Ekim. 23 - Ebaibul

¹ Tolimok nai Balaam Balak tema, “Todukok ne aŋuna kaŋ ŋamuroeta ŋakanikaarei, ido tolemu aŋuna kaŋ ŋimoŋin ŋikanikaarei ka ŋimeesekin ŋikanikaarei.”

² Kitiya Balak lopite ŋolo alimokinitor Balaam iŋes ka apotu Balak ka Balaam inakis erae ainakinet, emoŋ epei ka emesek epei alokidiama ŋinamuroet.

³ Tosodi Balaam tolimok Balak tema, “Kiboiye a ne alodiyete ŋainakineta kon ŋuna epeyo, alosi mono ayoŋ nawae; acepaki ebuni Ekapolon akirwor ka ayoŋ, ŋuna daadaŋ eketoodikini iŋes ayoŋ abuni ayoŋ alimokin iyoŋ.”

⁴ Abu nai Akuj totakanu neni a Balaam, ido tolimok Balaam Akuj tema, “Etemok ayoŋ ŋamuroeta ŋakanikaarei, ido ainak neni kon emoŋ ka emesek alokidiama ŋinamuroet.”

⁵ Tolimok Ekapolon Balaam tema, “Toboŋo neni a Balak, ŋakiro nu ikes emaikina iyoŋ tolimok iŋes.”

⁶ Aŋun, abu Balaam toboŋo neni a Balak a ŋolo awoi alodiyete ŋainakineta keŋ ŋuna epeyo, awuasi iŋes a nen kaapei ka ŋikapolok ŋulu ka akwap a Moab daadaŋ.

⁷ Tosodi kirwor Balaam ŋakiro ŋuna kebu Akuj tolimok iŋes tema, “Akayau ayoŋ Balak alo Aram, akayau ayoŋ erwosit a Moab alomoru a ŋulu alo Kide ebala, ‘Bua, kicen ŋituŋa a Yakob aŋuna kaŋ, bua, kisitak Ŋisirael.’

⁸ Ekokini ayoŋ eceni ŋini nyecamit Akuj akicen ai? Ekokini ayoŋ esitakini ŋini nyecamit Akuj akisitakin ai?

⁹ Ete ayoŋ ikes alokidiama ŋatabab ŋuna aoyak, ete ayoŋ ikes alokidiama ŋikamukumukui. Erae ŋituŋa ŋul ŋulu iboiyete ka akec etyakara ikes alotuŋa a ŋakwapin aŋunace!

¹⁰ Ŋae epedori akimar ŋiletok a Isirael ŋulu alalak ŋul? Ŋae epedori akimar ŋiletok a Yakob ŋulu alalak ŋul? kimyekinae ayoŋ otwan arae ituŋanan ŋini eyookino kimyekinae ayoŋ otwan lopite ŋolo atwania iŋes!”

¹¹ Kiŋit nai Balak Balaam tema, “Anukiro itiya ayoŋ neni kaŋ? Akayaunit ayoŋ iyoŋ akicen ŋimoe kaŋ, nai tokona nyitiya iyoŋ ŋadi, mati akiterereŋ ikes.”

¹² Toboŋok Balaam tema, “Nyemaikina mono ayoŋ ocoite alimun ŋakiro ŋuna akalimokini Ekapolon ayoŋ a?”

ŋakiro a Balaam ŋuna a ŋaarei

¹³ Tema nai Balak neni a Balaam, “Bua oloto ka ayoŋ nakibois ace, neni ipedorya iyoŋ akiŋolikin ikes, iŋolikini ikes ŋice, nai nyiŋolikini iyoŋ ikes daadaŋ; ido kicen ikes aŋuna kaŋ anakibois a ŋin.”

¹⁴ Aŋun abu Balak ya Balaam nakibois ŋina anyaritae Sopim alokidiama emoru Pisiga. Todukok Balak ŋamuroeta ŋakanikaarei nen, tosodi inak erae amuronot emoŋ epei ka emesek epei alokidiama ŋinamuroet.

