Ekim. 10 - Ebaibul

Ŋarupepe ŋuna etiyaunitae a Esilipa

¹ Kirwor Ekapolon neni a Moses tema,

² “Kitiyau a esilipa ŋarupepe ŋaarei, emaikina iyoŋ kityeku ikes kisitiya anyaraunununia Ŋisirael iwapei ka akitowotonokinia Ŋisirael anakiboisyo a ŋuna elomeneneete ikes.

³ Ani ekutakinio ŋarupepe ŋunaarei daadaŋ kaapei, ecunun atukot a Ŋisirael daadaŋ kiŋaren kon lopuke ŋolo ke eema a ŋolokilipet.

⁴ Nai ani ekutakinio arupepe apei bon, ŋikarikok ka ŋikapolokinitok a ŋikabilae a Ŋisirael make ikes ecunun kiŋaren kon.

⁵ Ani eruunete ŋarupepe erae ŋuna ke eli, aruunet ŋina esyaunan, ewotokinete ŋituŋa a ŋikabilae a ŋulu elomito lowae ŋolo alo Kide alomar

⁶ ka ani eruunete nabo aruunet ŋina a ŋaarei, ewotokinete ŋituŋa a ŋikabilae a ŋulu elomito lowae ŋolo alo Kwap alomar.

⁷ Nai ani ecamitae ŋituŋa tocununos iwapei, ekutakinio ŋarupepe nai nyeruut esibit eramio eli.

⁸ Ŋidwe ka Aron ŋulusapa ŋulu erae ŋisacaradotin ikes emaikina ekusete ŋarupepe, emaikina ŋun kiwuapae ananyameta a daadaŋ a ŋuna eponito.

⁹ Ani ilosete iyes lojie anakwap kus, akitijikin ŋimoe ŋulu ikitijikinete iyes, iramakinete iyes eli ikusete ŋarupepe, ikotere ikitamuni iyes Ekapolon Akuj kus, ido itoiu alomoe kus.

¹⁰ Tari alorwa a ŋulu ka alelyanu kus ka alorwa a ŋulu itiyaata iyes ŋasuban kus ŋuna etubunitoe ka anakisyakinet a elap, emaikina iyes tokutakis ŋarupepe apaki ŋina iauniata iyes ŋainakineta kus ŋuna epeyo ka ŋamuronisya ŋuna ke ekisil, eruwor ŋarupepe akiteyenikinet nabo Ekapolon ŋakiro kus. Arae ayoŋ Ekapolon Akuj kus.”

Awotokin alo Sinai

¹¹ Ani edoli ŋirwa ke elap ŋatomoniarei elap ŋolo a ŋiarei ekaru ŋolo a ŋiarei kedaut Ŋisirael alomun anakwap a Ijipit, abu adis kikyaar alokidiama eema ŋolo ayai Asaduku ŋina ka Acamunet.

¹² Apotu nai Ŋisirael towotokis analoŋisat a ŋina a Sinai, ani edolete naloŋisat ŋina a Paran towo adis a nen.

¹³ Towotokis Ŋisirael awotokinet ŋina esyaunan ikwapei ecikia Ekapolon Moses.

¹⁴ Arae ŋatuketa a ŋituŋa a ŋulu apolokinit ekabila a Yuda ikes ageunete awotokin a ŋatuketa kec iŋarenikinit abendera, Nason lokoku ka Aminadab iŋes arikit ŋatuketa ŋun.

¹⁵ Nasaniel lokoku a Suar iŋes arikit ŋatuketa a ŋituŋa a ŋulu apolokinit ekabila a Isakar

¹⁶ ka ŋatuketa a ŋituŋa a ŋulu apolokinit ekabila a Sebulon arae Eliab lokoku a Elon iŋes arikit.

