Ekal. 8 - Ebaibul

Kiwuap ŋuna a erwosit, ikotere toryamu alelyanu anakwap kon

¹ Ŋae ikwaan ka ituŋanan ŋini aoson? Ŋae eyeni apolou a ŋinibore? Eyaununui aosou alakara neni a ituŋanan, elemanari aosou anyoridid ŋina sek eŋoitor ituŋanan.

² Abala ayoŋ ebe, “Kiwuapa akiciket ŋina a erwosit, ido ani kicamit iyoŋ akikoŋ neni ka Akuj,

³ nyikirikirak akikoŋ. Ani pa kejokak ŋuna irworo iyoŋ aneni a erwosit, ŋirubak itepegi iŋes, torotok aneni eyai erwosit, anerae epedori iŋes akitiya neni kon ŋuna ecamit daadaŋ.

⁴ Aŋuna emaikina kiwuapae ŋuna irworo erwosit, mam ituŋanan ecamakinitae kitepeg erwosit anakiro a ŋuna irworo erwosit.

⁵ Ituŋanan daadaŋ ŋini iwuapi ŋuna irworo erwosit, emam ŋuna isicanere ituŋanan ŋin, ido ituŋanan ŋini eos, eyeni apaki ka eyeni neni itori,

⁶ anerae eyai apaki ka epite ŋolo emaikina kitiyaere ŋinibore tari daŋ kerae ŋican a ŋituŋa ŋulu kec a ŋikulepek.

⁷ Kire, mam ituŋanan eyeni ŋuna epote alokiŋaren ka mam ituŋanan ikilimokini epite ŋolo itiyakinotor ŋun.

⁸ Mam ituŋanan epedori areun atwanare, kori akitididiyore akoloŋit ŋina etwania iŋes. Erae ŋol ejie ŋolo eyakatar ŋituŋa, ŋolo emam ŋini nyitiji, nyeiuni aronis ŋulu itiyaete aronis.

⁹ Abu ayoŋ oyenu ŋun daadaŋ apaki ŋina atamya ayoŋ aŋuna ibore a daadaŋ a ŋini itiyao anakwap a na a ŋina eyakatar ŋituŋa ŋice ŋapedorosyo, ido isitiyaete ikes ŋapedorosyo ŋun aŋuna ka akiteryamunia ŋituŋa ŋuluce ŋican.”

Ileerete ŋuna ecamit Akuj ŋituŋa kiwuapa

¹⁰ Abu daŋ ayoŋ eŋolik ŋulu etiyaete aronis enukio, aminasi sek ŋul alomanar nakibois ŋina asegan ka alomunun a nen, ido epurito ŋituŋa ikes alotaun a ŋolo etiyaata ikes ŋuna aronok. Erae ŋun daŋ ŋakoŋinae.

¹¹ Aŋuna nyisicanere atipei ituŋanan ŋini itiyae aronis, eyai lotai a ŋituŋa atenit akitiya aronis.

¹² Tari daŋ kitiyaete ŋulu aronok ŋuna nyiyookino ŋakitiyaet tari amiat, ido torubakinito iboiyete apaki ŋina aoyan, ayeni ayoŋ atemar ejokyata ŋakiro aneni a ŋulu itopoloorito Akuj.

¹³ Nai nyejoketa ŋakiro aneni a ŋulu aronok, nyepedorete ikes tari akiyatakin ŋirwa ŋulu ka akiyar kec lopite ŋolo epedorya etolim aoyaar. Erae ŋun aŋuna nyitopolooritotor ikes Akuj.

¹⁴ Eyakasi nakwap ŋakiro nu ŋuna itiyao, nai erae ŋakoŋinae, ŋakiro ŋun ikes nu, eyakasi ŋituŋa ŋulu iyookino ŋulu isicanitae lopite ŋolo emaikina kisicanere ŋulu itiyaete ŋuna aronok ka eyakasi ŋituŋa ŋulu aronok ŋulu imaimaitae lopite ŋolo emaikina etiŋitere ŋituŋa ŋulu itiyaete ŋuna ajokak, ŋun daŋ abala ayoŋ erae ŋakoŋinae.

¹⁵ Aŋun, acamunit ayoŋ atemar ejok alakara anakwap a na, anerae emam ibore ejok ŋituŋa eyakatar anakwap a na akilo akimuj ka akimat, ido torae ŋulu elakara. Einakini nai nen ŋituŋa alelyanu aloticisyo kec ŋirwa daadaŋ ŋulu einakinit Akuj ŋituŋa ayarya anakwap a na.

¹⁶ Ani ekatakini ayoŋ atamatam ayenun ŋuna ka aosou ka akiŋolikin ŋiticisyo ŋulu itiyao anakwap, ayenun ŋuna nyecamitotor ŋituŋa akieŋun tojotoor naparan, kori nakwaare,

¹⁷ abu ayoŋ a ŋinapaki oyenu atemar Akuj iŋes adau atubun atemar nyemaikina ŋituŋa toyenut ŋuna itiyasi anakwap a na. Tari daŋ kikatakis ŋituŋa akitiya ka agogoŋu ayenun ŋuna itiyasi, nyepedorete ayenun. Tari daŋ kebasi ŋikaosok ikiyeni ŋuna itiyasi, nyepedorito ayenun.