Eete a Ŋie. 4 - Ebaibul

Kipuroe akibuses a ateran

¹ Okoe ibus iyoŋ nooi ŋinaminat kaŋ, okoe ibus iyoŋ nooi, ileerete ayaaye akitambara ŋakonyen kon ecope. Icurosi ŋitim anakou kon lopite ŋolo icurunotor ŋamee kwap alokamukumukui a ŋulu a Gilead,

² Ekwaŋak ŋikyal kon kya ikwa ŋamesekin ŋuna akwaŋak kya ŋuna keriŋa etubio ŋajul ka ilotaryo, mam epei daŋ, alokyal kon elokoro, mam ŋolo ipasae.

³ Ibusak ŋipon kon ka akanirarito ikes ayoŋ irworikini iyoŋ, ileerete ayaaye akitambara kon ŋikelyo kon emalimalete.

⁴ Ecorot emosiriŋ kon ikwaan ka aduketait a Daudi ŋinacorot aoyan, aduketait ŋina inenetoi ŋaupala aliput ŋuna a ŋikajiok.

⁵ Ikwaan ŋikisin kon ka ŋitak ŋiarei ŋulu ka agete, ikwaan ka ŋimuu a atili ŋulu edakasi neni eya ŋicomocomo.

⁶ Arubakini ayoŋ eboi alomukura a ŋolo a ŋimina a ŋulu akukunyok ka alomukura a ŋolo a ekinyate, akitodol ŋina iwalarya akwap, ŋina eŋopiyarya akiryonut.

⁷ Ibus iyoŋ nooi ŋinaminat kaŋ, emam neni nyibus anakuwan kon.

⁸ Bua orukosi ka ayoŋ alo Lebanon ateran kaŋ, bua orukosi ka ayoŋ alo Lebanon. Totiyaun alomoru Amana, totiyaun anaitae a emoru Senir ka Erimon, aneni iboiyoto ŋiŋatunyo ka alomoru a ŋulu eya ŋirisae.

⁹ Isupa iyoŋ etau kaŋ, iyoŋ nakaato kaŋ ka ateran kaŋ, isupa iyoŋ etau kaŋ alopite a ŋolo itakania iyoŋ ka a erikot a ŋolo inapit iyoŋ alodokole kon.

¹⁰ Ebob nooi amina kon nakaato kaŋ, ateran kaŋ, ebob nooi amina kon, iloit epiini, ekukuny nooi eure a ŋamyeta kon, iloit eure a ŋikito a ŋulu akukunyok.

¹¹ Ebobok aneni kaŋ ŋakiro ŋuna ilimununui iyoŋ ateran kaŋ, ebobok aneni kaŋ ŋakiro ŋuna irworo iyoŋ ikote ao ka ŋakile, ebob eure a ŋilowi kon ikoni eure a Lebanon.

¹² Iiuna iyoŋ ikwa emanikor ŋolo ewuatae, nakaato kaŋ, ateran kaŋ, iiuna iyoŋ ikwa ecowa ŋolo ewuatae ka eitanit ŋolo egolol.

¹³ Erae emanikor kon ŋolo erupyata ŋikito ejok, erupete ŋikito alomanikor a ŋol ikwaan ka ŋikito ŋulu enyaritae Pomegranate ka eraete ŋaraito ŋuna ajokak nooi. Eyakasi nen ŋikito ŋulu enyaritae Ena ka akimyet Narid,

¹⁴ ŋikito ŋulu enyaritae Sapiron, Kalamus ka Cinamon, kori ŋikito ŋulu a ekinyate a ŋolokabila kaapei ka ŋolo akukunyon ta eminae ece ŋolo daadaŋ akukunyon ka ŋikito ŋulu akukunyok daadaŋ.

¹⁵ Ikwaan iyoŋ ka elelya ŋolo elelyanakini ŋimanikorin, akare ŋina a ŋakipi a ŋuna eteyarak, ŋakipi ŋuna eleleunito alo Lebanon.

¹⁶ Ekuwuam ŋolo alo Kuju tonyou, ekuwuam ŋolo alo Kwap bua! Tokut lomanikor kaŋ, ikotere eure ŋolo ke emanikor kaŋ ielakin akwap. Emaikina ŋolominat kaŋ bu lomanikor keŋ, kimuj ŋaraito a emanikor ŋuna ajokak nooi.