu a ŋina aponi toarae akoloŋit ŋina abunio edeke lotuŋa aŋuna a ŋakiro alo Peor.”