Ekim. 1 - Ebaibul

Akimaro ŋina esyaunan

¹ Akoloŋit ŋina esyaunan a elap a ŋolo a ŋiarei, alokaru a ŋolo a ŋiarei ameun anakoloŋit a ŋina arotokinioto Ŋisirael alo Ijipit, abu Ekapolon kirwor neni a Moses aloeema a ŋolo ilipere, apaki ŋina ayakatar Ŋisirael naloŋisat ŋina a Sinai. Tema Ekapolon neni a Moses,

² “Kimar ŋituŋa a ŋikabilae a Ŋisirael daadaŋ a ŋatekerin ka a ŋikalya atapapaa kec; kigir ŋirorwa a ŋikilyok a daadaŋ a ŋipeipei,

³ ameun a ŋulu erae ŋikaru kec ŋatomoniarei ka adepar, kigir ŋikilyok daadaŋ alo Isirael ŋulu epedorete alosit lojie; kigira iyoŋ ka Aron ŋirorwa kec a ŋasepico.

⁴ Emaikina iyes toseut epeikile alotooma ŋolokabila akiŋarakin iyes alotic a ŋol, emaikina ŋikilyok ŋul torae ŋikarikok a ŋatekerin kec.

⁵ Erae lu ŋirorwa a ŋikilyok a ŋulu emaikina ikiŋarakis iyes: Alokabila a Ruben, toseu Elisur lokoku a Sedeur,

⁶ alokabila a Simeon, toseu Selumiel lokoku a Surisadai,

⁷ alokabila a Yuda, toseu Nason lokoku ka Aminadab,

⁸ alokabila a Isakar, toseu Nasanael lokoku a Suar,

⁹ alokabila a Sebulon, toseu Eliab lokoku ke Elon,

¹⁰ toseu lu alodwe a Yosepu: Alokabila a Epuraim, toseu Elisama lokoku ka Amiud, alokabila a Manase, toseu Gamaliel lokoku ka Pedasur.

¹¹ Alokabila a Benjamin, toseu Abidan lokoku ka Gideoni,

¹² alokabila a Dan, toseu Aieser lokoku ka Amisadai,

¹³ alokabila ka Aser, toseu Pagiel lokoku ka Okiran,

¹⁴ alokabila a Gad, toseu Elisap lokoku a Deuel,

¹⁵ alokabila a Naputali, toseu Aira lokoku ka Enan.

¹⁶ Arae ŋul ŋikilyok ŋitomon ka ŋiarei ŋulu arae ŋikarikok a ŋikabilae ka a ŋasepico a Ŋisirael ŋulu aponi toseunae akiŋarakin Moses ka Aron alotic a ŋolo ka akimar Ŋisirael daadaŋ.”

¹⁷ Apotu Moses ka Aron tonyaraasi ŋikilyok ŋulu aponi kigirae a ŋirorwa kec,

¹⁸ ani edoli akoloŋit ŋina esyaunan a elap a ŋolo a ŋiarei, apotu ikes tonyaraut Ŋisirael daadaŋ nakibois apei. Apotu ŋikilyok ŋul kigira Ŋisirael a ŋatekerin ka a ŋikabilae kec, ŋulukilyok daadaŋ ŋulu arae ŋikaru kec ŋatomoniarei ka adepar, aponi kigirae,

¹⁹ lopite ŋolo ecikitor Ekapolon Moses. Aŋun, abu Moses kimar Ŋisirael analoŋisat a ŋina a Sinai.

²⁰ Aponi kigirae ŋiletok a Ruben a ŋolo arae lokoku a Isirael ŋolokiyae, kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie, kigirae ikes a ŋirorwa kec a ŋipeipei, a ŋatekerin ka a ŋikalya,

²¹ arae ekimar a ŋikilyok a daadaŋ alokabila a Ruben ŋalipyo ŋatomoniomwon ka ŋakanikapei ka ŋamiae ŋakan.

²² Aponi kigirae ŋiletok a Simeon a ŋipeipei a ŋatekerin kec iwuapitae ŋikalya atapapaa kec, kigirae ŋirorwa a ŋikilyok a daadaŋ a ŋulu arae ŋikaru kec ŋatomoniarei ka adepar, ŋulu apedorito alosit lojie,

²³ arae ekimar a ŋikilyok a ŋulu aponi kigirae alokabila a Simeon ŋalipyo ŋatomonikan ka ŋikanikaomwon ka ŋamiae ŋauni.

²⁴ Kigirae ŋiletok a Gad a ŋipeipei a ŋikalya kec iwuapitae ŋikalya atapapaa kec, kigirae ŋikilyok ŋulu arae ŋikaru kec ŋatomoniarei ka adepar, ŋulu apedorito alosit lojie,

²⁵ arae ekimar a ŋikilyok a ŋulu aponi kigirae alokabila a Gad ŋalipyo ŋatomoniomwon ka ŋakan ka ŋamiae a ŋakanikapei ka ŋatomonikan.

²⁶ Kigirae ŋiletok a Yuda a ŋipeipei a ŋikalya iwuapitae ŋikalya atapapaa kec, kigirae ŋikilyok ŋulu arae ŋikaru kec ŋatomoniarei ka adepar, ŋulu apedorito alosit lojie,

²⁷ arae ekimar a ŋikilyok a ŋulu aponi kigirae alokabila a Yuda ŋalipyo ŋatomonikanikaarei ka ŋaomwon ka ŋamiae ŋakanikapei.

