Ekal. 9 - Ebaibul

Toyar lopite ŋolo eyakar akiyar a ŋinakoloŋit

¹ Abu ayoŋ otamatama ŋakiro ŋun daadaŋ, ido abu oyenu atemar napedor ŋina ka Akuj iŋes eyakasi ŋulu iyookino ka ŋikaosok ta ŋuna itiyaete ikes, nai mam ituŋanan eyeni kerae amina ebuni neni keŋ; kori ŋiman epote neni keŋ.

² Etakanununete ŋuna aronok neni a daadaŋ: Neni a ŋulu iyookino ka neni a ŋulu nyiyookino, neni a ŋulu ajokak, neni a ŋulu aronok, neni a ŋulu nyitoroniyaritae ka neni a ŋulu itoroniyaritae neni a ŋulu eayeneneete ŋamuronisya ka neni a ŋulu nyeayeneneete ŋamuronisya ŋuna etakanikinete neni a ŋituŋa a ŋulu ajokak, etakanununete neni a ŋikasecak daŋ; ŋuna etakanunete neni a ŋulu ikoŋeneneete, etakanununete neni a ŋulu ekerito akikoŋ.

³ Eroko ŋakiro ŋun ŋuna etakanunete neni a ŋinituŋanan ŋun, ikwaan aronis kec ka aronis ŋina etakanunui neni a ŋinibore anakwap a na. Apaki daadaŋ ŋina iboiyoto ŋituŋa anakwap a na, ileleba aronis natameta kec ka imasimasit ikes, ido elemari atwanare ikes atipei pa eyenete.

⁴ Nai ituŋanan daadaŋ ŋini eriŋa eyari anakwap a na a ŋina eyakasi ŋituŋa ŋulu eyarete, eyakar ituŋanan ŋin akigeno, toyenete atemar ejok eeŋok ŋolo eyari akilo eŋatuny ŋolo etwanit.

⁵ Eyenete ŋituŋa ŋulu eyarete atemar ikitwaki, nai nyeyenete ŋulu atwaka idiobore, emam nabo ibore eryamunete ikes, nyeriŋa nabo etamunitae ikes jik.

⁶ Apuripuryaar jik amina, akimanit ka arakao ŋuna ayakatar ikes neni a ŋuluce; emam nabo aloboro a daadaŋ a ŋulu etakanunete ŋulu epedorete ikes akimor ka ŋituŋa ŋuluce anakwap a na.

⁷ Torubakisi imujete akimuj kus analakara ka imasete ŋimaten kus analelyanu a ŋitai kus; anerae edaunit sek Akuj akitemokin ŋuna emaikina iyes kitiyata.

⁸ Torubakisi jwi jwi inapito ŋilowi ŋulu ka apolou ka iosasi akimyet.

⁹ Emaikina ŋinituŋanan elelyani anakwap keŋ kaapei ka aberu keŋ ŋirwa ŋulu erae ŋikoŋinae lu daadaŋ ŋulu adau Akuj ainakin ŋituŋa akiboiyo anakwap a na.

¹⁰ Etic daadaŋ ŋolo itiyaete iyes kitiyata anagogoŋu kus a daadaŋ, anerae emam etic, kori atamatam, kori ayenut, kori aosou anakibois a ŋikatwak a ŋina ilosete iyes alomar.

¹¹ Adau nabo ayoŋ akiŋolikin ibore ice anakwap a na; ibore ŋin iŋes en, meere ekapiranan iloununui ŋuluce anakerit, kori meere ekagogoŋon iloununui alojie, meere ekaoson eyakar akimuj ŋina alalan, meere ekapiiryanan eyakar abaru, meere ŋulu eyenete akitiya ŋiboro eryamunete ajokis, nai icwanyanakin ŋun lotuŋa daadaŋ a ŋinapaki.

¹² Emam ituŋanan eyeni apaki ŋina eponiata ŋican neni keŋ. Lopite ŋolopei ereikinere ekolya akiriun ka atibait ka ŋolo isurumere ikyeny a atawuatat, ŋituŋa daŋ, ikamaryo apaki ŋina itiyaata aronis, apaki ŋina nyeyenete ikes.

Iloit aosou abaŋao

¹³ Abu ayoŋ eŋolik ibore ice nabo, erae iŋes akitaanyunet ŋina ajokan anakwap a na a ŋina abu okonira ayoŋ nooi.

¹⁴ Ayai koloŋ etaun ŋolo adit, ŋolo akudyoko ŋituŋa ŋulu eboiyete alotooma keŋ. Abu erwosit ŋolo ajiono kisiiryak ŋituŋa a etaun a ŋol, kisiryam ŋajorei keŋ etaun cib, toduk ŋidoketa kiŋa arwatata a etaun a ŋol.

¹⁵ Ayai lotaun ŋol ekile ŋolo akulyakana toos, abu ekile ŋol anaosou keŋ toiu etaun ŋol, nai mam ituŋanan alotaun a ŋol ŋini abu totamu akiŋarakin ekulyakit ŋol.

¹⁶ Aŋun amina ayoŋ atemar ejok aosou akilo agogoŋu, nai ejamuwaritae aosou a ŋikulyak ka mam ituŋanan ecamuni akiirar ŋakiro ŋuna irworosi ŋikulyak.

¹⁷ Iwuapanakinete ŋituŋa ŋakiro ŋuna epote ekililiŋat aneni a ekaoson akilo ŋuna ecelar ekepukan a ŋibaŋaanotin.

¹⁸ Ejok aosou akilo ŋiboro ŋulu a ejie, nai epedori ekasecan epei bon amunaar ibore ŋini alalan ŋini ajokan.