Eete a Ŋie. 5 - Ebaibul

¹ Abu ayoŋ lomanikor kaŋ, nakaato kaŋ ka ateran kaŋ, adau ayoŋ acunakin eminae ŋolo akukunyon ka ŋikito ŋulu akukunyok, adau ayoŋ akinyam ŋapune ŋuna ka ao kaŋ ka akimyet ŋina ka ao kaŋ, adau ayoŋ akimat epiini kaŋ ka ŋakile kaŋ. Okoe ŋikonei kaŋ, kimuja ka tomata, ibus ŋolominat kaŋ alokidiŋ ŋisorok, ŋuluminan kaŋ, tomata kimwoko.

Akirujaet ace

² Abu ayoŋ ojotoor, nai ayari etau kaŋ, abu ayoŋ eira ŋolominat kaŋ ikoŋikoŋi ekek ebala, “Toŋaarae nakaato kaŋ, ŋinaminat kaŋ, ŋina iyapara alopitesyo ka ŋina ajokan nooi. Ekopik akau kaŋ, etapalal ainac ŋina ka akuwar ŋitim kaŋ.

³ Adau ayoŋ alacar elou kaŋ, emaikina mono ayoŋ onyou onap iŋes nabo a? Adau ayoŋ akilotar ŋakejen kaŋ, emaikina mono ayoŋ onyou etooŋoryan ikes nabo a?

⁴ Abu ŋolominat kaŋ kirepu akan keŋ anapedot a epuke, ka abu etau kaŋ todou aŋuna keŋ.

⁵ Abu ayoŋ onyou aŋaar ŋolominat kaŋ, eleleba eure ŋolo a eminae a ŋolo akukunyon nakan kaŋ ka aliit akimyet a eminae a ŋolo akukunyon alomoyo aloboorei a ŋulu eŋaere ka egolere epuke.

⁶ Abu ayoŋ oŋaa epuke aŋuna a ŋolominat kaŋ, nai keris ŋolominat kaŋ kerotoki, keaka, abu sek etau kaŋ tolakar eirari iŋes irworo. Abu ayoŋ oŋoleŋole iŋes nen, nai abu nyeŋolik, abu ayoŋ onyara iŋes nai abu nyeboŋok.

⁷ Apotu ŋiketeok a etaun okoryamut ayoŋ apaki ŋina emanimaniata etaun nakwaare, apotu ekedica ayoŋ okowan, apotu ŋiketeok ŋarwatatain tolemasi akitambara kaŋ anakou.

⁸ Okoe ŋapesur a Yerusalem, akadyekit ayoŋ iyes atemar ani kiryamut ŋolominat kaŋ tolimokisi iŋes ŋakiro nu ebe, ‘Ekeinaiya ayoŋ amina iyoŋ.’”

Ekiyan ŋolo a ateran ka ŋikonei

⁹ Alipite ejokia ŋolominat kon akilo ŋuluce, iyoŋ ŋina ibus nooi akilo ŋunace? Alipite ejokia ŋolominat kon akilo ŋuluce, ikimaimaya iyoŋ isua?

¹⁰ Ibus ŋolominat kaŋ ka ikisupari; ileere iŋes ibus alokidiŋ ŋituŋa ŋalipyo ŋatomon.

¹¹ Emalimali ereet keŋ ikwa egolid, isaanaete ŋitim keŋ ejok iryoko cuc ikote ekuruk.

¹² Ecope ŋakonyen keŋ ikote ŋuna a ŋakuryo a ŋuna eyakasi diyete ŋicowae, ŋakuryo ŋuna akwaŋak kya ikwa ŋalepan, ŋakuryo ŋuna erekina lokipetot esibit ŋaculo.

¹³ Enarinarete ŋikelyo keŋ ikote emanikor ŋolo edupakinitae ŋicok a ŋikito a ŋulu akukunyok, emilimilete ŋipon keŋ ikote ŋatur a ŋicomocomo, ekukuny eminae ŋolo aliwan alopon keŋ.

¹⁴ Ediryaka ŋakan keŋ ka enapit iŋes ŋikabobooe ŋulu eya ŋamoru ŋuna amilimilak, esulut akuwan keŋ ikwaan ka ekelae a etom, esirit iŋes akuwan keŋ a ŋinapen a ŋulu amilimilak.

¹⁵ Ikote ŋakejen keŋ ŋipirin ŋulu itiyaunitae anamoru a ŋina enyaritae Alabasta, ŋulu esipokinitae nawoeta ŋuna itiyaunitae a egolid, ibus iŋes nooi ikwaan ka Lebanon, akwap ŋina eya ŋikito a Cedar ŋulu aoyak.

¹⁶ Ebobok nooi ŋakiro ŋuna irworo iŋes, ikisupari iŋes alopitesyo keŋ a daadaŋ. Okoe ŋapesur a Yerusalem, epite ŋolo eyakar ŋolominat kaŋ ka lokone kaŋ iŋes ŋol.