Ekal. 12 - Ebaibul

¹ “Totamunito Ekasuban kus alorwa a ŋulu iriŋaakatar iyes irae ŋisorok, eriŋa ŋirwa ŋulu ka apalago nyedolo, eponito ŋikaru ŋulu itemaryata iyes ebe, ‘Mam nabo nyeriŋa akiyar aneni kosi esibit ibore ŋini ejok.’ ”

² Erae ŋin apaki ŋina irubakiniata iyes iteete akica ŋina ka akoloŋ, ŋina ke elap ta ŋina a ŋikacer emuimui, ŋina erubakiniata ŋidouwon iteete iyes iryoko esibit ebunit akiru.

³ Apaki ŋin, elomakinete ŋakan kus ŋuna sek ikiunito amaran ka ŋakejen kus ŋuna tokona egogoŋ eruwor ŋuna epalag, ekudyokunete ŋikyal kus, ido nyepedorete anyaka akimuj, emumunete ŋakonyen kus nyiŋolikinete ibore ejok.

⁴ Nyipedorete iyes akiirar ecelet ejok alorotin a ŋulu ke etaun. Nyepataniar iyes akiirar akiryeet erwo, kori ŋiboro ŋulu eore eramyo eosi ŋituŋa. nai epedori tari eruye a ikenyit akitekyenyun iyes.

⁵ Ikitimi iyes apaki ŋin adokanar nakiboisyo ŋuna aoyak, ikuryaketa iyes alosit make alorotin. Apaki ŋin ekwaŋunete ŋitim anakyes kus, ilosete iyes itiŋaarito ŋawat kus alosit, ido edaun ekibure eyai neni kus. Erae ŋun, anerae emaikina ŋituŋa daadaŋ toloto lore apolon, ido kisyakis nai ŋituŋa akiŋaiŋaa alorotin aŋuna a ŋini alot lore apolon.

⁶ Totamunito ekasuban kus eriŋa akinyasuno a ŋawat kus nyedoluno, eriŋa amojoŋu ka atwanare nyedoluno, eriŋa nyielielaara neni eyai akiyar kus ka eriŋa eitanit ŋolo ka akiyar kus nyesaluna.

⁷ Eboŋorete ŋawat yok nalup ŋunapei sek alemunere, ido eboŋorete ŋitai yok neni ka Akuj a ŋina abu kiwuak ikes nawat yok.

⁸ Ebala Ekalimonokinan ebe, “Ikoŋinait! Ikoŋinait! Ikoŋinait ibore daadaŋ!”

Ŋakiro ŋuna esidyok

⁹ Meere aosou bon ayakatar Ekalimonokinan, abu daŋ iŋes kitatam ŋituŋa ayenun ŋakiro, abu iŋes totamununu ka kiwarununu ŋakitadapeta kigir isibakit ejok.

¹⁰ Abu Ekalimonokinan kikatak akiwarunun ŋakiro ŋuna esiryoriunak, ido ŋakiro ŋuna abu iŋes kigir, arae ŋuna eyookino ka ŋuna a kire.

¹¹ Ikwaan ŋakiro a ŋikaosok ka ŋamorokin ŋuna eiitaaka ŋuna isitiyaete ŋikeyokok a ŋamesekin akiyokiyo, ikwaan ŋakitadapeta ŋuna igirito ŋikaosok ka ŋisumari ŋulu egogoŋ aneni ibubukinitoe. Erae Akuj abu inak ŋikaosok ŋakiro ŋun, Akuj ŋina erae Ekeyokon yok a daadaŋ.

¹² Ŋikaatuŋa, eya ŋakiro ŋuna emaikina iyes toyenete, nyiyata ŋakiro ŋace nakigireta a ŋikaosok ŋun. Ketemar akigir ŋikitaaboi ŋulu alalak, emam epite ŋolo ejoŋoere akigir, ido ikiupi iyes akisyom ŋakiro ŋuna alalak.

¹³ Ekaku a ŋakiro a ŋun a daadaŋ, eyai ibore ipei bon ŋini emaikina kiyatakinae, kitopoloorite Akuj ka kiwuapite ŋakiciketa keŋ, anerae erae ŋun ŋuna emaikina ŋinituŋanan kitiya.

¹⁴ Ikitubokini Akuj iwon anakiro a daadaŋ a ŋuna ikitiyat iwon, kejokak, kori keroko ka anakiro a ŋuna itiyao iwon anakimunono.