Ekal. 6 - Ebaibul

Akitakadakinet ŋina aŋuna ikiburit aryamun

¹ Adau ayoŋ akiŋolikin anakwap a na aronis na ace ŋina etiŋiyarit ŋituŋa:

² Einanakini ŋituŋa ebari ŋiboro ka apolou, ikotere ŋituŋa nyicanakinosi ibore ŋini iburit ikes alotai kec, nai nyecamakinit Akuj ikes kileilyaa ŋun analakara, ido epedori igelaanot akileile ŋul daadaŋ. Erae ŋun ŋakoŋinae ka erae ŋuna eyaunito aronis.

³ Epedori ituŋanan ayakaunor ŋidwe amiat, ido kiboi ŋikaru ŋulu alalak, nai tari kelalak ŋirwa ŋulu ka akiyar keŋ, ani pa kelakara iŋes aloboro a ŋulu ajokak anakwap a na, kori pa kenuki iŋes ejok etwani, atemari ayoŋ ejok ikoku ŋini ebwaŋunitae akilo ituŋanan ŋin.

⁴ Erae ŋun, anerae elomuni ikoku ŋin kiŋa erae ikoŋinait ka elomari kwap anenipei tojoŋoi atamunit.

⁵ Nyiŋolikini ikoku ŋin akica jik, kori nyeyenuni jik atemar nyo erae akiyar, nai eryamuni iŋes akieŋun akilo ituŋanan ŋini alalan a ŋikaru ŋin.

⁶ Tari daŋ kiboi ituŋanan ŋikaru ŋalipyo ŋaarei, ido nyeryamu alakara anakwap keŋ, nyelosete mono ŋituŋa daadaŋ nakibois apei ekaku ka akiyar a na a?

⁷ Itiyaete ŋituŋa etic daadaŋ aŋuna ka aryamunia ibore ŋinikimuja, nai nyedaun ekibure ŋolo ka akimuj.

⁸ Nyo mono tokona ejokyata ŋulu aosok akilo ŋulu ebaŋaaka? Anijokis eryamunete ŋikulyak anayenun atemar epite ŋolo emaikina kilipununeere ibore ŋiniyaret iŋes akilipa anapatanu?

⁹ Ejok akiŋolikin ibore akilo akisirimit ŋatameta alokibure. Erae ŋun daŋ ŋakoŋinae ka erae akirisit ekuwuam.

¹⁰ Ibore daadaŋ ŋini eyai tokona, ayai sek ekiŋaren ka elimokinitae ekiro, ido eyenio atemar nyo erae ŋituŋa; mam ituŋanan epedori akisinda ka ŋini egogoŋ akilo iŋes.

¹¹ Ani kitooya iyoŋ erwor, eruwor ŋakiro ŋuna irworo iyoŋ ŋakoŋinae, anijokis nai eryamuni ituŋanan ŋini irworo anakiro a ŋun?

¹² Ŋae ituŋanan eyeni ŋuna ejokak aŋuna a ŋituŋa anakwap a ŋina euruwuana torae akoŋinait a na? Ikwaan akiyar na ka etorube ŋolo epatana aŋopiyar. Alipite epedoryata ŋituŋa ayenun ŋuna itiyakin nakwap na kedaut ikes anyoun anakwap a na?