Eete a Ŋie. 3 - Ebaibul

¹ Abu ayoŋ akuwar kya aperi alokitaada kaŋ otamatama aanyun ŋolo emina etau kaŋ, abu ayoŋ otamatama aanyun iŋes nai abu nyaryamu.

² Abu otamu ebe, “Anyouni ayoŋ tokona olot erimo lotaun, olot lorotin ŋulu ke etaun, ewari ayoŋ iŋes ŋolo emina etau kaŋ,” Aŋun, abu ayoŋ ewar iŋes nai abu nyaryamu.

³ Apotu ŋiketeok a etaun okoryamut ayoŋ apaki ŋina emanimaniata etaun, abu ayoŋ eŋit ikes otema, “Iŋolikinito mono iyes ŋolo emina etau kaŋ a?”

⁴ Alunyar bon ayoŋ aneni kec, abu ayoŋ oryamu ŋolo emina etau kaŋ, abu ayoŋ otunakin iŋes ka nyemyek iŋes tolot akitodol ŋina ayaunia ayoŋ iŋes kai a toto kaŋ, nagule ŋina akapotiunio iŋes ayoŋ.

⁵ Ekoŋi ayoŋ alimit ŋagetei ka ŋatili ŋuna ka ariet, atemar, okoe ŋapesur ŋuna a Yerusalem, nyiteryeŋut ka nyitonyout amina akitodol ŋina edolio apaki keŋ.

Todolut eteran ka ŋirukitos keŋ

⁶ Nyo mono ŋini ebunit analoŋisat ŋini ikwaan ka apuru ŋina eremit kidiama, ŋini eyakar eure ŋolo ke eminae a ŋolo akukunyon ka ŋolo a ekinyate ŋulu etiyaunitae alokito a daadaŋ a ŋulu akukunyok a ŋulu alomucurus.

⁷ Kiŋolikisi, erae Solomon itenunitae, irimokinito iŋes kidiŋ ŋikajiok ŋatomonikanikapei ŋulu erae ŋikilyok ŋulu ajiok alo Isirael.

⁸ Etiŋito ikes daadaŋ ŋileŋia ka eyenete ajiore alojie, enapit ŋinituŋanan ekileŋ keŋ alokalokot aŋuna a eli a daadaŋ a ŋolo eramakinio nakwaare.

⁹ Abu Solomon kitiyau aŋuna keŋ ibore ŋini edakitere iŋes, etiyaunit iŋes adaket ŋin anakito aŋuna alo Lebanon.

¹⁰ Etiyaunitae ŋawoeta keŋ a esilipa ka etiyaunitae a egolid neni agwaŋanakin iŋes iboi ka arapakinitae nen anaŋga ŋina kipurat areŋan ŋina adonyunito ka esibusito ŋaberu ŋuna a Yerusalem.

¹¹ Ŋaberu ŋuna a Sion, tolomutu kiŋa, kiŋolikisi erwosit Solomon; enapit iŋes ebokot ŋolo etanapikini iŋes toto keŋ nakou akoloŋit ŋina a ŋasuban a ekiitanu keŋ, akoloŋit ŋina ka alakara ka alelyanu keŋ.