²⁸ Kigirae ŋiletok a Isakar a ŋipeipei a ŋikalya iwuapitae ŋikalya atapapaa kec, kigirae ŋikilyok ŋulu arae ŋikaru kec ŋatomoniarei ka adepar, ŋulu apedorito alosit lojie,

²⁹ arae ekimar a ŋikilyok a ŋulu aponi kigirae alokabila a Isakar ŋalipyo ŋatomonikan ka ŋaomwon ka ŋamiae ŋaomwon.

³⁰ Kigirae ŋiletok a Sebulon a ŋipeipei a ŋikalya iwuapitae ŋikalya atapapaa kec, kigirae ŋikilyok ŋulu arae ŋikaru kec ŋatomoniarei ka adepar, ŋulu apedorito alosit lojie,

³¹ arae ekimar a ŋikilyok a ŋulu aponi kigirae alokabila a Sebulon ŋalipyo ŋatomonikan ka ŋakanikaarei ka ŋamiae ŋaomwon.

³² Kigirae ŋiletok a Yosepu lu: Aloletok a Epuraim, aponi kigirae ŋikilyok a ŋikalya iwuapitae ŋikalya atapapaa kec, kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie,

³³ arae ekimar a ŋikilyok a ŋulu aponi kigirae alokabila a Epuraim ŋalipyo ŋatomoniomwon ka ŋamiae ŋakan.

³⁴ Aloletok a Manase, aponi kigirae ŋikilyok a ŋikalya kec iwuapitae ŋikalya atapapaa kec, kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie,

³⁵ arae ekimar a ŋikilyok a ŋulu aponi kigirae alokabila a Manase ŋalipyo ŋatomoniuni ka ŋaarei ka ŋamiae ŋaarei.

³⁶ Kigirae ŋiletok a Benjamin a ŋikalya, iwuapitae ŋikalya atapapaa kec kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie,

³⁷ arae ekimar a ŋikilyok a ŋulu aponi kigirae alokabila a Benjamin ŋalipyo ŋatomoniuni ka ŋakan ka ŋamiae ŋaomwon.

³⁸ Kigirae ŋiletok a Dan a ŋikalya kec iwuapitae ŋikalya atapapaa kec, kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie,

³⁹ arae ekimar a ŋikilyok a ŋulu aponi kigirae alokabila a Dan ŋalipyo ŋatomonikanikapei ka ŋaarei ka ŋamiae ŋakanikaarei.

⁴⁰ Kigirae ŋiletok ka Aser a ŋikalya kec iwuapitae ŋikalya atapapaa kec, kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie,

⁴¹ arae ekimar a ŋikilyok a ŋulu aponi kigirae alokabila ka Aser ŋalipyo ŋatomonikanikapei ka ŋaarei ka ŋamiae ŋakan.

⁴² Kigirae ŋiletok a Naputali a ŋikalya kec iwuapitae ŋikalya atapapaa kec, kigirae ŋikilyok daadaŋ ŋulu arae ŋikaru kec ŋatomoniarei ka adepar, ŋulu apedorito alosit lojie,

⁴³ arae ekimar a ŋikilyok a ŋulu aponi kigirae alokabila a Naputali ŋalipyo ŋatomonikan ka ŋauni ka ŋamiae ŋaomwon.

⁴⁴ Arae ŋul ŋikilyok ŋulu apotu Moses ka Aron kigira, iŋarakinito ikes ŋikilyok ŋulutomon ka ŋiarei ŋulu arae ŋikarikok a ŋikabilae a Ŋisirael a ŋulutomon ka ŋiarei.

⁴⁵ Ekimar a Ŋisirael a ŋulu arae ŋikilyok ŋulu arae ŋikaru kec ŋatomoniarei ka adepar ka a ŋulu apedorito alosit lojie

⁴⁶ arae ŋalipyo ŋamiae ŋakanikapei ka ŋauni ka ŋamiae ŋakan ka ŋatomonikan.

⁴⁷ Nai pa aponi kimarae ekabila a ŋilepi kaapei ka Ŋisirael ŋuluce.

⁴⁸ Kirwor Ekapolon neni a Moses tema,

⁴⁹ “Nyemaikina iyoŋ ikigir ŋilepi, kori kimar ikes kaapei ka Ŋisirael ŋuluce.

⁵⁰ Nai emaikina iyoŋ kiwuak ŋilepi akitere eema ŋolo ilipere ka ŋiboro daadaŋ ŋulu eya tooma keŋ. Ani apaki ŋina iwotokiniata iyes anakibois ka adio, ŋilepi ikes edakete eema ŋolo ilipere kaapei ka ŋiboro daadaŋ ŋulu eya tooma keŋ, emaikina ikes kiteto eema ŋol, ido toduko ŋiemae kec kirimokis eema ŋolo ilipere.

⁵¹ Ani iwuotokinete iyes anakibois a adio, ŋilepi ikes elacunete eema ŋol ka ikes pei edukokinete nabo nakibois ŋina ilomete iyes, ituŋanan daadaŋ ŋini eapuuni loeema ŋol emaikina toarae.

⁵² Edukokinete Ŋisirael ŋuluce ŋiemae kec a ŋalomarisinei kec, ŋinituŋanan nalomar kec diyete abendera kec,

⁵³ nai edukokinete ŋilepi ŋiemae kec diyete eema ŋolo eyai Asaduku ŋina ka Acamunet irimokinito eema ŋol, ikotere nyeyakaun anyunyura ŋina ka Akuj natukot a Ŋisirael, ŋilepi make emaikina iyokiyete eema ŋol ŋolo eyai Asaduku ŋina ka Acamunet.”

⁵⁴ Apotu Ŋisirael kitiyata ŋun daadaŋ lopite ŋolo ecikitor Ekapolon Moses.