Ekim. 12 - Ebaibul

Tolilikis Aron ka Miriam Moses

¹ Apaki ŋina alomitotor Ŋisirael Aseros, kirworo Miriam ka Aron itoroniarito Moses aŋuna abunio iŋes kiisya aberu ŋina abunit alo Kusi (anerae abu iŋes kiit aberu ŋina arae Akusait).

² Temasi ikes, “Erwor mono Ekapolon aneni a Moses bon a? Nyirworit mono iŋes aneni kosi daŋ a?” Abu Ekapolon kiira ŋakiro ŋun.

³ Arae Moses ituŋanan ŋini etiditeuna bon nooi akilo ŋituŋa daadaŋ anakwap.

⁴ Apaki ŋinapei, tolimok Ekapolon Moses, Aron ka Miriam tema, “Potu kiŋa iyes ŋuluuni, potu loeema ŋolokilipet.” Aŋun, apotu ikes ŋiuni potu kiŋa.

⁵ Abu nai Ekapolon bu neni kec eyai nadis, towo alopuke ke eema a ŋolokilipet, tosodi tonyara Aron ka Miriam, ido toloto ŋuluarei ŋul kiŋaren.

⁶ Tema Ekapolon, “Kiirasi ŋakiro kaŋ nu: Ani eyakasi ŋikadwarak kidiŋ kus, ayoŋ Ekapolon, atakanikini neni kec, erworo ayoŋ neni kec anakirujaeta.

⁷ Nyikote ŋakiro nen aneni a eketiyan kaŋ Moses; icikakinitae iŋes akiyok ŋituŋa kaŋ daadaŋ.

⁸ Erworo ayoŋ neni keŋ iteoi ŋireetin, ileerete ŋakiro, meere a ŋakitadapeta, ekete iŋes ayoŋ. “Kaanukiro nai pa ikeritotor iyes akirwor itoroniarito eketiyan kaŋ Moses?”

⁹ Toŋoik Ekapolon ikes nooi, ido tolot.

¹⁰ Ani eakari adis alokidiama eema ŋolokilipet, abu atapon kikam Miriam, abu akuwan keŋ tokwaŋiar kikwaanikin ka ŋalepan. Ani iŋoliyari Aron neni a Miriam, kiŋolik atemar kikamu atapon Miriam.

¹¹ Tema nai Aron neni a Moses, “Okoe ekapolon kaŋ, nyikisican isua aŋuna ka asecit a ŋina etiyae isua aŋuna ka abaŋao.

¹² Nyimyek Miriam ikwaanikin ka ikoku ŋini idounio eriŋa apaki keŋ, ŋini emunaara akuwan keŋ epeiwae daadaŋ apaki ŋina elomunia iŋes anakook a toto keŋ.”

¹³ Abu nai Moses kikaloik Ekapolon tema, “Okoe Akuj, kitoŋaleu kare ca iŋes.”

¹⁴ Nai toboŋok Ekapolon Moses tema, “Ani kerae kimwaakinete papa keŋ iŋes loreet, pa mono kidaŋidaŋit iŋes ŋileec keŋ ŋirwa ŋikanikaarei a? Kimyek togoloroe iŋes kiŋa alomar ŋirwa ŋikanikaarei, ani elunyar ŋirwa ŋul kinyakunae iŋes nalomar.”

¹⁵ Aŋun, aponi togoloroe Miriam kiŋa alomar ŋirwa ŋikanikaarei, ido apotu ŋituŋa nyewotokis a nen akitodol ŋina enyakunere Miriam nalomar.

¹⁶ Kedaun akinyakun Miriam nalomar, towotokis Ŋisirael alo Aseros, ido toloma naloŋisat ŋina a Paran.