Ekal. 5 - Ebaibul

Akitopoloorit, akitiditeuna bon ka akiomorikina a ibore a ŋini iyakar

¹ Toceikinite epite daadaŋ ŋolo ilosyononoo iyoŋ Kai ŋina ka Akuj. Ape kai ŋin akiirar ŋakiro ka Akuj akilo alosit ainakin ŋamuronisya ŋuna eayeneneete ŋibaŋaanotin nen; anerae nyeyenete ikes epite ŋolo eŋeryoto akitiya aronis.

² Nyikirikirak akirworo, kori nyicamak etau kon kikirikirak akiikin akirot alokiŋaren Akuj, anerae eyai Akuj nakuj ka iyai iyoŋ nakwap; aŋun, emaikina ŋakiro ŋuna ilimuni iyoŋ ekudyoko.

³ Ani kiumonok iyoŋ ŋakiro ŋuna alalak, epatana iyoŋ akiruja ŋakiro ŋuna aronok ka ani kirwor iyoŋ apaki ŋina aoyan, epatana iyoŋ akirworo ŋakiro ŋuna emam apolou.

⁴ Aŋun, ani iikini iyoŋ akirot neni ka Akuj, nyidid akitiyakin ŋuna idau iyoŋ akiikin, anerae nyelakar Akuj a ŋakiro a ŋuna irworosi ŋibaŋaanotin, kitiyak ŋuna idau iyoŋ akiikin.

⁵ Ejok iyoŋ awoun akiikin akilo iyoŋ akiikin, ido nyitiya ŋuna idau iyoŋ akiikin.

⁶ Nyicamak akituk kon ikirikori iyoŋ nasecit, ido tolimok iyoŋ eketiyan ŋolo ka Akuj ebe, “Pa eredakini ayoŋ akitiya.” Kaanukiro emaikina Akuj eŋoi a ŋakiro a ŋuna irworo iyoŋ, ido kitoŋopiya ŋiticisyo ŋulu idau iyoŋ akitiya?

⁷ Ani elalak ŋakirujaeta elalaketa ŋakiro ŋuna ŋakoŋinae; nai emaikina kitopoloorite Akuj.

⁸ Ani kiŋolik anakibois etiŋitae ŋulu a ŋican erono ka emam atubonokin anakiyookino ka akiwuapit ŋuna iyookino, nyiumok aŋuna a ŋakiro a ŋun, anerae ite ŋini epol ŋuna itiyae ŋini nyepol akilo iŋes ka eyai ice ŋini epol akilo ikes.

⁹ Nai ibore ŋini erupuni analup, erae ŋini emaikina ŋituŋa a akibois a ŋin daadaŋ toryamut; erwosit daŋ emaikina eyakar neni itae.

¹⁰ Ituŋanan ŋini emina ŋisiliŋa, nyetemari aryamu ŋisiliŋa ŋulu itemokino, tari ŋini emina ebari, nyeryamuni ibore daadaŋ ŋini ecamit iŋes aryamun.

¹¹ Ani iatakin ibore ŋininyamat, iatakin ŋikanyamak daŋ. Nyo nai eryamuni ituŋanan ŋini eyakar ibore ŋininyamat ŋin? Mam ipei daŋ mati akitere ŋituŋa imujete ebari keŋ.

¹² Ebobokinito ŋiketiyak ŋajo ejotoete, tari daŋ kimujete ikes akimuj ŋina edit, kori ŋina alalan, nai nyejotoonor ŋikabarak aŋuna etamyata akuwar kya ŋuna a ebari kec.

¹³ Adau ayoŋ akiŋolikin anakwap a na aronis eyai nakwap: Iŋadaete ŋituŋa ebari kec akitodol apaki ŋina emunaarya ebari ŋol ikes,

¹⁴ ido toŋopiya ebari ŋol daadaŋ alopite a ŋolo emam ajokis, todaun ibore eyakatar ŋikabarak ŋul, ido emam ibore irumete ŋidwe a ŋikabarak a ŋul.

¹⁵ Elomunete ŋituŋa anakookyes atatoto kec elerete lopite ŋolopei alomuniata ikes anakwap a na. Mam aloboro a ŋulu aryamunito ikes aloticisyo kec ŋulu etijete ikes a ŋakan torukoryata anakwap a na.

¹⁶ Erae nu daŋ ŋuna eyaunito aronis: Lopite ŋolopei elomuniata ŋituŋa anakookyes atatoto kec, elomarete daŋ ikes anakwap a na. Nyo nai erae eropit ŋolo eryamunete ikes anaŋirikinit etic ŋolo erae akirisit ekuwuam?

¹⁷ Nabo daŋ alorwa a daadaŋ a ŋulu eyariata ŋituŋa, imujete ŋituŋa pa eyenete ibore idio, eyakatar akadakinit ŋina apolon, eyakatar ŋidekesyo ka anyunyura.

¹⁸ Erae nu ŋuna eŋolik ayoŋ erae ŋuna ejokak: Ŋuna ejok ŋinituŋanan akitiya iŋes akimuj ka akimat, ikotere iruwor ŋini ilakara alotic a daadaŋ a ŋolo itiyae iyoŋ anakwap a na alorwa a ŋulu ekudyoko a ŋulu ikiinakinit Akuj iwon, anerae erae ŋin ainakinet ŋina ikiinakinitae iwon.

¹⁹ Ikwaŋinapei, ŋituŋa daadaŋ ŋulu ainaki Akuj ebari ka ŋiboro ŋice daŋ, ŋituŋa ŋulu ainakin alakara anakimuj ebari ŋol, emaikina ŋituŋa ŋul elakara, ido kileilyaa ibore daadaŋ ŋini adaut ikes aryamun aŋuna a ŋiticisyo kec. Erae ebari ŋol ainakinet aneni ka Akuj.

²⁰ Aŋuna acamakinia Akuj ikes aruwor ŋulu elakara, nyepatana ŋituŋa ŋul atamatam epite ŋolo euruwuaketa ŋirwa ŋulu ka akiyar kec anakwap a na.