Ekim. 19 - Ebaibul

Ŋasuban ŋuna a ataok a ŋina areŋan

¹ Kirwor Ekapolon neni a Moses ka Aron tema,

² “Erae nu ŋakiro ŋuna etubunitoe anakiciket a ŋina alimu Ekapolon,” tolimok Ŋisirael ikiinut iyoŋ ataok ŋina areŋan, ŋina emam neni eŋwalit, ŋina nyitoroniyaritae ka emam ayokot keponi toenikinae.

³ Emaikina iyoŋ inak ataok ŋin neni a Eleasar a esacaradoti, tosodi yaarae ataok ŋin kiŋa alomar, toŋolae eyai Eleasar.

⁴ Elemuni Eleasar ŋolo erae esacaradoti ŋaokot ataok a ŋin ŋadi a ekimoin keŋ, towuatak kiŋaren eema ŋolokilipet ŋawuatakinet ŋakanikaarei.

⁵ Ekaku emaikina kicunyae ataok ŋin ite Eleasar, emaikina kicunyarae ejamu keŋ, akiriŋ keŋ ka ŋaokot keŋ ta ŋikujit keŋ.

⁶ Elemuni esacaradoti akitoe ŋina a Cedar, ekitoe ŋolo enyaritae Isop ka ausi ŋina areŋan, tosodi kimasak ikes nakim ŋina icunyere ataok.

⁷ Emaikina nai esacaradoti kilota ŋilowi keŋ ka kiloŋar, kedau ŋun epedori alomar nalomar, nai erubakini esacaradoti itoroniyaritae akitodol eboŋ.

⁸ Emaikina ŋolo ecunyi ataok daŋ kilota ŋilowi keŋ ka kiloŋar; erubakini iŋes daŋ itoroniyaritae akitodol eboŋ.

⁹ Emaikina nai ituŋanan ŋini nyitoroniyaritae tomuda ekuron a ataok, kiwuak nakibois ŋina eseg ŋina ke etal alokiŋa alomar. Iŋadaaryo ekuron ŋol aŋuna a Ŋisirael ka aŋuna ka akiwuakin nakipi ŋuna italeununeere ŋituŋa. Arae ŋin ainakinet ŋina italeunere ŋituŋa.

¹⁰ Emaikina ŋolo amudari ekuron a ataok kilota ŋilowi keŋ, ido erubakini itoroniyaritae akitodol eboŋ. Eruwor ŋun ŋakiro ŋuna etubunitoe aŋuna a Ŋisirael ka ŋigelaanotin daadaŋ ŋulu iboiyete ka ikes, ŋuna emaikina kiwuapae ŋikaru ka ŋikaru.

¹¹ Ŋulu etapete akuwan a ituŋanan a ŋini atwanit, erubakinete itoroniyaritae ŋirwa ŋikanikaarei.

¹² Epedorete ikes akiteseguno a ŋakipi edolete ŋirwa ŋiuni ka edolete ŋirwa ŋikanikaarei, ameun anakoloŋit a ŋina etoroniyarere ikes; aŋun, nyitoroniyaryo ikes. Nai ani pa kitesegunosi ikes edolete ŋirwa ŋiuni ka edolete ŋirwa ŋikanikaarei, nyitesegunio ikes nabo.

¹³ Ŋituŋa daadaŋ ŋulu etapete akuwan a ituŋanan a ŋini etwanit, ido nyitaleunosi, emunaarete eema ŋolo ke Ekapolon. Emaikina ŋituŋa ŋulu ikote ŋul totyakarae alo Isirael; anerae nyewuatakina ŋakipi ŋuna italeere ŋituŋa neni kec, aŋun, erubakinete ikes itoroniyaritae ka eyakatar aronis kec.

¹⁴ Erae lo ekisil aŋuna a ituŋanan a ŋini etwani alotooma eema: Ituŋanan daadaŋ ŋini elomuni loeema ka ituŋanan daadaŋ ŋini eyai tooma eema, eruwor ŋini itoroniyaritae akidol ŋirwa ŋikanikaarei.

¹⁵ Tosodi ŋiboro daadaŋ ŋulu eya nen, ŋulu nyerapap eruworosi ŋulu itoroniyaritae.

¹⁶ Ituŋanan daadaŋ ŋini etapi anariet akuwan a ituŋanan a ŋini kearyo a ekileŋ, kori ŋini ketwani bon, kori akoit a ituŋanan, kori alyal a ituŋanan eruwor iŋes ŋini itoroniyaritae akidol ŋirwa ŋikanikaarei.

¹⁷ Ŋituŋa ŋulu itoroniyaritae epedorete alemun ekuron a ainakinet a ŋina italeunere ituŋanan, ido kiwuakinae ŋakipi ŋuna eleleete loborosit ŋolo eyai ekuron,

¹⁸ tolemu ituŋanan ŋini nyitoroniyaritae ekitoe ŋolo enyaritae Isop, kilumok nakipi, ido towuatak ŋakipi loeema ka loboro daadaŋ ŋulu eya tooma eema ka neni a ituŋanan a daadaŋ a ŋini ayai loeema ka a ŋini atapit akoit a ituŋanan, kori a ŋini atapit ituŋanan ŋini kearyo, kori akuwan a ituŋanan a ŋini etwanit, kori alyal.

¹⁹ Ewuatakini ituŋanan ŋini nyitoroniyaritae ŋituŋa ŋulu itoroniyaritae ŋakipi edolete ŋirwa ŋiuni, kori edolete ŋirwa ŋikanikaarei, aŋun, kitaleu ikes edolete ŋirwa ŋikanikaarei. Ekaku ilotarete ikes ŋilowi kec ka kiloŋarosi, ani edoli eboŋ eruworosi ikes ŋulu nyitoroniyaritae.

²⁰ Ituŋanan daadaŋ ŋini itoroniyaritae, ido nyitaleun, emaikina ituŋanan ŋin totyakarae anatukot aŋuna amunaarya iŋes eema ŋolo ke Ekapolon, anerae nyewuatakina iŋes ŋakipi ŋuna italeere ŋituŋa, aŋun, itoroniyaritae iŋes.

²¹ Eruwor ŋun ŋakiro ŋuna etubunitoe, ŋuna emaikina kiwuapae ŋikaru ka ŋikaru. Ituŋanan ŋini ewuasi ŋakipi ŋunakitaleet, emaikina kilota ŋilowi keŋ, ido ituŋanan daadaŋ ŋini etapi ŋakipi ŋunakitaleet, eruwor ŋini itoroniyaritae akitodol eboŋ.

²² Ibore daadaŋ ŋini etapi ituŋanan ŋini itoroniyaritae, eruwor ŋini itoroniyaritae ka ituŋanan daadaŋ ŋini etapi ŋiboro ŋulu abu ituŋanan ŋin totap, eruwor ŋini itoroniyaritae akitodol eboŋ.