¹⁷ Kedaut ŋituŋa ŋul daadaŋ awotokin, tolacunae nai eema inakinae ŋituŋa a ŋatekerin a Ŋigerisoni ka Ŋimerari todaka, towotokis nai ŋul daŋ,

¹⁸ kiwuapakis nai ŋatuketa a ŋituŋa a ŋulu apolokinit ekabila a Ruben towotokis ŋul daŋ a ŋatuketa kec, arae Elisur lokoku Sedeur iŋes arikit ikes daadaŋ,

¹⁹ arikit Selumiel lokoku ka Surisadai ŋatuketa a ŋituŋa a ŋulu apolokinit ekabila a Simeon,

²⁰ ido arae Elisap lokoku ka Deuel arikit ŋatuketa a ŋituŋa a ŋulu apolokinit ekabila a Gad.

²¹ Ekaku towotokis nai Ŋikaoti ŋulu ewokito ŋiboro ŋulu asegak, amaikina eema todukokinae eriŋa ikes nyedoluno neni elomio.

²² Ekaku kiwuapakis ŋatuketa a ŋituŋa a ŋulu apolokinit ekabila a Epuraim, towotokis ŋulu daŋ a ŋatuketa kec. Arae Elisama lokoku ka Amiud iŋes arikit ŋatuketa ŋun,

²³ arikit Gamaliel lokoku a Pedasur ŋatuketa a ŋituŋa a ŋulu apolokinit ekabila a Manase,

²⁴ ido arae Abidan lokoku a Gideoni iŋes arikit ŋatuketa a ŋituŋa a ŋulu apolokinit ekabila a Benjamin.

²⁵ Ekaku a daadaŋ towotokis ŋatuketa a ŋituŋa a ŋulu apolokinit ekabila a Dan, ikes ewasiyete alokaku a ŋatuketa daadaŋ, towotokis ŋul daŋ a ŋatuketa kec. Aieser lokoku ka Amisadai iŋes arikit ikes.

²⁶ Pagiel lokoku ka Okiran iŋes arikit ŋatuketa a ŋituŋa a ŋulu apolokinit ekabila ka Aser

²⁷ ka arae Aira lokoku ka Enan iŋes arikit ŋatuketa a ŋituŋa a ŋulu apolokinit ekabila a Naputali.

²⁸ Arae ŋol epite ŋolo awosyata Ŋisirael a ŋatuketa kec apaki ŋina ewotokiniata.

²⁹ Kirwor Moses neni ka Obab a lokoku a Reuel a ŋolo arae lokamuran a Moses a ŋolo abunit anakwap a Midian tema, “Awotokin tokona isua nakwap ŋina ikilimokinit isua Ekapolon ebe, ‘Akainakini ayoŋ iyes,’ bua orukosi ka isua, itiyao isua ejok neni kon; anerae iikinit Ekapolon ajokis neni a Ŋisirael.”

³⁰ Nai tolimok Obab Moses tema, “Nyalosi ayoŋ, nai aboŋori ayoŋ nakwap kaŋ a elope ka loyeneta kaŋ.”

³¹ Tema Moses neni ka Obab, “Nyikimyek isua, anerae iyeni iyoŋ neni emaikina isua tolomae analoŋisat ka iruwor iyoŋ eketenan kosi;

³² nabo daŋ kikiruko iyoŋ ka isua, ajokis daadaŋ ŋina itiyae Ekapolon neni kosi, ŋunapei ŋun itiyao isua daŋ neni kon.”

³³ Aŋun, apotu ikes towotokis alomoru ke Ekapolon (iŋes Sinai), torubakis ewosete ŋirwa ŋiuni, kiŋarenikinite ikes Asaduku ŋina ka Acamunet ke Ekapolon aryamun aŋuna kec akibois ŋina elomete,

³⁴ ayai adis ke Ekapolon kidiama kec naparan, apaki ŋina awotokiniata ikes alomoru Sinai.

³⁵ Apaki daadaŋ ŋina erotokinioto ŋulu adakito Asaduku ŋina ka Acamunet atemanari Moses, “Tonyou Ekapolon, elipi kielarae ŋimoe kon, elipi tobwaŋas ŋimoe kon alokiŋaren kon.”

³⁶ Ido ani ieŋunete ŋulu adakito Asaduku ŋina ka Acamunet, atemanari Moses, “Toboŋu okoe Ekapolon lotuŋa a Isirael ŋulu erae ŋalipyo ka ŋalipyo.”