Ekim. 20 - Ebaibul

Ŋakipi ŋuna a Meriba

¹ Todolut Ŋisirael daadaŋ naloŋisat ŋina a Sin elap ŋolo ke epei, kiboiyoto ŋituŋa alo Kades. Abu Miriam totwan a nen ka tonukae nen.

² Amam ŋakipi ŋuna emasete ŋituŋa a nen; aŋun, apotu ŋituŋa daadaŋ tocunun kisiburata Moses ka Aron.

³ Kisiburata ŋituŋa Moses temasi, “Okoe, kerae ca totwakitetei isua daŋ apaki ŋina amunyarya Ekapolon ŋiyeneta kosi.

⁴ Kaanukiro iyaunia iyoŋ ŋituŋa ke Ekapolon naloŋisat na, otwaka isua kaapei ka ŋibaren kosi a ne?

⁵ Kaanukiro ikiyaunia iyoŋ isua anakwap a Ijipit, nakibois na ŋina aronon nooi? Nyerae na akwap ŋina eya ŋikinyom, kori a ŋaboboryo, kori ŋikito a epiini ka ŋina emam ŋakipi ŋuna emasyo.”

⁶ Apotu nai Moses ka Aron toloto aneni ayai atukot a ŋituŋa, toloto lopuke ŋolo ke eema a ŋolokilipet, toryediko, todolo ŋireetin kwap, abu nai akica a Ekapolon totakanu neni kec.

⁷ Kirwor Ekapolon neni a Moses tema,

⁸ “Totiŋ ebela, ido tocunakisi ka Aron Ŋisirael daadaŋ tolimok ataaba epupete ikes kitolomu ŋakipi a nen. Aŋun, itolomuni iyoŋ ŋakipi anataaba aŋuna kec. Iinakini nai iyoŋ ŋakipi neni a ŋituŋa ka ŋibaren kec.”

⁹ Aŋun, abu Moses tolemu ebela totiŋ alokiŋaren Ekapolon, ikwapei ecikitor Ekapolon iŋes.

¹⁰ Tonyaraut Moses ka Aron ŋituŋa iwapei diyete ataaba, tolimok Moses ikes tema, “Kiirasi iyes ŋikaŋerok, ikiinakinio isua iyes ŋakipi anataaba a na a?”

¹¹ A nen, kikyaa Moses akan keŋ, toram ataaba ŋin ŋarwa ŋaarei a ebela keŋ; kiyesun ŋakipi elalak nooi, tomata ŋituŋa ka ŋibaren kec.

¹² Nai tolimok Ekapolon Moses ka Aron tema, “Aŋuna pa ikikinyomitotor iyes ayoŋ, ikotere itoodiunete apedor kaŋ ŋina asegan iteete Ŋisirael, nyeruwor iyes iyaarete ŋituŋa lu nakwap ŋina ainakinit ayoŋ ikes.”

¹³ Arae ŋun ŋakipi a Meriba neni aponiata Ŋisirael kiŋuruŋura neni a Ekapolon ka neni abunio Ekapolon kitoodiunia apedor keŋ ŋina asegan.

Towounae Ŋisirael atubor anakwap a Edom

¹⁴ Alo Kades, abu Moses kiyakiya ŋituŋa neni ke erwosit a Edom ebala; “Ŋakiro alokaato kon a Isirael ikes nu, iyeni iyoŋ ŋatyokisyo daadaŋ ŋuna aponi isua toryamunae:

¹⁵ Iyeni iyoŋ epite ŋolo atiyaarotor atapapaa kosi Ijipit, kiboi isua alo Ijipit apaki ŋina aoyan ka apotu Ŋijipitian ikisicana isua ka atapapaa kosi,

¹⁶ ido ani ikaloikinio isua Ekapolon, abu kiira akigworo kosi, tosodi kiyaku emalaika keŋ, ŋolo abu ikiyau isua anakwap a Ijipit, ikiya tokona isua ne Kades, lotaun ŋolo eyai lokukoru a akwap kon.

¹⁷ Ikilipit tokona isua iyoŋ, kimyekinae isua totuboretei anakwap kon, nyeriyo isua lomanikor edio, kori lomanikor a ŋikito ke epiini, nyemasyo isua ŋakipi anakare ka adio, emekinio isua erot ŋolo a ŋirwosi, akitodol ŋina etuborere isua anakwap kon.”

¹⁸ Nai apotu Ŋiedomi temasi, “Nyitorete iyes nakwap kosi, ani kitiyata iyes ŋun eponio isua akitijikin iyes.”

¹⁹ Tolimokis Ŋisirael ikes temasi, “Iwuapakinio ro isua erot bon, ido ani kemasi isua kaapei ka ŋibaren kosi ŋakipi kus, itemokino isua ikisicani a ŋun. Ekudyoko ro ŋakiro nu, kimyekinae ro iyes isua totuboretei.”

²⁰ Temasi Ŋiedomi, “Nyitorete iyes a nakwap kosi jik.” Apotu nai Ŋiedomi potu neni a Ŋisirael erae ajore ŋina alalan nooi, eyakatar ŋiboro ŋulu ke ejie.

²¹ Aŋun, apotu Ŋiedomi towout Ŋisirael akitor nakwap kec, ido apotu Ŋisirael nyitor nakwap a Ŋiedomi.

Atwanare ka Aron

²² Towotokis Ŋisirael daadaŋ alo Kades todolo Moru Or.

²³ Alo Moru Or a ŋolo eyai lokukoru a akwap ke Edom, kirwor Ekapolon neni a Moses ka Aron tema,

²⁴ “Emaikina Aron totwana ikwapei atapapaa keŋ, anerae nyelomari iŋes nakwap ŋina ainak ayoŋ Ŋisirael aŋuna iponiata iyes toŋero ŋuna alimuni ayoŋ aŋuna a ŋakipi a Meriba.

²⁵ Ya Aron ka lokoku keŋ Eleasar Moru Or;

²⁶ ani edolete nen, tolacu ŋilowi aneni ka Aron, ido kitanapik neni a lokoku keŋ a Eleasar. Nai etwani Aron ikwapei atapapaa keŋ, etwani iŋes aina.”

²⁷ Kitiya Moses ikwapei ecikitor Ekapolon iŋes; kitipeiyosi iŋes ka Aron ta Eleasar kidiama lomoru Or iteete ŋituŋa daadaŋ.

²⁸ Tolaca Moses ŋilowi aneni ka Aron, kitanapik neni a Eleasar alokoku ka Aron, ido abu Aron totwana alokidiama emoru. Totiyaun nai Moses ka Eleasar alokidiama emoru.

²⁹ Ani eanyunete Ŋisirael daadaŋ atemar ketwana Aron, apotu kigworo iŋes ŋirwa ŋatomoniuni.