Ekal. 4 - Ebaibul

¹ Abu nabo ayoŋ oŋoleŋolek, eŋolik epite daadaŋ ŋolo atiŋitere ŋituŋa anakwap a na erono. Abu ayoŋ eŋolik ŋakiyo a ŋulu atiŋitae erono, amamukatar ikes ituŋanan ŋini isirworiuni ikes; ayai apedori neni a ŋulu ainakinito ŋican neni kec, mam ituŋanan arae ikesirworiunan ŋulu atiŋitae erono ŋul.

² Abu ayoŋ otamak atemar ejokak ŋulu adaut atwakare akilo ŋulu eriŋa eyarete.

³ Nai ejokak ŋulu eriŋa nyetakanuna nyidouno akilo ŋulu eyarete, kori ŋulu atwaka. Ejokak ikes aŋuna nyiŋolikinitotor aronis ŋina itiyao anakwap a na.

⁴ Abu nai ayoŋ oyenu atemar itiyaete ŋituŋa eŋirikinito nooi ŋolotic daadaŋ ka ŋinapiiryanut daadaŋ, anerae erakaana ŋinituŋanan aŋuna a ŋinice. Erae ŋun daŋ ŋakoŋinae, erae akirisit ekuwuam.

⁵ Iyoolito ŋikalanyanotin ŋakan, ido kitonyamas akoro tari ŋina etwakyata.

⁶ Ejok ayakau ka ibore idio ŋini iryamunitor iyoŋ akinapakina anatameta kon, akilo a ŋirikinit akitiya ŋinapaki daadaŋ, erae nen akirisit ekuwuam.

⁷ Abu nabo ayoŋ oyenu ibore ŋini erae ikoŋinait anakwap a na;

⁸ Eyakasi ŋituŋa ŋulu iboiyete bon, emam ikes ŋidwe ŋulusapa, kori ŋikaitotoi; nyieŋuneneete ikes akitiya, nyetemanarete ikes ikitemokin ebari ŋolo eyakatar ikes. Etamete iŋitasi ebe, “Aŋuna mono a ŋae aŋirikinitor ayoŋ akitiya nyacamitor akileile ebari kaŋ?” Erae ŋun daŋ ŋakoŋinae ka etic ŋolo emam alakara iryamuni.

Ajokis ŋina a ekone

⁹ Ejok araakau ŋiarei akilo araakau ipei, anerae eryamunete ikes eropit ŋolo alalan aŋuna a etic kec a ŋolo apotu ikes toŋirikis akiŋaruŋarun.

¹⁰ Ani kibusokinosi ŋuluarei ŋul kaapei, epedori ipei akitonyoun ŋinice, nai ekaŋ iyoŋ ŋini irae iyoŋ bon, ŋini ani kibusokin todaun ŋini ikiŋarakini akitonyoun!

¹¹ Nabo ani kepero ŋiarei iwapei, isibusikinosi make, nai ikokini mono ituŋanan ipei isibusikin bon ai?

¹² Epedorete ŋituŋa ŋiarei awoikin ejie ŋolo epedoryata akilounia ituŋanan ipei. Nyepatana akiŋed auno ŋina eya ŋirotin ŋiuni, ido totubo atipei.

¹³ Esorokit ŋolo ekulyakana nai toos, iloit erwosit ŋolo erae ekasikout nai tobaŋaana, ŋolo nyecamuni jik ŋuna ajokak ŋuna elimokinete iŋes ŋituŋa ŋuluce.

¹⁴ Epedori esorokit ŋolokulyakanot ka toos ŋol alomun alojera toruwor erwosit, tari daŋ sek kidounitoe alotuŋa a apukan keŋ a ŋulu ekulyakaka.

¹⁵ Abu ayoŋ eŋolik daadaŋ ŋulu ayakasi nakwap na iwuapakinete esorokit ŋolo abu kilunyokin lokicoloŋ a erwosit kipuka.

¹⁶ Apotu ŋituŋa ŋulu epukat esorokit ŋol torubakis eyakasi. Nai ŋulu apote ekaku keŋ, apotu nyelakar aŋuna a ŋolo abu kipuka ekaku a esorokit a ŋol. Kire jik, erae ŋun daŋ ŋakoŋinae, erae akirisit ekuwuam.