Ekal. 10 - Ebaibul

Ŋakiro ŋace ŋuna abu ayoŋ eŋolyaanak

¹ Lopite ŋolopei epedoryata ŋicuc ŋuluatwak akitobosun akimyet ŋina sek ejok eure, eperi abaŋao ŋina edit nooi amunaar aosou ka apolou.

² Elelakinito ŋitai a ŋikaosok akitiya ŋuna iyookino, nai elelakinito ŋitai a ŋibaŋaanotin akitiya ŋuna nyiyookino.

³ Tari elosete ŋibaŋaanotin alorot, nyecoikinito akisileereun atemar erae ikes ŋibaŋaanotin, isileereunito ikes neni a ŋinituŋanan atemar erae ikes ŋibaŋaanotin.

⁴ Ani kikitoŋo iyoŋ ekapolon kon, nyiesik etic ŋolo ikipolokinitor iŋes iyoŋ, anerae isyonio ŋinadyakaret daadaŋ erae pa kededeŋiar ituŋanan.

⁵ Eyai aronis ŋina adau ayoŋ akiŋolikin anakwap a na, erae ŋin adyakaret ŋina itiyaata ŋikepukak ŋuna nyiyookino.

⁶ Ituruwonoryo ŋibaŋaanotin ŋulu alalak ŋikapolok, ido kimyekinitetei ŋikaosok erae ŋiketiyak a ŋibaŋaanotin

⁷ Eŋolik ayoŋ ŋipi edokito ŋaŋolei, ido tolosete ŋikapolok a ŋakejen esibit ŋipi.

⁸ Ituŋanan daadaŋ ŋini eboki akipany, epedori iŋes pei akimasakin nakipany ŋin; ituŋanan daadaŋ ŋini epunupunui ŋawuasin, epedori akicwaŋun emun kitokonya.

⁹ Ituŋanan daadaŋ ŋini ebeli ŋamoru, epedorete ŋamoru akiwan iŋes. ituŋanan daadaŋ ŋini ibeli ŋakito, epedorete ŋakito akiwan iŋes.

¹⁰ Ani keŋiŋi aep, ido nyipena ituŋanan iŋes, emaikina nai ituŋanan kisitiya agogoŋu isitiyae aep ŋin ayepya; nai erae aosou iŋarakini ituŋanan akitiyakinia ibore ejok.

¹¹ Ani keyeni ituŋanan ekitoe ŋolo eduŋonokinio nawat aŋuna ka akisorit a ŋimuno, ido nyeduŋok nakuwan eriŋa emun nyekonya, emam nabo ajokis aduŋokin ekitoe ŋol nakuwan kedau emun akikony.

¹² Itojokete ŋituŋa ŋikaosok anakiro a ŋuna irworosi ikes, nai irikar ŋibaŋaanotin anakiro a ŋuna irworosi ikes.

¹³ Isyakinete ŋibaŋaanotin erwor ŋakiro ŋuna ka abaŋao, ido ekaku kirworo aronis ka ŋimasimas;

¹⁴ nabo irworosi ŋibaŋaanotin jik nyililiŋeneete. Mam ituŋanan eyeni ŋakiro ŋuna itiyakin alokiŋaren, ido ŋae epedori alimokin ŋituŋa ŋuna itiyakin ekaku ka akiyar a na?

¹⁵ Isiumiyanarosi ŋibaŋaanotin ŋiticisyo kec, anerae imuryakini ikes aboŋor akieŋun alore.

¹⁶ Ekaŋ iyes ŋituŋa ŋulu erae erwosit kus esorokit ka ŋulu erae ŋikarikok kus ŋulu isyanakinete akitiya ŋasuban eriŋa ataparacu!

¹⁷ Erereŋ ŋituŋa ŋulu eyakatar erwosit ŋolo etamununui ŋuna ajokak ŋuna kitiyakina lotuŋa keŋ, ido toyakatar ŋikarikok ŋulu eloseneneete akimuj anapaki a ŋina sek itemokinitoe, ŋikarikok ŋulu imujete aŋuna ka aryamun agogoŋu meere aŋuna ka amerakin.

¹⁸ Ani kekalanyana ituŋanan asubakin neni emunaara alokai keŋ, eritakin atoto a akai. Ani kejamaana ituŋanan agolonokin neni eorori alokidiama akai keŋ, eouni akai.

¹⁹ Itemokino ŋasuban aŋuna ka alakaror, ido eyaununui epiini nakiyar a ituŋanan alakara; nai ŋisiliŋa eryamunia ituŋanan ibore daadaŋ.

²⁰ Nyiceni erwosit tari iyai nagule kon; anerae epedori tari ikyenyit akiya ŋakiro kon ŋuna icenor iyoŋ, kori epedori isubuna ice ŋini eya ŋabebenuk alimor ŋakiro ŋuna icenor iyoŋ.