¹⁵ Tolimok Balaam Balak tema, “Towo a ne alodiyete ŋainakineta kon ŋuna epeyo, alosi mono ayoŋ ama akiryamun ke Ekapolon.”

¹⁶ Kiryamun Balaam a Ekapolon, ido tolimok Ekapolon Balaam tema, “Toboŋo neni a Balak, ŋakiro nu ikes emaikina iyoŋ tolimok iŋes.”

¹⁷ Ani eboŋori Balaam neni a Balak, awoi Balak apaki ŋin alodiyete ŋainakineta keŋ ŋuna epeyo awuasi iŋes a nen kaapei ka ŋikapolok ŋulu ka akwap a Moab. Kiŋit Balak Balaam tema, “Anukiro alimu Ekapolon?”

¹⁸ Kirwor Balaam ŋakiro keŋ nu tema, “Bua Balak, ido kiira, topupokinae ayoŋ, okoe lokoku a Sipor.

¹⁹ Nyirworo Akuj alyokonu ikwa ituŋanan, ka nyiloconokini Akuj ikwa ituŋanan ŋatameta keŋ. Ŋuna daadaŋ iikini iŋes isiyookini, ŋuna daadaŋ elimuni iŋes, itiyakini

²⁰ Kiira, akalimokinitae ayoŋ akiterereŋ, adau iŋes akiterereŋ, ido nyalemari ayoŋ arereŋu ŋin.

²¹ Mam aronis eŋolik Akuj itiyaete ŋituŋa a Yakob, mam akisyanu eŋolik Akuj itiyaete ŋituŋa a Isirael. Erukito ikes ka Ekapolon Akuj kec, elimorito ikes atemar arae Akuj erwosit kec.

²² Akuj ŋina abu yau ikes anakwap a Ijipit, iŋes eji aŋuna kec lopite ŋolo ejio emoŋ ŋolo aryenyaanan.

²³ Kire, mam ŋakikukujaeta ŋuna itoroniayarito ŋuna Yakob, mam ŋadwareta ŋuna aronok ŋuna itoroniarito Isirael. Tokona elimunio aŋuna a Yakob ka Isirael ebe, ‘Kiŋolikisi ŋuna etiya Akuj!’

²⁴ Kiŋolik ŋituŋa ŋulu anyout esibit aŋatuny anyout esibito eŋatuny ŋolo adedeŋan, ŋolo nyeperi akitodol ŋina enyamia etyaŋ ŋolo ikamunit ka ŋina emasya ŋaokot a ŋityaŋ a ŋulu adau iŋes akiar.”

²⁵ Abu nai Balak tema neni a Balaam, “Nyicen ikes jik ka nyiterereŋ ikes jik.”

²⁶ Nai tolimok Balaam Balak tema, “Nyelimokina mono ayoŋ iyoŋ ebe, ‘Ŋuna daadaŋ akalimokini ayoŋ Ekapolon ikes emaikina ayoŋ etiya a?’ ”

²⁷ Aŋun, tolimok Balak Balaam tema, “Bua tokona, akayai ayoŋ iyoŋ nakibois ace, acepaki italakari Akuj akicen ikes aŋuna kaŋ anakibois a ŋin.”

²⁸ Abu nai Balak ya Balaam kidiama emoru Peor, ŋolo erounit aloŋisat.

²⁹ Tolimok Balaam Balak tema, “Todukok aŋuna kaŋ ne ŋamuroeta ŋakanikaarei ka kitemok ŋimoŋin ŋikanikaarei ka ŋimeesekin ŋikanikaarei aŋuna kaŋ.”

³⁰ Abu nai Balak kitiya lopite ŋolo alimokinitor Balaam iŋes, tosodi inak erae amuronot emoŋ epei ka emesek epei alokidiama ŋinamuroet.